Read La Bible en Malgache Hosea 5 Bible Online

Hosea 5 - La Bible en Malgache bible

Hosea 5

¹Henoinareo izao, ry mpisorona! Mihainoa, ry taranak’Israely! Atongilano ny sofinareo, ry mpianakavin’ny mpanjaka, fa ianareo no hiharan’ny fitsarana satria tonga fandrika ao Mizpa ianareo ary fandrika harato voavelatra ao Tabara.

²Misy mpivadika fatra-mpamono, fa Izaho kosa dia famaizana ho azy rehetra.

³Izaho dia mahalala an’i Efraima ary tsy miafina Amiko Israely; ankehitriny ianao, ry Efraima, dia tonga mpijangajanga ka voaloto Israely.

⁴Tsy avelan’ny ataony hiverina amin’Andriamanitra izy satria ny fanahim-pijangajangana no ao anatiny ary tsy mahalala NY TOMPO izy.

⁵Vavolombelona manameloka azy ny avonavon’ny Israely; ho lavon-keloka Israely sy i Efraima; hiara-lavo amin’izy ireo koa i Joda.

⁶Hitondra ny omby aman’ondriny izy ka handeha hitady NY TOMPO nefa tsy hahita Azy satria NY TOMPO efa niala taminy.

⁷Nivadika tamin’NY TOMPO izy ireo satria niteraka zazasary; ankehitriny dia ho levonin’ny voaloham-bolana izy mbamin’ny anjara lovany.

⁸Tsofy ao Gibea ny anjomara ary ao Rama ny trompetra! Miantsoantsoa mafy ao Bety-Avena! Jereo ao aoriananao ry Benjamina!

⁹Ho lao i Efraima raha tonga amin’ny andro fanamelohana. Zavatra tsy maintsy ho to no nampahafantariko teo amin’ireo fokon’ny Israely.

¹⁰Ny mpanapaka an’i Joda dia efa tonga toy izay mamindra ny fetran’ny faritany, koa ireo no hampidinako ny fahatezerako toy ny riaka.

¹¹Ampahoriana i Efraima sady voatorotoron’ny fitsarana satria ninia nanaraka zava-poana izy.

¹²Koa amin’i Efraima Aho dia tahaka ny kalalao ary amin’ny taranak’i Joda dia toy ny fahalovana.

¹³Hitan’i Efraima ny aretiny ary hitan’i Joda ny feriny; dia nankany Asiria i Efraima; eny, nandefa iraka ho any amin’i Jareba[9] mpanjaka izy; nefa sady tsy mahasitrana anareo izy no tsy mahatsabo ny ferinareo,

¹⁴satria amin’i Efraima dia tahaka ny liona Aho, ary amin’ny taranak’i Joda dia tahaka ny liona tanora. Izaho dia Izaho no mamiravira dia lasa mandeha. Lasako izy ka tsy misy mahavonjy.

¹⁵Handeha hody any amin’ny fitoerako Aho ambara-piaikiny ny helony sy hitadiavany ny tavako. Hitady Ahy fatratra izy rehefa azom-pahoriana.