Read La Bible en Malgache Amosa 1 Bible Online

Amosa 1 - La Bible en Malgache bible

Amosa 1

¹Ireo tenin’i Amosa, isan’ny mpiandry ondry tany Tekoa, dia izay hitany ny amin’ny Israely tamin’ny andro nanjakan’i Ozia mpanjakan’ny Joda, sy tamin’ny andro nanjakan’i Jeroboama, zanak’i Joasy, mpanjakan’ny Israely, roa taona talohan’ny horohoron-tany.

²Hoy izy: Avy ao Ziona NY TOMPO no mierona, ary avy ao Jerosalema Izy no mampikotroka ny feony. Misaona ny saha fiandrasana ondry ary maina ny tampon’i Karmela.

³Izao no lazain’NY TOMPO: Noho ny fahotana telon’i Damaskosy, eny, efatra aza, dia tsy hotsoahako ny fitsarana satria ragiragy vy no nanosihoseny an’i Gileada;

⁴handefasako afo ny tranon’i Hazaela ka handevona ireo lapan’i Beny-Hadada izany.

⁵Hotorotoroiko ny hidin’i Damaskosy, hofoanako tsy hisy mponina ny lohasahan’i Avena ary hesoriko tao Bety-Edena izay mitana tehim-piandrianana; ho lasan-ko babo any Kira ny vahoakan’i Arama, hoy NY TOMPO.

⁶Izao no lazain’NY TOMPO: Noho ny fahotana telon’i Gaza, eny, efatra aza, dia tsy hotsoahako ny fitsarana satria nalefany ho babo avokoa ny olona ka natolony an’i Edoma;

⁷handefasako afo ny mandan’i Gaza ka handevona ireo lapany izany.

⁸Hofoanako tsy hisy mponina i Asdoda ary tsy hisy hitana tehim-piandrianana ao Askelona; haveriko hamely an’i Ekrona ny tanako ka ho fongana izay sisa amin’ny Filistina, hoy NY TOMPO Andriamanitra.

⁹Izao no lazain’NY TOMPO: Noho ny fahotana telon’i Tiro, eny, efatra aza, dia tsy hotsoahako ny fitsarana satria natolony an’i Edoma ny babo rehetra ary tsy notsarovany ny fanekem-pirahalahiana;

¹⁰handefasako afo ny mandan’i Tiro ka handevona ireo lapany izany.

¹¹Izao no lazain’NY TOMPO: Noho ny fahotana telon’i Edoma, eny, efatra aza, dia tsy havelako izy satria nanenjika ny rahalahiny tamin’ny sabatra izy ka nofoanany ny fiantrany; mamiravira mandrakariva ny fahatezerany ary notahiriziny lalandava ny fahavinirany;

¹²handefasako afo ao Temana ka handevona ireo lapan’i Bozra izany.

¹³Izao no lazain’NY TOMPO: Noho ny fahotana telon’ny taranak’i Amona, eny, efatra aza, dia tsy hotsoahako ny fitsarana satria notatahany ny kibon’izay bevohoka tao Gileada mba hanitarany ny taniny;

¹⁴hampirehitra afo ao amin’ny mandan’i Raba Aho ka handevona ireo lapany izany ary hisy horakoraka amin’ny andro iadiana sy rivo-mahery amin’ny andron’ny tadio;

¹⁵dia ho lasan-ko babo ny mpanjakany mbamin’ireo mpanapaka rehetra ao aminy, hoy NY TOMPO.