Read La Bible en Malgache Hosea 7 Bible Online

Hosea 7 - La Bible en Malgache bible

Hosea 7

¹Raha ta hanasitrana ny Israely Aho dia miseho ny helok’i Efraima sy ny asa ratsin’i Samaria satria fatra-mpandainga izy; miditra ny mpangalatra, ary mandehandeha eny ivelany ny andian-jiolahy.

²Tsy mihevitra ao am-pony izy fa tsaroako ny asa ratsiny rehetra; ankehitriny dia gejain’ny nataony izy, ary tonga eo anatrehako izany.

³Amin’ny asa ratsy ataony no ampifaliany ny mpanjaka ary amin’ny laingany no ampifaliany ny mpanapaka.

⁴Samy mpaka vadin’olona avokoa izy rehetra ka toy ny fatana voafanan’ny mpanao mofo izay mitsahatra tsy misorona afo hatramin’ny ametafetany ny koba ka ambara-pitombony.

⁵Tamin’ny andron’ny mpanjakantsika dia nankarary tena tamin’ny herin’ny divay ny mpanapaka; nifandray tanana tamin’ny mpaniratsira izy.

⁶Fa entin’ireo ho ao amin’ny vela-pandrika ny fony toy ny ho ao amin’ny fatana; mandritra ny alina dia matory ihany ny mpanao mofo, ary nony maraina dia toy ny lelafo mirehitra ny fatana.

⁷Samy mahamay toy ny fatana izy rehetra ka mandevona ny mpitsarany; efa lavo avokoa ny mpanjakany, ary tsy misy miantso Ahy izy rehetra.

⁸I Efraima dia miharoharo amin’ireo firenena; I Efraima dia efa tonga toy ny mofo tsy voavadika.

⁹Lanin’ny vahiny ny heriny nefa tsy fantany akory izany. Eny, efa miha fotsy volo ihany izy saingy tsy fantany.

¹⁰Ny avonavon’Israely dia vavolombelona manameloka azy nefa tsy miverina amin’NY TOMPO Andriamaniny ihany izy; na dia eo aza izany rehetra izany dia tsy mitady Azy izy.

¹¹Tonga tahaka ny voromailala adaladala tsy manan-tsaina i Efraima; efa niantso an’i Ejipta izy ary efa nankany Asiria.

¹²Raha vao mandeha izy dia hovelariko aminy ny fandrika haratoko ka hazerako ao toy ny voromanidina izy; hofaiziko izy, araka izay efa nambara tamin’ny fiangonany.

¹³Lozan’izy ireo fa nandositra Ahy izy! Haringana izy satria nikomy tamiko! Ta hanavotra azy Aho, kanefa lainga no entiny milaza Ahy.

¹⁴Tsy mitaraina Amiko ao am-pony izy fa midradradradra foana ao am-pandrianany; mitangorona hitady vary sy ranom-boaloboka izy sady mikomy hiala Amiko.

¹⁵Izaho no nampianatra sy nanatanjaka ny sandriny, nefa izy kosa dia misaintsain-dratsy Ahy.

¹⁶Miverina ihany izy nefa tsy ho amin’ny Avo; tonga tahaka ny tsipìka mivaona fandeha izy; ho lavon-tsabatra ny mpanapaka azy noho ny firehitry ny lelany. Izany no ho fandatsana azy any amin’ny tany Ejipta.