Read La Bible en Malgache Nomery 15 Bible Online

Nomery 15 - La Bible en Malgache bible

Nomery 15

¹Ary hoy NY TOMPO tamin’i Mosesy: Mitenena amin’ny Zanak’Israely hoe:

²Rehefa tonga any amin’ny tany honenanareo izay omeko anareo ianareo

³ka manolotra fanatitra levonina amin’ny afo ho an’NY TOMPO, na omby na ondry aman’osy hatao fanatitra dorana manontolo na fanatitra hafa alatsa-dra hanalana voady, na an-tsitrapo na amin’ny fotoam-piangonanareo, hanaovana hanitra ankasitrahana ho an’NY TOMPO

⁴izay manolotra ny fanatiny ho an’NY TOMPO dia hanolotra fanatitra avy amin’ny zavamaniry koa, dia koba tsara toto ampahafolon’ny efaha*, voaharo diloilo ampahefatry ny hina*;

⁵ary divay ampahefatry ny hina hatao fanatitra aidina no hampombainareo ny fanatitra dorana manontolo, na ny fanatitra hafa alatsa-dra, miaraka amin’ny zanak’ondry tsirairay.

⁶Ho fanampin’ny ondrilahy iray dia koba tsara toto roa ampahafolon’ny efaha, voaharo diloilo ampahatelon’ny hina, no haterinao ho fanatitra avy amin’ny zavamaniry;

⁷ary divay ampahatelon’ny hina no haterinao ho fanatitra aidina, ho hanitra ankasitrahana ho an’NY TOMPO.

⁸Ary raha manolotra omby ho fanatitra dorana manontolo na ho fanatitra hafa alatsa-dra, hanalana voady, na ho fanati-pihavanana ho an’NY TOMPO ianao,

⁹dia fanatitra avy amin’ny zavamaniry koa no hatolotrao ho fanampin’ny omby iray, dia koba tsara toto telo ampahafolon’ny efaha, voaharo diloilo antsasaky ny hina;

¹⁰ary divay antsasaky ny hina no hatolotrao ho fanatitra aidina, ho fanatitra levonina amin’ny afo, ho hanitra ankasitrahana ho an’NY TOMPO.

¹¹Izany no ampombaina ny omby tsirairay, na ny ondrilahy tsirairay, na ny zanak’ondry tsirairay, na ny zanak’osy tsirairay.

¹²Tahaka izany no hataonareo amin’izy rehetra, araka ny isan’ny zavatra atolotrareo.

¹³Ny tompon-tany rehetra dia samy hanao ireo zavatra ireo araka izany, raha manolotra fanatitra levonina amin’ny afo ho hanitra ankasitrahana ho an’NY TOMPO izy.

¹⁴Ary raha misy mpifindra monina eo aminareo, na olona miara-mitoetra aminareo, hatramin’ny taranakareo fara aman-dimby, ka manolotra fanatitra levonina amin’ny afo ho hanitra ankasitrahana ho an’NY TOMPO izy, dia araka izay ataonareo no hataony.

¹⁵Ary ny amin’ny fiangonana dia lalàna iray ihany no ho aminareo sy izay mpifindra monina eo aminareo koa, dia lalàna maharitra hatramin’ny taranakareo fara aman-dimby izany; tsy hisy hafa eo anatrehan’NY TOMPO na ianareo na ny mpifindra monina.

¹⁶Lalàna iray ihany sy fanao iray ihany no ho aminareo sy izay vahiny eo aminareo.

¹⁷Ary hoy NY TOMPO tamin’i Mosesy:

¹⁸Mitenena amin’ny Zanak’Israely hoe: Rehefa tonga any amin’ny tany izay itondrako anareo ianareo

¹⁹ka hihinana mofo avy amin’ny vokatry ny tany dia atokàny izay ho an’NY TOMPO.

²⁰Hanokana mofo iray izay hatao amin’ny voalohan’ny kobanareo voafetafeta ianareo; tahaka izay atokana avy eo amin’ny famoloana no hanokananareo izany.

²¹Ny voalohan’ny kobanareo voafetafeta dia hanomezanareo ho an’NY TOMPO hatramin’ny taranakareo fara aman-dimby.

²²Raha manota tsy nahy ianareo ka tsy nahatanteraka ireo didy rehetra ireo, izay nolazain’NY TOMPO tamin’i Mosesy,

²³dia izay rehetra nandidian’NY TOMPO anareo tamin’ny alalan’i Mosesy, hatramin’ny andro izay nanaovan’NY TOMPO izany didy izany ka hatramin’ny taranakareo fara aman-dimby,

²⁴ary natao tsy nahy izany ota izany ka tsy fantatry ny fiangonana, dia hanatitra vantotra ombilahy iray ny fiangonana manontolo ho fanatitra dorana manontolo, ho hanitra ankasitrahana ho an’NY TOMPO, mbamin’ny fanatitra avy amin’ny zavamaniry sy ny fanatitra aidina ampombaina azy, araka ny fanao, ary osilahy iray ho fanatitra noho ny ota.

²⁵Ary ny mpisorona dia hanao fanavotana ho an’ny fiangonan’ny Zanak’Israely manontolo ka havela ny helony satria natao tsy nahy izany; hanolotra ny fanatiny izy, dia fanatitra levonina amin’ny afo ho an’NY TOMPO sy ny fanatiny, eo anatrehan’NY TOMPO, noho ny ota tsy nahy nataony.

²⁶Dia havela ny heloky ny fiangonan’ny Zanak’Israely manontolo, mbamin’izay mpifindra monina eo aminy; fa nahazo ny olona rehetra izany noho ny ota tsy nahy.

²⁷Ary raha olona iray kosa no manota tsy nahy dia hanatitra osivavy iray izay iray taona izy ho fanatitra noho ny ota.

²⁸Ary ny mpisorona dia hanao fanavotana ho an’ny olona izay nanota tsy nahy eo anatrehan’NY TOMPO ka havela ny helony.

²⁹Lalàna iray ihany no hatao amin’izay manota tsy nahy, na amin’ny tompon-tany eo amin’ny Zanak’Israely izany, na amin’ny mpifindra monina eo aminareo.

³⁰Fa ny olona izay manota amin’ny fanahy iniana kosa, na tompon-tany na mpifindra monina, dia manamavo NY TOMPO izy ka hofongorana tsy ho amin’ny fireneny.

³¹Fa ny tenin’NY TOMPO no nohamavoiny ary ny lalànany no nodikainy, dia hofongorana tokoa izany olona izany; ary ny helony dia ho aminy ihany.

³²Raha tany an-tany efitra ny Zanak’Israely dia nisy lehilahy iray tratra nanangona kitay hazo tamin’ny andro Sabata.

³³Ary ireo nahita azy nanangona kitay dia nitondra azy teo amin’i Mosesy sy i Arona ary ny fiangonana manontolo.

³⁴Dia nambenana Ralehilahy satria tsy mbola fantatra mazava izay hatao aminy.

³⁵Ary hoy NY TOMPO tamin’i Mosesy: Hovonoina ho faty izany lehilahy izany; hitora-bato azy eny ivelan’ny toby ny fiangonana manontolo.

³⁶Dia namoaka azy ho eny ivelan’ny toby ny fiangonana manontolo ka nitora-bato azy, dia maty izy, araka izay nandidian’NY TOMPO an’i Mosesy ihany.

³⁷Ary NY TOMPO niteny tamin’i Mosesy hoe:

³⁸Mitenena amin’ny Zanak’Israely ka asaivo asiany morontongony ny sisin’ny fitafiany, hatramin’ny taranany fara aman-dimby; aoka hasiany kofehy manga eo amin’io morontongotr’akanjony io.

³⁹Ho toy izany ny morontongotr’akanjonareo, koa rehefa jerenareo izany dia hotsarovanareo sy hankatoavinareo ny didin’NY TOMPO rehetra; ary tsy handeha araka ny fonareo ianareo, na araka ny masonareo, izay andehananareo hijangajangana.

⁴⁰Hotsarovanareo sy hankatoavinareo ny didiko rehetra ka ho masina ho an’Andriamanitrareo ianareo.

⁴¹Izaho no TOMPO Andriamanitrareo izay nitondra anareo nivoaka avy tany amin’ny tany Ejipta mba ho Andriamanitrareo. Izaho no TOMPO Andriamanitrareo.