Read La Bible en Malgache Amosa 2 Bible Online

Amosa 2 - La Bible en Malgache bible

Amosa 2

¹Izao no lazain’NY TOMPO: Noho ny fahotana telon’i Moaba, eny, efatra aza, dia tsy hotsoahako ny fitsarana satria nodorany ho sokay ny taolan’ny mpanjakan’i Edoma;

²handefasako afo ao Moaba ka handevona ireo lapan’i Kiriota izany; ho faty ao anatin’ny tabataba i Moaba, amin’ny horakoraka sy ny fanenon’ny anjomara;

³hofoanako tsy hisy mpitsara ao aminy ary hataoko indray mamono izy sy ireo mpanapaka rehetra ao, hoy NY TOMPO.

⁴Izao no lazain’NY TOMPO: Noho ny fahotana telon’i Joda, eny, efatra aza, dia tsy hotsoahako ny fitsarana satria nataony tsinontsinona ny lalànan’NY TOMPO, ary tsy notandremany ny didiny ka nampivily lalana azy ny laingany[1] izay fanaon’ny razany;

⁵handefasako afo ao Joda ka handevona ireo lapan’i Jerosalema izany.

⁶Izao no lazain’NY TOMPO: Noho ny fahotana telon’ny Israely, eny, efatra aza, dia tsy hotsoahako ny fitsarana, satria namidiny volafotsy ny olona marina, ary namidiny kapan’olona iray ny sahirana;

⁷mahafaly azy ny mahita ny vovo-tany eo an-dohan’ny mahantra sady mamily ny lalan’ny madinika izy. Olona mianaka no samy mandry amin’ny tovovavy iray ihany ka manamavo ny anarako masina.

⁸Amin’ny lamba azony tamin’ny antoka izy no mitsilailay eny anilan’ny alitara rehetra, sady misotro ny divay azony tamin’ny sazy ao amin’ny tranon’ny andriamaniny.

⁹Nefa Izaho no nandringana ny Amorita teo anoloany, dia olona izay lava tsanganana toy ny hazo sedera sy natanjaka toy ny hazo oaka; eny, nosimbako ny voany teny amboniny sy ny fotony tao ambaniny.

¹⁰Nefa Izaho no nitondra anareo niakatra avy tany amin’ny tany Ejipta sady nitari-dalana anareo efapolo taona tany an-tany efitra mba handovanareo ny tanin’ny Amorita.

¹¹Nanangana mpaminany tamin’ny zanakalahinareo Aho, ary Nazirita tamin’ny zatovonareo. Tsy izany va no izy, ry Zanak’Israely? hoy NY TOMPO.

¹²Kanjo nampisotroinareo divay ny Nazirita ary ny mpaminany noraranareo hoe: Aza maminany!

¹³Indro, Izaho no hitambesatra aminareo toy ny fitambesatry ny sarety feno amboara.

¹⁴Koa tsy ho afa-mandositra ny haingam-pandeha ary tsy ho afaka hampiseho ny heriny ny mahery; tsy hahavonjy ny ainy ny mpiady mahery;

¹⁵tsy hahajoro izay mitana tsipìka ary tsy hahavonjy tena ny haingam-pandeha; tsy hahavonjy ny ainy izay mitaingin-tsoavaly

¹⁶ary na dia izay mahery fo indrindra eo amin’ireo mpiady mahery aza dia handositra tsy mitam-piadiana intsony amin’izany andro izany, hoy NY TOMPO.