Read La Bible en Malgache Hosea 6 Bible Online

Hosea 6 - La Bible en Malgache bible

Hosea 6

¹Andeha hiverina amin’NY TOMPO isika! Fa Izy no namiravira nefa Izy ihany no hahasitrana antsika. Izy no namely nefa Izy no hamehy ny ferintsika.

²Rehefa afaka roa andro dia hovelominy indray isika ary amin’ny andro fahatelo dia hatsangany ho velona eo anatrehany isika.

³Dia aoka hahalala isika; eny, aoka hiezaka hahalala NY TOMPO. Mahatoky toy ny maraina ny fiposahany, fa ho avy amintsika toy ny ranonorana mivatravatra Izy ary toy ny faraorana mahavonto ny tany.

⁴Inona re no ho azoko atao aminao, ry Efraima? Inona re no ho azoko atao aminao, ry Joda? Fa toy ny rahona amin’ny maraina ny fitiavanareo, tahaka ny ando izay levona raha vao maraina.

⁵Noho izany no nitondrako ny mpaminany hamely azy; ny tenin’ny vavako no nentiko namono azy ary ny fitsarana anao dia hiposaka toy ny mazava

⁶satria famindrampo no sitrako fa tsy fanatitra alatsa-dra ary fahalalana an’Andriamanitra noho ny fanatitra dorana manontolo.

⁷Nivadika ny fanekena toy ny tany Adama[10] ireny. Tao no nivadihany Tamiko.

⁸I Gileada dia tanànan’ny mpanao ratsy lian-dra.

⁹Toy ny jiolahy manao vela-pandrika ny fikambanan’ny mpisorona; mamono olona eny an-dalambe mankany Sekema izy; eny, fahafaham-baraka izany.

¹⁰Tao amin’ny taranak’Israely no nahitako zavatra mahatsiravina; ao no nijangajangan’i Efraima sy naha voaloto an’Israely.

¹¹Ny aminao koa, ry Joda, dia efa voatendry ny andro hijinjana anao rehefa tafaveriko amin’ny toerany ny oloko.