Read La Bible en Malgache Nomery 1 Bible Online

Nomery 1 - La Bible en Malgache bible

Nomery 1

¹Ary NY TOMPO niteny tamin’i Mosesy tany an-tany efitr’i Sinay, tao amin’ny tranolay fihaonana*, tamin’ny andro voalohany tamin’ny volana faharoa, tamin’ny taona faharoa taorianan’ny nivoahan’ny Zanak’Israely avy tany amin’ny tany Ejipta. Hoy NY TOMPO taminy:

²Alao isa ny fiangonan’ny Zanak’Israely manontolo, araka ny fokony sy ny fianakaviany avy, ary araka ny anaran’ny lehilahy tsirairay,

³dia ny lehilahy rehetra hatramin’ny roapolo taona no ho miakatra, dia izay rehetra azo alefa hanafika amin’ny Israely. Handamina azy araka ny antokony avy ianao sy i Arona.

⁴Aoka hisy lehilahy iray avy isam-poko ho namanareo, dia izay samy lohan’ny fianakaviany avy.

⁵Toy izao avy ny anaran’ireo lehilahy ho namanareo ireo. Ny avy amin’i Robena dia i Elizora, zanak’i Sedeora;

⁶ny avy amin’i Simeona dia i Selomiela, zanak’i Zorisaday;

⁷ny avy amin’i Joda dia i Nasona, zanak’i Aminadaba;

⁸ny avy amin’Isakara dia i Netanela, zanak’i Zoara;

⁹ny avy amin’i Zebolona dia i Eliaba, zanak’i Helona;

¹⁰ny avy amin’ny zanak’i Josefa kosa: Ny avy amin’i Efraima dia i Elisama, zanak’i Amihoda, ary ny avy amin’i Manase dia i Gamaliela, zanak’i Pedazora;

¹¹ny avy amin’i Benjamina dia i Abidana, zanak’i Gideony;

¹²ny avy amin’i Dana dia i Ahiezera, zanak’i Amisaday;

¹³ny avy amin’i Asera dia i Pagiela, zanak’i Okrana;

¹⁴ny avy amin’i Gada dia i Eliasafa, zanak’i Deoela;

¹⁵ny avy amin’i Naftaly dia i Ahira, zanak’i Enana.

¹⁶Ireo no voaantso teo amin’ny fiangonana, samy lohan’ny fokony avy sady mpifehy arivo amin’ny Israely.

¹⁷Ary naka ireo olona voatonona anarana ireo i Mosesy sy i Arona

¹⁸dia namory ny fiangonana manontolo tamin’ny andro voalohany tamin’ny volana faharoa. Samy nampanoratra ny firazanany avy izy, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra.

¹⁹Araka izay nandidian’NY TOMPO an’i Mosesy no nandaminany azy tany amin’ny tany efitr’i Sinay.

²⁰Dimanjato sy enina arivo sy efatra alina ny avy tamin’ny taranak’i Robena, lahimatoan’Israely, araka ny fokony sy ny fianakaviany, ary araka ny anarany tsirairay, dia ny lehilahy rehetra hatramin’ny roapolo taona no ho miakatra izay azo alefa hanafika,

²¹ary voaisa avy tamin’ny fokon’i Robena.

²²Tamin’ny taranak’i Simeona, araka ny fokony sy ny fianakaviany, dia izay rehetra voaisa, araka ny anaran’ny tsirairay, dia ny lehilahy rehetra hatramin’ny roapolo taona no ho miakatra, izay azo alefa hanafika,

²³izay voaisa avy tamin’ny fokon’i Simeona dia telonjato sy sivy arivo sy dimy alina.

²⁴Tamin’ny taranak’i Gada, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

²⁵izay voaisa avy tamin’ny fokon’i Gada kosa dia dimampolo sy eninjato sy dimy arivo sy efatra alina.

²⁶Tamin’ny taranak’i Joda, araka ny fokony sy ny fianakaviany, ary araka ny anarany tsirairay hatramin’ny roapolo taona no ho miakatra, dia izay rehetra azo alefa hanafika,

²⁷izay voaisa avy tamin’ny fokon’i Joda dia eninjato sy efatra arivo sy fito alina.

²⁸Tamin’ny taranak’Isakara, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

²⁹izay voaisa avy tamin’ny fokon’Isakara dia efajato sy efatra arivo sy dimy alina.

³⁰Tamin’ny taranak’i Zebolona, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

³¹ny voaisa avy tamin’ny fokon’i Zebolona dia efajato sy fito arivo sy dimy alina.

³²Tamin’ny taranak’i Josefa: Avy tamin’ny taranak’i Efraima, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

³³izay voaisa avy tamin’ny fokon’i Efraima dia dimanjato sy efatra alina.

³⁴Tamin’ny taranak’i Manase, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

³⁵izay voaisa avy tamin’ny fokon’i Manase dia roanjato sy telo arivo sy telo alina.

³⁶Tamin’ny taranak’i Benjamina, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

³⁷izay voaisa avy tamin’ny fokon’i Benjamina dia efajato sy dimy arivo sy telo alina.

³⁸Tamin’ny taranak’i Dana, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

³⁹izay voaisa avy tamin’ny fokon’i Dana dia fitonjato sy roa arivo sy enina alina.

⁴⁰Tamin’ny taranak’i Asera, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

⁴¹izay voaisa avy tamin’ny fokon’i Asera dia dimanjato sy arivo sy efatra alina.

⁴²Tamin’ny taranak’i Naftaly, araka ny fokony sy ny fianakaviany, ary araka ny anarany tsirairay, hatramin’ny roapolo taona no ho miakatra, dia izay rehetra azo alefa hanafika,

⁴³izay voaisa avy tamin’ny fokon’i Naftaly dia efajato sy telo arivo sy dimy alina.

⁴⁴Ireo no voaisan’i Mosesy sy i Arona ary ireo mpifehy roa amby folo lahy tamin’ny Israely, izay samy lohan’ny fianakaviany avy.

⁴⁵Ary izay rehetra voaisa avy tamin’ny Zanak’Israely araka ny fianakaviany, hatramin’ny roapolo taona no ho miakatra, dia izay rehetra azo alefa hanafika avy amin’ny Israely,

⁴⁶izay rehetra voaisa dia dimampolo sy dimanjato sy telo arivo sy enina hetsy.

⁴⁷Tsy mba nisaina tao anatin’ireo kosa ny levita*, araka ny fokony.

⁴⁸Hoy NY TOMPO tamin’i Mosesy:

⁴⁹Ny fokon’ny levita* ihany no aza isaina, aza mba alaina isa miaraka amin’ny Zanak’Israely izy ireo.

⁵⁰Fa tendreonao ny levita hitandrina ny tabernakelin’ny Vavolombelona sy ny fanaka rehetra ary ny zavatra rehetra izay momba azy. Izy ireo no hitondra ny tabernakely* sy ny zavatra rehetra, ary izy ireo no hanao fanompoana ao; manodidina ny tabernakely no hitobiany.

⁵¹Rehefa hiainga ny tabernakely dia ny levita no handrava azy; rehefa mijanona ny tabernakely dia ny levita no hanangana azy indray; fa raha olon-kafa no manakaiky dia hovonoina izy.

⁵²Dia hitoby ny Zanak’Israely, samy eo amin’ny tobiny avy, samy eo amin’ny fanevany avy, araka ny antokony.

⁵³Fa ny levita kosa dia hitoby manodidina ny tabernakelin’ny Vavolombelona, mba tsy hisy fahatezerana hahatratra ny fiangonan’ny Zanak’Israely; ny levita dia hitandrina ny anjara raharaha momba ny tabernakelin’ny Vavolombelona

⁵⁴Dia nataon’ny Zanak’Israely izany. Araka izay rehetra nandidian’NY TOMPO an’i Mosesy no nataony.