Read La Bible en Malgache Amosa 3 Bible Online

Amosa 3 - La Bible en Malgache bible

Amosa 3

¹Henoy izao teny izao izay lazain’NY TOMPO ny aminareo, ry Zanak’Israely, dia ny amin’ny taranaka rehetra izay nentiko niakatra avy tany amin’ny tany Ejipta!

²Ianareo ihany no fantatro tamin’ny firenena rehetra ambonin’ny tany; araka izany dia hovaliako ianareo noho ny helokareo rehetra.

³Ho tafara-dalana va ny olona roa lahy raha tsy efa nifanaiky?

⁴Mierona any an’ala va ny liona raha tsy mahita remby? Manerona ao an-davany va ny liona tanora raha tsy nahazo haza?

⁵Voan’ny fandrika amin’ny tany va ny vorona raha tsy nisy tadivavarana? Voarirotra hiainga amin’ny tany va ny fandrika raha tsy nahavoa zavatra?

⁶Tsofina ao an-tanàna va ny anjomara ka tsy hangovitra ny vahoaka? Misy loza va ao an-tanàna raha tsy NY TOMPO no nahatonga izany?

⁷Fa tsy manao na inona na inona tokoa NY TOMPO Andriamanitra raha tsy milaza ny heviny amin’ireo mpaminany mpanompony.

⁸Ny liona no mierona ka iza no tsy hatahotra? NY TOMPO Andriamanitra no miteny ka iza no tsy haminany?

⁹Ambarao any amin’ireo lapa any Asdoda sy any amin’ireo lapa any amin’ny tany Ejipta hoe: Mivoria any amin’ny tendrombohitr’i Samaria ianareo ka jereo ny tabataba be ao aminy sy ny fampahoriana ao anatiny ao!

¹⁰Fa tsy mahalala hanao ny marina izy ireo, hoy NY TOMPO; mitahiry fanaovana an-keriny sy hetraketraka ao an-dapany izy.

¹¹Koa izao no lazain’NY TOMPO Andriamanitra: E, misy fahavalo manodidina ny tany! Hazerany ny mandanao ary horobaina ny lapanao.

¹²Izao no lazain’NY TOMPO: Toy ny fandrirotry ny mpiandry ondry avy eo am-bavan’ny liona ny tongotr’ondry roa monja na ny sombin-tsofiny, toy izany no ho fandrirotra ny Zanak’Israely izay mipetraka ao Samaria, eo an-jorom-parafara sy eo amin’ny lamba lafo vidy avy any Damaskosy.

¹³Henoinareo ka ambarao ny hamelezana ny taranak’i Jakoba! Hoy NY TOMPO, Andriamanitra Tompon’izao rehetra izao:

¹⁴Amin’ny andro hamaliako ny Israely noho ny fahotany no hamaliako ireo alitara ao Betela; hokapaina ny tandroky* ny alitara ka hianjera amin’ny tany ireo.

¹⁵Hamely ny trano fonenana amin’ny ririnina sy ny trano fonenana amin’ny fahavaratra Aho; ho rava ny trano ivoara; trano maro no ho fongana, hoy NY TOMPO.