Read La Bible en Malgache Amosa 6 Bible Online

Amosa 6 - La Bible en Malgache bible

Amosa 6

¹Lozan’ireo miadana ao Ziona* sy ireo matokitoky foana ao amin’ny tendrombohitr’i Samaria, dia ireo malaza eo amin’ny firenena malaza indrindra, sady hatonin’ny taranak’Israely!

²Mankanesa any Kalne ianareo ka mijere, mandrosoa ho any Hamata lehibe avy eo; dia midìna ho any Gatan’ny Filistina; tsara noho ireo fanjakana ireo va ianareo? Lehibe noho ny tanin’ireo va ny taninareo?

³Ianareo dia mihevitra ny andro fahoriana ho mbola lavitra, nefa mampanakaiky ny fanjakan’ny fampahoriana.

⁴Mandrimandry eo amin’ny farafara ivoara sy mitsilailay eo amin’ny fandrianany izy ireo ary homana ny zanak’ondry avy amin’ny andian’ondry sy ny zanak’omby avy ao am-pahitra.

⁵Mihirahira foana manaraka ny feon-dokanga izy ireo ary mamorona zavamaneno toy ny nataon’i Davida.

⁶Misotro divay amin’ny kapoaka tsara tarehy izy ireo sady mihosotra diloilo tsara indrindra, nefa tsy mba onena ny faharavan’i Josefa!

⁷Koa amin’izao dia ho voalohany amin’izay hobaboina ireo ary hitsahatra ny koranan’izay mitsilailay foana.

⁸NY TOMPO Andriamanitra dia nianiana tamin’ny tenany; hoy NY TOMPO, Andriamanitra Tompon’izao rehetra izao: Fahavetavetana eo anatrehako ny fireharehan’i Jakoba ary halako ny lapany; koa hatolotro ny tanàna mbamin’izay rehetra ao anatiny.

⁹Ary raha folo lahy no sisa ao amin’ny trano iray dia samy ho faty izy ireo.

¹⁰Ary ny havan’ireo maty izay mibata ny faty handoro azy ka mitondra ny taolana hiala tao an-trano dia hiteny amin’izay ao an-trano hoe: Mbola misy olona ihany va ato aminao? Ary raha hoy izy: Tapitra! Dia hovaliany hoe: Mangìna re! Tsy tokony hotononina ny anaran’NY TOMPO!

¹¹Fa indro, NY TOMPO mandidy handravana ny trano lehibe ka hotresatresahina ny trano madinika.

¹²Mihazakazaka eny amin’ny vatolampy va ny soavaly, misy olona mampihosy omby va eny no efa navadikareo ho poizina ny rariny ary ny vokatry ny fahamarinana ho zava-mahafaty?

¹³Ianareo izay mifaly ny amin’i Lo-Dabara[3] ka miteny hoe: Moa tsy ny herinay va no nahazoanay an’i Karnaima[4]?

¹⁴Indro, hanangana firenena hamely anareo Aho, ry taranak’Israely, hoy NY TOMPO, Andriamanitra Tompon’izao rehetra izao; hampahory anareo hatrany akaikin’i Hamata izy ka hatramin’ny lohasahan-driaka any amin’ny tany ngazana.