Read La Bible en Malgache Joela 1 Bible Online

Joela 1 - La Bible en Malgache bible

Joela 1

¹Ny tenin’NY TOMPO, izay tonga tamin’i Joela, zanak’i Petoela.

²Henoy izao, ry zokiolona! Ary atongilano ny sofinareo, ry mponina rehetra amin’ny tany! Moa mba efa nisy tamin’ny andronareo na tamin’ny andron’ny razanareo va izao?

³Lazao amin’ny zanakareo izao ary aoka hilaza amin’ny zanany kosa ny zanakareo ary ny zanak’ireo kosa indray dia hilaza amin’ny taranaka mandimby azy.

⁴Izay sisan’ny kijeja dia nohanin’ny koraika; ary izay sisan’ny koraika dia nohanin’ny valalavao; ary izay sisan’ny valalavao dia nohanin’ny sompanga.

⁵Mifohaza, ianareo mpimamo, ka mitomania! Eny, midradradradrà, ianareo mpisotro divay rehetra, noho ny ranom-boaloboka satria nesorina tsy ho ao amin’ny vavanareo izany!

⁶Fa misy firenena mahery sady tsy hita isa miakatra hamely ny taniko; ny nifiny dia nifin’ny lion-dahy, ary ny vazany dia vazan’ny liom-bavy.

⁷Nataony simba tokoa ny voaloboko ary notapatapahiny ny aviaviko; nokikisany sy nendahany tanteraka ireny ka nariany, eny, tonga fotsy ny rantsany.

⁸Midradradradrà toy ny virijiny misikina lamba fisaonana noho ny amin’ny vadin’ny fahatanorany.

⁹Tsy hita ao amin’ny tranon’NY TOMPO intsony ny fanatitra hohanina sy ny fanatitra aidina; mitomany ny mpisorona, mpanao fanompoam-pivavahana ho an’NY TOMPO.

¹⁰Rava ny saha, misaona ny tany fambolena; fa simba ny vary, ritra ny ranom-boaloboka, maina ny diloilo.

¹¹Aoka ho menatra ianareo mpiasa tany; midradradradrà, ianareo mpikarakara ny tanim-boaloboka, noho ireo varimbazaha isan-karazany; fa majifa ny vokatry ny saha,

¹²maina ny voaloboka, malazo ny aviavy ary malazo koa ny ampongabendanitra sy ny palma ary ny paoma, dia ny hazo rehetra any an-tsaha; eny, malazo ny fifalian’ny zanak’olombelona.

¹³Misikìna sy mitomania, ianareo mpisorona; midradradradrà, ianareo mpanao fanompoam-pivavahana eo amin’ny alitara; andeha mandry amin’ny lamba fisaonana mandritra ny alina, ianareo mpanao fanompoam-pivavahana ho an’Andriamanitro, fa tsy ho hita intsony ao amin’ny tranon’Andriamanitra ny fanatitra avy amin’ny zavamaniry sy ny fanatitra aidina.

¹⁴Manamasìna andro fifadian-kanina, miantsoa fivoriana masina, angony ny zokiolona sy ny mponina rehetra amin’ny tany ho ao amin’ny tranon’NY TOMPO Andriamanitrareo, ary aoka hitaraina amin’NY TOMPO.

¹⁵Indrisy ny andro! Fa efa antomotra ny Andron’NY TOMPO ka tahaka ny fandringanana avy amin’ny Tsitoha no fiaviny.

¹⁶Moa tsy efa nesorina teo imasontsika va ny hanina, eny, ny fifaliana sy ny faharavoravoana tsy ho ao amin’ny tranon’Andriamanitsika?

¹⁷Matimaso ao ambanin’ny baingan-tany ny vary nafafy, foana ny sompitra, mirodana ny trano fitahirizam-bary fa nalazo ny vary.

¹⁸Indrisy ny fitoreon’ny biby! Very hevitra ny andian’omby satria tsy misy ahitra ho azy; eny, na dia ny andian’ny ondry aman’osy aza dia mijaly noho izany.

¹⁹TOMPO ô, Ianao no itarainako! Fa efa levon’ny afo ny kijana any an-tany efitra ary nisy lelafo nandoro ny hazo rehetra any an-tsaha.

²⁰Na dia ny biby any an-tsaha aza dia mihanahana miandrandra Anao satria ritra ny lohasahan-driaka ary efa levon’ny afo ny kijana any an-tany efitra.