Read La Bible en Malgache Jona 1 Bible Online

Jona 1 - La Bible en Malgache bible

Jona 1

¹Tonga tamin’i Jona, zanak’i Amitahy, ny tenin’NY TOMPO hoe:

²Mitsangàna ka mankanesa any Ninive, ilay tanàna lehibe, ary ambarao mafy ny amin’ny hamelezana azy, fa tafakatra eto anatrehako ny faharatsiany.

³Nefa nitsangana handositra ho any Tarsisy i Jona mba handositra ny tavan’NY TOMPO. Nidina tany Jopa izy ka nahita sambo hankany Tarsisy, dia naloany ny sarany ka niondrana taminy izy mba hiara-mandeha tamin’ny olona ho any Tarsisy, hanalavitra NY TOMPO.

⁴Fa NY TOMPO nahatonga rivotra mahery teny ambonin’ny ranomasina, dia nanonja mafy ny ranomasina ka efa nila ho vaky ny sambo.

⁵Raiki-tahotra ny tantsambo ka samy nitaraina tamin’ny andriamaniny avy, sady nanary tany an-dranomasina ny entana tao an-tsambo mba hanamaivanana azy. I Jona kosa anefa tamin’izay dia nidina nandry tao ambany indrindra tao amin’ilay sambo ka renoky ny torimaso.

⁶Dia nankao aminy ny kapitenin-tsambo ka niteny taminy hoe: Endre ity ianao renoky ny torimaso foana eto! Mitsangàna ka antsoy ny Andriamanitrao! Angamba mba hihevitra antsika Izy ka tsy ho faty isika.

⁷Dia nifampiresaka izy ireo hoe: Andeha isika hanao antsapaka mba hizahantsika izay mahatonga izao loza izao amintsika. Dia nanao antsapaka ry zareo ka i Jona no voatondro.

⁸Dia hoy ireo taminy: Miangavy anao izahay, lazao aminay: Noho ny amin’iza moa no mahatonga izao loza izao amintsika? Inona no raharaha fanaonao? Ary avy taiza ianao? Aiza no taninao? Ary avy amin’ny firenen’iza ianao?

⁹Dia hoy ny navaliny azy ireo: Hebreo aho; ary NY TOMPO, Andriamanitry ny lanitra, no ivavahako; dia izay nanao ny ranomasina sy ny tany maina.

¹⁰Dia raiki-tahotra indrindra ny olona ka niteny taminy hoe: Adray izato ataonao izato! Satria fantany fa nandositra hanalavitra NY TOMPO izy, fa efa nambarany taminy izany.

¹¹Dia hoy ireo taminy: Hataonay ahoana ary ianao mba hahatony ny ranomasina aminay? Fa mbola nihananonja ihany ny ranomasina.

¹²Ary hoy izy tamin’ireo: Batao aho ka atsipazo any anatin’ny ranomasina hahatony ny ranomasina aminareo; fa fantatro fa noho ny amiko no mahatonga izao onja mahery izao aminareo.

¹³Nefa dia mbola nivoy mafy ny olona mba hamerina ny sambo ho amin’ny tany maina, tsy todiny anefa izany fa mbola nihananonja mafy taminy ihany ny ranomasina.

¹⁴Dia nitaraina tamin’NY TOMPO izy ireo hoe: Mifona aminao izahay, TOMPO ô! Aoka tsy ho faty izahay noho ny amin’ny ain’ity lehilahy ity, ary aza atao ho mpandatsaka ny ran’ny tsy manan-tsiny izahay; fa Ianao, TOMPO ô, efa nanatanteraka izay sitraky ny fonao.

¹⁵Dia nobatain’izy ireo i Jona ka natsipiny tany anatin’ny ranomasina; dia nitsahatra ny fisafoaky ny ranomasina.

¹⁶Ary natahotra indrindra NY TOMPO ireo olona ireo ka namono zavatra hatao fanatitra ho an’NY TOMPO sady nanao voady.