Read La Bible en Malgache Hosea 4 Bible Online

Hosea 4 - La Bible en Malgache bible

Hosea 4

¹Mihainoa ny tenin’NY TOMPO, ianareo Zanak’Israely! Fa manana ady amin’ny mponina amin’ny tany NY TOMPO satria tsy misy fahamarinana, na fitiavana na fahalalana an’Andriamanitra eo amin’ny tany,

²fa fanozonana sy lainga, famonoana sy halatra ary fijangajangana kosa; eny, manao an-keriny izy ary tsy mitsahatra ny mandatsa-dra.

³Noho izany dia mitomany ny tany ary reraka izay rehetra mitoetra ao aminy mbamin’ny bibidia sy ny voromanidina; eny, na dia ny hazandrano any anaty ranomasina aza dia ringana koa.

⁴Kanefa aza misy miampanga na manome tsiny fa ny olonao dia efa tahaka ireo mifamaly amin’ny mpisorona.

⁵Ho tafintohina antoandro ianao; ny mpaminany koa dia hiara-tafintohina aminao amin’ny alina, ary hovonoiko ny reninao.

⁶Ringana ny oloko noho ny tsy fisian’ny fahalalana. Satria nandà ny fahalalana ianao, dia mba holaviko kosa tsy ho mpisoroko intsony; nanadino ny lalànan’Andriamanitrao ianao, ka mba hohadinoiko kosa ny zanakao.

⁷Arakaraka ny nitomboany no nanotany Tamiko ka hampodiko ho henatra kosa ny voninahiny.

⁸Mamoky tena amin’ny fanatitra fanadiovana izay aterin’ny oloko izy ireo, ka satriny ihany ho diso ny olona.

⁹Ho sahala ihany ny hanjo ny olona sy ny mpisorona; hovaliako noho ny lalany izy, ary hatsingeriko aminy ny nataony.

¹⁰Koa hihinana izy nefa tsy ho voky, hijangajanga izy nefa tsy hitombo isa satria efa tsy nahoany intsony NY TOMPO.

¹¹Fijangajangana sy divay ary ranom-boaloboka no mahavery ny saina.

¹²Mila saina amin’ny tapa-kazony ny oloko ary ny tehiny no miteny aminy; fa ny fanahim-pijangajangana no nampania azy; mijangajanga izy ka manalavitra an’Andriamaniny.

¹³Eny an-tampon’ny tendrombohitra no amonoany zavatra hatao fanatitra; eny amin’ny havoana no andoroany ditin-kazo manitra, dia eny ambanin’ny hazo oaka sy ny hazo kesika ary ny hazo terebinta* izay tsara alokaloka! Koa izany no ijejojejoan’ny zanakavavinareo sy ijangajangan’ny vinantovavinareo.

¹⁴Tsy hamaly ny zanakavavinareo Aho raha mijejojejo izy, na ny vinantovavinareo raha mijangajanga izy, fa ny tenany aza dia mitokana mankany amin’ny mpijangajanga sady mamono zavatra hatao fanatitra miaraka amin’ireo mpijangajanga ho fanompoan-tsampy. Tsy ho vanona ny firenena tsy misaina.

¹⁵Na dia mijangajanga aza ianao, ry Israely, aoka tsy mba hanota ny Joda; aza mankany Gilgala ianareo na miakatra any Bety-Avena; ary aza mianiana hoe: Raha velona koa NY TOMPO!

¹⁶Fa maditra toy ny vantotra ombivavy maditra ny Israely; koa ankehitriny dia handrasan’NY TOMPO toy ny zanak’ondry eny amin’ny malalaka izy.

¹⁷Lasa mpiombona amin’ny sampy i Efraima; aoka izy ho eo!

¹⁸Raha vao mitsahatra ny fibobohany divay dia tsy manao afa-tsy ny mijangajanga izy. Mankasitraka fahafaham-baraka ireo mpitondra azy.

¹⁹Voapaoky ny elatry ny rivotra izy ka ho menatra noho ny zavatra novonoiny hatao fanatitra.