Read La Bible en Malgache Nomery 16 Bible Online

Nomery 16 - La Bible en Malgache bible

Nomery 16

¹Ary nitsangana nanohitra an’i Mosesy i Kora, zanak’i Jizara, zanak’i Kehata, zanak’i Levy sy i Datana, ary i Abirama, zanak’i Eliaba, sy i Ona, zanak’i Peleta, izay samy taranak’i Robena,

²niaraka tamin’ny dimampolo sy roanjato lahy tamin’ny Zanak’Israely, izay samy lohan’ny fiangonana avokoa, dia olona izay voaantso teo amin’ny fiangonana sady nanan-daza.

³Nitambatra hikomy tamin’i Mosesy sy i Arona izy ireo ka niteny taminy hoe: Ampy izay! Masina ny fiangonana manontolo, sady NY TOMPO no eo aminy. Koa nahoana ianareo no dia manandra-tena ho ambonin’ny fiangonan’NY TOMPO?

⁴Raha nandre izany i Mosesy dia niankohoka tamin’ny tany

⁵ka niteny tamin’i Kora sy ireo namany rehetra hoe: Rahampitso dia hasehon’NY TOMPO izay Azy sy izay masina ka havelany hanakaiky Azy; koa izay fidiny no havelany hanakaiky Azy.

⁶Izao no ataovy, ry Kora sy ianareo antokony rehetra: Mitondrà fitondrana afo, rahampitso,

⁷dia asio afo ao anatiny ka asio ditin-kazo manitra eo aminy, eo anatrehan’NY TOMPO; koa ny lehilahy izay fidin’NY TOMPO, dia izy no ho masina. Fa ampy izay, ry taranak’i Levy!

⁸Dia hoy koa i Mosesy tamin’i Kora: Henoy, ry taranak’i Levy:

⁹Moa ataonareo ho zavatra kely va ny nanavahan’Andriamanitr’Israely anareo tamin’ny fiangonan’ny Israely ka namelany anareo hanakaiky Azy mba hanaovanareo ny fanompoana momba ny tabernakelin’NY TOMPO sy hijoroanareo eo anatrehan’ny fiangonana hanompo azy?

¹⁰Navelany hanakaiky Azy ianao sy ireo rahalahinao taranak’i Levy rehetra miaraka aminao, dia mbola mitady ho mpisorona mihitsy koa va ianareo?

¹¹Izany no niraisanao hevitra tamin’ny namanao rehetra mba hikomy amin’NY TOMPO! Fa i Arona moa no inona no imonomononanareo?

¹²Ary i Mosesy dia nampiantso an’i Datana sy i Abirama, zanak’i Eliaba. Hoy anefa izy roa lahy: Tsy hiakatra izahay!

¹³Moa zavatra kely va ny nitondranao anay niakatra niala tany amin’ny tany tondra-dronono sy tantely ka hahafaty anay atỳ an-tany efitra atỳ no dia milaza anao ho lehibenay koa ianao?

¹⁴Ary ianao dia tsy nitondra anay akory ho any amin’izay tany tondra-dronono sy tantely na nanome anay saha sy tanim-boaloboka ho fanananay, koa hopotsirinao ary va ny mason’ireto lehilahy ireto? Tsy hiakatra izahay!

¹⁵Dia tezitra indrindra i Mosesy ka niteny tamin’NY TOMPO hoe: Aza mijery ny fanatiny akory Ianao. Tsy naka taminy aho na dia boriky iray akory aza ary tsy nanisy ratsy na dia tamin’ny iray aminy akory aza aho.

¹⁶Dia hoy i Mosesy tamin’i Kora: Aoka ianao sy ny antokonao rehetra ho tonga eo anatrehan’NY TOMPO rahampitso, dia ianao sy ireo namanao ary i Arona.

¹⁷Ary samia maka ny fitondrany afo avy ianareo rehetra ka asio ditin-kazo manitra ao anatiny ary samia mitondra ny fitondrany afo avy ianareo rehetra ho eo anatrehan’NY TOMPO, fitondrana afo dimampolo sy roanjato; ianao sy i Arona dia samy hitondra ny fitondrany afo avy.

¹⁸Ary samy nitondra ny fitondrany afo avy izy rehetra ka nanisy afo tao anatiny, dia nanisy ditin-kazo manitra teo amboniny; ary nijanona teo anoloan’ny varavaran’ny tranolay fihaonana* izy mbamin’i Mosesy sy i Arona.

¹⁹Ary nanangona ny antokony rehetra ho eo anoloan’ny varavaran’ny tranolay fihaonana i Kora mba hanohitra azy roa lahy. Tamin’izay dia niseho tamin’ny fiangonana manontolo ny voninahitry NY TOMPO.

²⁰Ary NY TOMPO niteny tamin’i Mosesy sy i Arona hoe:

²¹Mihataha amin’ity fiangonana ity ianareo handringanako azy amin’ny indray mipy maso monja.

²²Dia niankohoka tamin’ny tany izy roa lahy ka niteny hoe: Andriamanitra ô, Andriamanitry ny fanahin’ny nofo rehetra, olona iray no nanota dia ho tezitra amin’ny ny fiangonana manontolo va Ianao?

²³Ary hoy NY TOMPO tamin’i Mosesy:

²⁴Mitenena amin’ny fiangonana hoe: Mihataha tsy hanodidina ny tranolain’i Kora sy i Datana ary i Abirama.

²⁵Dia nitsangana i Mosesy ka nankeo amin’i Datana sy i Abirama; ary nanaraka azy ireo ny loholon’ny Israely.

²⁶Dia niteny tamin’ny fiangonana izy hoe: Mialà amin’ny tranolain’ireo olon-dratsy ireo ary aza mikasika izay rehetra azy akory, fandrao haringana noho ny fahotany rehetra koa ianareo.

²⁷Dia nihataka ny olona mba tsy ho eo akaikin’ny tranolain’i Kora sy i Datana ary i Abirama. Ary nivoaka i Datana sy i Abirama ka nijanona teo anoloan’ny varavaran’ny tranolainy, niaraka tamin’ny vadiny sy ireo zanany lahy ary ireo zanany madinika.

²⁸Dia hoy i Mosesy: Izao no hahafantaranareo fa NY TOMPO no naniraka ahy hanao ireny asa rehetra ireny, fa tsy avy tamin’ny saiko izany:

²⁹Raha maty toy ny fahafatesan’ny olona rehetra ireo olona ireo na mahazo famaliana sahala amin’ny olona rehetra dia tsy NY TOMPO no naniraka ahy.

³⁰Fa raha hanao zavatra vaovao kosa NY TOMPO ka hisokatra ny tany ary hitelina azy ireo mbamin’izay azy rehetra ary ho latsaka velona any amin’ny fitoeran’ny maty* izy dia ho fantatrareo fa efa nanamavo NY TOMPO ireo lehilahy ireo.

³¹Rehefa tapitra voalazany izay teny rehetra izay dia nivava ny tany izay teo ambanin’iretsy;

³²eny, nisokatra ny tany ka nitelina azy ireo sy ny ankohonany mbamin’ny olona rehetra izay an’i Kora ary ny fananany rehetra.

³³Dia nidina velona ho any amin’ny fitoeran’ny maty izy ireo mbamin’izay azy rehetra; nikatona taminy ny tany ka fongotra tsy ho eo amin’ny fiangonana intsony izy ireo.

³⁴Ary ny Israely rehetra izay nanodidina azy dia nandositra noho ny fidradradradrany; fa hoy izy ireo: Andrao hitelina antsika koa ny tany.

³⁵Ary nisy afo nivoaka avy tamin’NY TOMPO ka nandevona ireo lehilahy dimampolo sy roanjato izay nanatitra ditin-kazo manitra.