Read La Bible en Malgache Hosea 9 Bible Online

Hosea 9 - La Bible en Malgache bible

Hosea 9

¹Aza mifaly ry Israely, aza faly loatra toy ny firenena hafa, fa efa nijangajanga niala tamin’Andriamanitrao ianao, sady efa tia karama maloto teny am-pamoloana rehetra teny!

²Tsy hahavelona azy ny famoloana sy ny famiazam-boaloboka ary handiso fanantenana azy ny ranom-boaloboka.

³Tsy honina ao amin’ny tanin’NY TOMPO izy; hiverina ho any Ejipta i Efraima ary hihinana zavatra tsy madio any Asiria.

⁴Tsy hampidina divay ho fanatitra ho an’NY TOMPO izy sady tsy hankasitrahany izany; tsy hankasitrahany ny zavatra vonoiny hatao fanatitra fa ho toy ny fahan-kanina ho an’ny mpisaona; ho voaloto izay rehetra homana izany; fa ny haniny dia ho an’ny tenany ihany ka tsy ho tafiditra ao amin’ny tranon’NY TOMPO.

⁵Inona ary no hataonareo raha tonga amin’ny fotoam-pivavahana sy amin’ny andro firavoravoana voatendrin’NY TOMPO?

⁶Fa e! Lasa nandositra ny fandringanana izy; i Ejipta no hanangona azy, i Memfisa no handevina azy; ho rakotry ny songosongo mandady ny fanaka volafotsiny sarobidy; tsilo no ho ao an-dainy.

⁷Tonga ireo andro famaliana, tonga ireo andro fampamoahana; ho fantatr’Israely izany! Adala ny mpaminany ary very saina ny olona mahazo tsindrimandry noho ny halehiben’ny helokao sy habetsahan’ny fanoherana anao.

⁸Miaraka amin’Andriamanitro ny mpitilin’i Efraima, dia ny mpaminany; eny amin’ny alehany rehetra ny haraton’ny mpamandri-borona ary tonga hatrany amin’ny tranon’Andriamaniny ny fankahalana azy.

⁹Fatra-mpanao ratsy izy ireo, toy ny tany Gibea[11] fahiny. Ho tsarovan’Andriamanitra ny helony ary hovaliany ny fahotany.

¹⁰Tahaka ny voaloboka any an-tany efitra no nahitako ny Israely. Toy ny aviavy malady masaka no nahitako ny razanareo. Nefa ireny dia tonga tany Baala-Peora ka nanolo-tena ho amin’ilay mampahamenatra[12], ary tonga fahavetavetana tahaka an’ilay tiany ihany izy.

¹¹Ny amin’i Efraima, hihelina toy ny voromanidina ny voninahiny ka tsy hisy hiteraka, na hanana anaka, na ho torontoronina.

¹²Na dia misy mitaiza aza ny zanany dia hofoanako ihany ireny mialoha ny maha lehibe azy. Eny, hahita loza tokoa izy amin’ny handaozako azy!

¹³I Efraima, raha ny nahitako azy, dia voavoly ao amin’ny tany mahafinaritra tahaka an’i Tiro, nefa tsy maintsy mamoaka ny zanany ho amin’ny mpamono izy.

¹⁴TOMPO ô, omeo azy... Inona no homenao azy? Omeo azy ny kibo tsy mahazo zaza sy ny nono ritra.

¹⁵Ao Gilgala ny fahotany rehetra; eny, tao no nankahalako azy. Noho ny faharatsian’ny asany dia horoahiko hiala ao an-tranoko izy. Tsy ho tia azy intsony Aho fa mpikomy avokoa ny mpanapaka azy.

¹⁶Voaratra i Efraima, maina ny fotony ka tsy hamoa intsony izy; eny, na dia miteraka aza izy, dia hovonoiko ny nateraky ny kibony izay mahafinaritra azy.

¹⁷Harian’Andriamanitro izy satria tsy nihaino Azy; ho tonga mpirenireny any amin’ny Jentilisa* izy.