Read La Bible en Malgache Amosa 7 Bible Online

Amosa 7 - La Bible en Malgache bible

Amosa 7

¹Izao no nasehon’NY TOMPO Andriamanitra tamiko: Indro, namorona andiam-balala Izy rehefa nanomboka nitsimoka iny ny kolokolon’ahitra, kolokolon’izay nojinjaina ho an’ny mpanjaka.

²Nony laniny avokoa ny zavamaniry amin’ny tany dia hoy aho: TOMPO Andriamanitra ô, mifona aminao aho, mamelà heloka! Hataon’i Jakoba ahoana no fahajoro? Kely ange izy e!

³Nanenenan’NY TOMPO izany. Tsy hisy izany, hoy NY TOMPO.

⁴Izao no nasehon’NY TOMPO Andriamanitra tamiko: Indro, NY TOMPO Andriamanitra niantso fitsarana amin’ny afo ka nandevona ny lalina lehibe* ary nandany ny zaralova izany.

⁵Dia hoy aho: TOMPO Andriamanitra ô, mifona aminao aho, mitsahara re! Hataon’i Jakoba ahoana no fahajoro? Kely ange izy e!

⁶Nanenenan’NY TOMPO izany. Tsy hisy koa izany, hoy NY TOMPO Andriamanitra.

⁷Izao no nasehony ahy: Indro, ny Tompo nitsangana teo ambonin’ny manda, sady nisy fandrefesana marindrano teny an-tanany.

⁸Dia hoy NY TOMPO tamiko: Inona no hitanao, ry Amosa? Ary hoy aho: Fandrefesana marindrano. Dia hoy ny Tompo: Indro, hanisy fandrefesana marindrano eo amin’ny Israely oloko Aho fa tsy handefitra aminy intsony.

⁹Ho foana ireo toerana fanaovana sorona an’Isaka, ho rava ireo fitoerana masin’ny Israely ary hitsangana Aho ka hamely ny taranak’i Jeroboama amin’ny sabatra.

¹⁰Dia nandefa iraka tany amin’i Jeroboama, mpanjakan’ny Israely i Amazia, mpisorona tao Betela, hilaza hoe: Manao tetika fikomiana aminao eo anivon’ny taranak’Israely i Amosa, ary tsy zakan’ny tany ny teniny rehetra.

¹¹Satria hoy i Amosa: Ho fatin-tsabatra i Jeroboama ary hobaboana hiala amin’ny taniny tokoa ny Israely.

¹²Ary hoy i Amazia tamin’i Amosa: Ry mpahita! Andeha mandositra mankany amin’ny tanin’ny Joda ianao; any ianao no hihinan-kanina ary any ianao no haminany.

¹³Aza maminany eto Betela intsony fa fitoerana masin’ny mpanjaka sy tranom-panjakana ity.

¹⁴Dia namaly an’i Amazia i Amosa hoe: Tsy mba mpaminany aho na zanaky ny mpaminany; mpiandry ondry sy mpikarakara aviavy aho.

¹⁵Nefa nalain’NY TOMPO tany am-piandrasana ondry aho ka nitenenany hoe: Mandehana ka maminania amin’ny Israely oloko.

¹⁶Koa henoy ankehitriny ny tenin’NY TOMPO: Ianao no milaza hoe: Aza maminany hamelezana ny Israely ary aza miteny mamely ny taranak’Isaka!

¹⁷Koa izao no lazain’NY TOMPO: Hijangajanga ao an-tanàna ny vadinao, ho lavon-tsabatra ny zanakao lahy sy ny zanakao vavy, hozaraina amin’ny kofehy fandrefesana ny taninao; ho faty any amin’ny tany maloto ny tenanao ary hobaboina hiala amin’ny taniny tokoa ny Israely.