Read La Bible en Malgache Nomery 10 Bible Online

Nomery 10 - La Bible en Malgache bible

Nomery 10

¹Hoy NY TOMPO tamin’i Mosesy:

²Manaova trompetra volafotsy roa; voatefy no hanaovanao azy. Ho fiantsoanao ny fiangonana sy ho fampiainganao ny toby ireo.

³Rehefa tsofina ireo dia hivory eo aminao, eo anoloan’ny varavaran’ny tranolay fihaonana*, ny fiangonana manontolo.

⁴Fa raha ny iray ihany no tsofina dia ireo lohan’ny foko izay mpifehy arivo amin’ny Israely ihany no hivory eo aminao.

⁵Fa rehefa mitsoka ho fanairana ianareo dia hiainga ny toby izay milasy eo atsinanana.

⁶Rehefa mitsoka ny fanairana fanindroany ianareo dia hiainga ny toby izay milasy eo atsimo; fanairana no hatao fiaingany.

⁷Fa raha hamory ny fiangonana kosa ianareo dia hitsoka fotsiny fa tsy hanao fanairana.

⁸Ny mpisorona, zanak’i Arona, no hitsoka ny trompetra. Ho lalàna maharitra ho anareo hatramin’ny taranakareo fara aman-dimby izany.

⁹Ary raha misy ady eo amin’ny taninareo ka mandeha hiady amin’ny fahavalo izay mampahory anareo ianareo dia hitsoka ireo trompetra ireo ho fanairana ianareo dia hotsarovana eo anatrehan’NY TOMPO Andriamanitrareo ianareo ka hovonjena amin’ny fahavalonareo.

¹⁰Amin’ny andro fifalianareo sy amin’ny fotoam-pivavahanareo ary amin’ny voaloham-bolanareo no hitsofanareo ny trompetra, raha manao ny fanatitra dorana manontolo sy ny fanati-pihavanana ho fampahatsiarovana ho anareo ianareo eo anatrehan’Andriamanitrareo, satria Izaho no TOMPO Andriamanitrareo.

¹¹Tamin’ny andro faharoapolo tamin’ny volana faharoa, tamin’ny taona faharoa, no niakaran’ny rahona niala teo ambonin’ny tabernakelin’ny Vavolombelona.

¹²Dia niainga tany an-tany efitr’i Sinay ny Zanak’Israely ka nandroso, ary ny rahona dia nijanona tany amin’ny tany efitra Parana.

¹³Dia izany no niaingany voalohany araka ny didin’NY TOMPO izay nampitondrainy an’i Mosesy.

¹⁴Ny fanevan’ny tobin’ny taranak’i Joda no niainga voalohany, araka ny antokony. Ny mpifehy ny antokony dia i Nasona, zanak’i Aminadaba.

¹⁵Ny mpifehy ny antokon’ny taranak’Isakara dia i Netanela, zanak’i Zoara.

¹⁶Ny mpifehy ny antokon’ny taranak’i Zebolona dia i Eliaba, zanak’i Helona.

¹⁷Dia nahorona ny tabernakely* ka niainga ny taranak’i Gersona sy ny taranak’i Merary, nitondra ny tabernakely.

¹⁸Niainga indray ny fanevan’ny tobin’i Robena araka ny antokony; ny mpifehy ny antokony dia i Elizora, zanak’i Sedeora.

¹⁹Ny mpifehy ny antokon’ny zanak’i Simeona dia i Selomiela, zanak’i Zorisaday.

²⁰Ny mpifehy ny antokon’ny taranak’i Gada dia i Eliasafa, zanak’i Deoela.

²¹Dia niainga ny Kehatita, nitondra ny fitoerana masina; ary nisy nanangana ny tabernakely mandra-piavin’ireo.

²²Niainga koa ny fanevan’ny tobin’ny taranak’i Efraima, araka ny antokony; ary ny mpifehy ny antokony dia i Elisama, zanak’i Amihoda.

²³Ny mpifehy ny antokon’ny taranak’i Manase dia i Gamaliela, zanak’i Pedazora.

²⁴Ny mpifehy ny antokon’ny taranak’i Benjamina dia i Abidana, zanak’i Gideony.

²⁵Dia niainga ny fanevan’ny tobin’ny taranak’i Dana, izay vodilalan’ny toby rehetra, araka ny antokony; ary ny mpifehy ny antokony dia i Ahiezera, zanak’i Amisaday.

²⁶Ny mpifehy ny antokon’ny taranak’i Asera dia i Pagiela, zanak’i Okrana.

²⁷Ary ny mpifehy ny antokon’ny taranak’i Naftaly dia i Ahira, zanak’i Enana.

²⁸Izany filaharana izany no niaingan’ny Zanak’Israely, araka ny antokony avy. Dia niainga izy.

²⁹Dia hoy i Mosesy tamin’i Hobaba, zanak’i Regoela ilay Midianita, rafozan’i Mosesy: Izahay izao dia miainga hankany amin’ny tany izay nolazain’NY TOMPO hoe: Homeko anareo izany. Andeha ianao hiaraka aminay dia hasianay soa; fa NY TOMPO efa nilaza soa ny amin’ny Israely.

³⁰Fa hoy kosa izy taminy: Tsy handeha aho; fa ho any amin’ny taniko sy ny havako aho.

³¹Dia hoy i Mosesy: Aza ilaozanao re izahay; fa fantatrao izay toerana tokony hitobianay atỳ an-tany efitra ka ianao no ho masonay.

³²Ary raha miaraka aminay ianao dia izay soa hataon’NY TOMPO aminay no hataonay aminao.

³³Dia niainga avy tany amin’ny tendrombohitry NY TOMPO izy ireo ka nandeha lalan-kateloana; ary ny vata misy ny faneken’NY TOMPO dia nandroso nialoha azy lalan-kateloana mba hitady toerana hialan-tsasatra ho an’ny olona.

³⁴Ary ny rahon’NY TOMPO dia teo amboniny nony andro, tamin’ny niaingany niala tamin’ny nitobiany.

³⁵Rehefa niainga ny vata misy ny Fanekena* dia hoy i Mosesy: Mitsangàna, TOMPO ô! Aoka hiely ny fahavalonao! Aoka handositra ny tavanao izay mankahala Anao!

³⁶Rehefa nijanona kosa ny vata misy ny Vavolombelona dia hoy izy: Miverena, TOMPO ô, ho amin’ny Israely tsy omby alinalina!