Read La Bible en Malgache Nomery 13 Bible Online

Nomery 13 - La Bible en Malgache bible

Nomery 13

¹Ary NY TOMPO niteny tamin’i Mosesy hoe:

²Maniraha lehilahy vitsivitsy hisafo ny tany Kanana izay omeko ho an’ny Zanak’Israely. Lehilahy iray avy amin’ny fokony avy no hirahinareo, koa izay samy lehiben’ny fokony avy.

³Ary nandefa azy ireo avy tao an-tany efitra Parana i Mosesy, araka ny didin’NY TOMPO; ary samy lehiben’ny Zanak’Israely ireo lehilahy rehetra ireo.

⁴Ireto ny anarany: Avy tamin’ny fokon’i Robena, i Samoa, zanak’i Zakora;

⁵avy tamin’ny fokon’i Simeona, i Safata, zanak’i Hory;

⁶avy tamin’ny fokon’i Joda, i Kaleba, zanak’i Jefone;

⁷avy tamin’ny fokon’i Isakara, i Jigala, zanak’i Josefa;

⁸avy tamin’ny fokon’i Efraima, i Hosea, zanak’i Nona;

⁹avy tamin’ny fokon’i Benjamina, i Palty, zanak’i Rafo;

¹⁰avy tamin’ny fokon’i Zebolona, i Gadiela, zanak’i Sody;

¹¹avy tamin’ny fokon’i Josefa, tamin’ny fokon’i Manase, i Gady, zanak’i Sosy;

¹²avy tamin’ny fokon’i Dana, i Amiela, zanak’i Gemaly;

¹³avy tamin’ny fokon’i Asera, i Setora, zanak’i Mikaela;

¹⁴avy tamin’ny fokon’i Naftaly, i Naby, zanak’i Vofsy;

¹⁵avy tamin’ny fokon’i Gada, i Geoela, zanak’i Makỳ.

¹⁶Ireo no anaran’ny lehilahy izay nirahin’i Mosesy hisafo ny tany. Ary i Hosea, zanak’i Nona, dia nataon’i Mosesy hoe Josoa.

¹⁷Nandefa azy ireo hisafo ny tany Kanana i Mosesy ka niteny taminy hoe: Miakara mandalo eto amin’ny Negeva, ary avy eo, miakara any amin’ny tany be havoana;

¹⁸dia zahao izay toetry ny tany sy izay olona monina any, na mahery izy na osa, na vitsy izy na maro;

¹⁹jereo izay toetry ny tany itoerany, na tsara na ratsy; ary ny toetry ny tanàna izay itoerany, na an-day izany na an-tanàna mimanda;

²⁰fantaro ny toetry ny tany, na lonaka, na ngazana, na misy hazo eo na tsia; dia mahereza ianareo ka mitondrà avy amin’ny vokatry ny tany. Fa fotoana fahamasahan’ny voaloboka mialin-taona tamin’izany.

²¹Dia niakatra ireo ka nisafo ny tany hatramin’ny tany efitra Zina ka hatrany Rehoba, any akaikin’i Hamata.

²²Niakatra nandalo ny Negeva izy ireo ka nankany Hebrona izay nisy an’i Ahimana sy i Sesay ary i Talmay, taranaky ny Anakita. I Hebrona dia voaorina fito taona talohan’i Zoana any Ejipta.

²³Dia tonga hatrany amin’ny lohasaha Eskola izy ireo ka tany no nanapaka sampam-boaloboka izay nisy sampahony iray ihany, ary nolanjain’ny roalahy tamin’ny bao izany; nitondrany mody koa ny ampongabendanitra sy ny aviavy.

²⁴Ary izany toerana izany dia nataony hoe Ny Lohasaha Eskola[4], noho ny sampahom-boaloboka izay notapahin’ny Zanak’Israely tao.

²⁵Rehefa afaka efapolo andro dia niverina avy nisafo ny tany izy ireo.

²⁶Dia nandeha izy ireo nankeo amin’i Mosesy sy i Arona ary ny fiangonana, dia ny Zanak’Israely manontolo, tany an-tany efitra Parana, tany Kadesy, ka nitondra teny taminy sy tamin’ny fiangonana manontolo sady naneho azy ny vokatry ny tany.

²⁷Nitantara taminy izy ireo hoe: Tonga tany amin’ny tany izay nanirahanao anay izahay. Tena tondra-dronono sy tantely tokoa izany, ary itony no vokatra avy tany.

²⁸Kanefa kosa mahery ny olona izay monina eo amin’ny tany, ary ny tanàna dia mimanda sady lehibe dia lehibe; ary hitanay tany koa aza ireo taranaky ny Anakita.

²⁹Ny Amalekita no monina any amin’ny Negeva; ny Hetita sy ny Jebosita ary ny Amorita no monina any amin’ny tany be havoana; ny Kananita no monina any amoron’ny ranomasina sy any amoron’i Jordana.

³⁰Fa nampangina ny olona teo anatrehan’i Mosesy i Kaleba ka niteny hoe: Tsy maintsy miakatra isika ka handray ny tany fa tsy maintsy ho resintsika izy!

³¹Fa hoy kosa ireo lehilahy izay niara-niakatra taminy: Tsy afa-miakatra handresy ireo olona ireo isika satria mahery noho isika izy.

³²Dia nilaza ratsy ny tany izay nosafoiny tamin’ny Zanak’Israely izy ireo ka niteny hoe: Ny tany izay nalehanay mba hosafoina dia tany mihinana izay monina ao ary ny olona rehetra izay hitanay tao dia olona vaventy be;

³³hitanay tany koa ny Nefilima izay taranaky ny Anakita avy amin’ny Nefilima; teo imasonay izahay dia nahatsiaro ho tahaka ny tsingetana; toy izany koa izahay teo imasony!