Read La Bible en Malgache Joela 2 Bible Online

Joela 2 - La Bible en Malgache bible

Joela 2

¹Tsofy ao Ziona* ny anjomara! Miantsoa mafy ao amin’ny tendrombohitro masina! Aoka hangovitra ny mponina rehetra amin’ny tany! Fa avy ny Andron’NY TOMPO, eny, efa antomotra izany,

²dia andro maizina sy manjombona, andro mandrahona sy maizim-pito, toy ny fahazavan’ny maraina miely manerana ny tendrombohitra, dia firenena lehibe sy matanjaka ka tsy nisy tahaka azy hatrizay hatrizay, sady tsy hisy tahaka azy intsony any aorianany, hatrany amin’ny taonan’ny taranaka fara aman-dimby.

³Misy afo mandevona eo alohany ary misy lelafo mandoro any aorianany; tahaka ny saha Edena ny tany eo alohany fa ny any aorianany kosa dia tahaka ny tany efitra foana, eny, tsy misy tsy azony.

⁴Mitarehin-tsoavaly ny tarehiny ary tahaka ny firiotry ny mpitaingin-tsoavaly ny firiotrany.

⁵Tahaka ny figorodon’ny kalesy fitondra miady any an-tampon’ny tendrombohitra no figorodon’ny fitsambikimbikiny, eny, tahaka ny fipororotry ny lelafo mandoro mololo, ary tahaka ny firenena mahery voalamina hiady.

⁶Eo anoloany dia raiki-tahotra indrindra ny firenena; mivaloarika ny tarehy rehetra.

⁷Mitsarapaka tahaka ny lehilahy mahery izy ary mananika ny manda tahaka ny mpiady, samy mandroso amin’izay hitsiny avy ka tsy vaky laharana.

⁸Tsy mifanosika izy fa samy mandroso amin’izay hitsiny; ary na dia manidina aza ny lefona dia tsy miala an-daharana izy.

⁹Mifamoivoy manerana ny tanàna izy, mihazakazaka eny amin’ny manda izy, mananika ny trano izy ary miditra eo am-baravarankely toy ny mpangalatra izy.

¹⁰Eo alohany dia mihorohoro ny tany ary mihozongozona ny lanitra; tonga maizina ny masoandro sy ny volana ary tsy mamirapiratra ny kintana.

¹¹Ary NY TOMPO mahatonga kotroka eo alohan’ny miaramilany; fa lehibe indrindra ny tobiny ary mahery izay manatanteraka ny teniny; fa lehibe ny Andron’NY TOMPO sady mahatahotra indrindra, koa iza no mahatanty izany?

¹²Koa na dia ankehitriny aza, hoy NY TOMPO, dia miverena Amiko amin’ny fonareo manontolo, amin’ny fifadian-kanina sy ny fitomaniana ary ny fitarainana.

¹³Ny fonareo no triatriaro fa aza ny fitafianareo, dia miverena amin’NY TOMPO Andriamanitrareo; fa mamindra fo sy miantra Izy, mahari-po sady be famindrampo ary manenina ny amin’ny loza.

¹⁴Iza no mahalala raha mba hanenina ihany Izy ka hamela fitahiana ao aorianany, dia fanatitra avy amin’ny zavamaniry sy fanatitra aidina ho an’NY TOMPO Andriamanitrareo?

¹⁵Tsofy ao Ziona* ny anjomara! Manamasìna andro fifadian-kanina! Miantsoa fivoriana masina!

¹⁶Angony ny vahoaka! Manamasìna ny fiangonana! Vorio ny zokiolona, angony ny ankizy madinika mbamin’ny zaza minono; aoka ny mpampakatra hiala ao an’efitranony, ary aoka ny ampakarina hiala ao an-trano fandriany.

¹⁷Eo anelanelan’ny lalantsara fidirana sy ny alitara no aoka hitomanian’ny mpisorona, mpanao fanompoam-pivavahana ho an’NY TOMPO ka hilazany hoe: Iantrao ny olonao, RY TOMPO ô, ary aza avela ho latsa ny lovanao ka hotapahin’ny Jentilisa*; fa nahoana no hataon’ny any amin’ny firenena hoe: Aiza izay Andriamaniny?

¹⁸NY TOMPO dia saro-piaro amin’ny taniny sady miantra ny olony.

¹⁹Eny, NY TOMPO niteny tamin’ny olony hoe: Indro, handefa varimbazaha sy ranom-boaloboka ary diloilo vaovao ho anareo Aho ka ho vokin’izany ianareo; ary tsy havelako ho latsa any amin’ny Jentilisa intsony ianareo.

²⁰Ary ilay avy any avaratra dia hampanalaviriko anareo ka horoahiko ho any amin’ny tany karankaina sady foana; ho any amin’ny ranomasina atsinanana ny lohalalany, ary ho any amin’ny ranomasina andrefana ny vodilalany; hiakatra ny hamaimboany, ary hisondrotra ny fofon-dratsiny fa efa nanao zava-dehibe izy.

²¹Aza matahotra, ry tany fambolena, mifalia sy miravoravoa fa manao zava-dehibe NY TOMPO.

²²Aza matahotra, ry biby any an-tsaha, fa mihamaitso ny kijana any an-tany efitra, mamoa ny hazo ary vokatra ny aviavy sy ny voaloboka.

²³Ary ianareo, ry zanak’i Ziona*, dia miravoravoa sy mifalia amin’NY TOMPO Andriamanitrareo; fa hanome anareo ny lohaorana amin’ny fotoanany Izy ary handatsaka ranonorana mivatravatra ho anareo, dia ny lohaorana sy ny faraorana toy ny taloha.

²⁴Dia ho feno vary ny famoloana ary hihoatra ny vata fanantazana ny divay sy ny diloilo.

²⁵Ary honerako ho anareo ireo taona nohanin’ny valala, dia ny koraika sy ny sompanga ary ny kijeja, izay miaramilako betsaka nalefako hamely anareo.

²⁶Hihinana ianareo ka ho voky, ary hidera ny anaran’NY TOMPO Andriamanitrareo fa mahagaga ny fitondrany anareo; ary tsy ho menatra intsony ny oloko mandrakizay.

²⁷Dia ho fantatrareo fa ao afovoan’ny Israely Aho, ary Izaho no TOMPO Andriamanitrareo, fa tsy misy hafa; tsy ho menatra intsony ny oloko mandrakizay.