Read La Bible en Malgache Nomery 12 Bible Online

Nomery 12 - La Bible en Malgache bible

Nomery 12

¹Ary i Miriama sy i Arona dia niteny nanome tsiny an’i Mosesy noho ny vehivavy kosita izay nampakariny; fa efa nampakatra vehivavy kosita izy.

²Hoy izy mianadahy: Moa i Mosesy ihany va no nitenenan’NY TOMPO fa tsy izahay koa mba nitenenany? Dia ren’NY TOMPO izany.

³I Mosesy anefa dia lehilahy malemy fanahy mihoatra noho ny olona rehetra etỳ ambonin’ny tany.

⁴Ary NY TOMPO niteny tampoka tamin’i Mosesy sy i Arona ary i Miriama hoe: Mivoaha ho any amin’ny tranolay fihaonana ianareo telo mianadahy. Dia nivoaka ny toby izy telo mianadahy.

⁵Ary nidina tamin’ny andry rahona NY TOMPO ka nijoro teo am-baravaran’ny tranolay; dia niantso an’i Arona sy i Miriama Izy ka nivoaka ny toby izy mianadahy.

⁶Dia hoy Izy: Mba henoy ny teniko! Raha misy mpaminanin’NY TOMPO eo aminareo dia amin’ny fahitana no ampahafantarako ny tenako aminy, ary amin’ny nofy no itenenako aminy.

⁷Fa tsy toy izany kosa i Mosesy mpanompoko izay mahatoky amin’ny tranoko manontolo.

⁸Mifanatrika no itenenako aminy, amin’ny teny mazava fa tsy amin’ny ankamantatra ary mandinika ny endriky NY TOMPO mihitsy izy. Koa nahoana ianareo no tsy matahotra hanome tsiny an’i Mosesy mpanompoko?

⁹Dia nirehitra tamin’izy mianadahy ny fahatezeran’NY TOMPO ary lasa Izy.

¹⁰Ary ny rahona dia niala tamin’ny tranolay; ary indro, tonga boka i Miriama ka fotsy tahaka ny orampanala. Ary nijery an’i Miriama i Arona ka indro fa lasa boka ny anabaviny.

¹¹Ary hoy i Arona tamin’i Mosesy: Indrisy, tompoko, mifona aminao re, aza atao ho helokay ny nanaovanay hadalana sy ny nanotanay.

¹²Aza dia avela ho toy ny zaza maty vao teraka izy ka lany sahady ny antsasaky ny nofony.

¹³Dia nitaraina tamin’NY TOMPO i Mosesy hoe: Andriamanitra ô, mifona aminao aho mba sitrano re izy!

¹⁴Hoy NY TOMPO tamin’i Mosesy: Raha nandrora tamin’ny tavany ny rainy, moa tsy ho afa-baraka hafitoana va izy? Koa atokana any ivelan’ny toby mandritra ny hafitoana izy, ary rehefa afaka izany, izay vao hiverina indray izy.

¹⁵Dia natokana tany ivelan’ny toby hafitoana i Miriama; ary tsy niainga ny olona raha tsy efa tafaverina i Miriama.

¹⁶Rehefa afaka izany vao niainga niala tany Hazerota ny olona ka nitoby tany an-tany efitra Parana.