Read La Bible en Malgache Nomery 17 Bible Online

Nomery 17 - La Bible en Malgache bible

Nomery 17

¹Hoy NY TOMPO tamin’i Mosesy:

²Mitenena amin’i Eleazara, zanak’i Arona mpisorona, mba hesorina teo amin’ny afo ireo fitondrana afo ary aelezo lavitra ny afo fa masina ireny.

³Ary ny fitondrana afon’ireo mpanota nanimba tena ireo dia anefeo takelaka manify hapetaka amin’ny alitara, fa natolony teo anatrehan’NY TOMPO ireny ka tonga masina sady ho famantarana ho an’ny Zanak’Israely koa ireny.

⁴Ary nalain’i Eleazara mpisorona ireo fitondrana afo varahina izay nanoloran’ireo olona may ireo ka nofisahiny ho takelaka hapetaka amin’ny alitara

⁵ho fahatsiarovana ho an’ny Zanak’Israely mba tsy hisy olon-kafa, afa-tsy ny taranak’i Arona ihany, no hahazo manakaiky handoro ditin-kazo manitra eo anatrehan’NY TOMPO, fandrao ho tonga tahaka an’i Kora sy ireo antokony izy, araka ny tenin’NY TOMPO izay nampitondrainy an’i Mosesy.

⁶Nony ampitso dia nimonomonona tamin’i Mosesy sy i Arona ny fiangonana, dia ny Zanak’Israely manontolo, ka niteny hoe: Ianareo no nahafaty ny olon’NY TOMPO!

⁷Ary raha niangona nanohitra an’i Mosesy sy i Arona ny fiangonana dia nitodika nijery ny tranolay fihaonana* izy roa lahy ka indro, nanarona azy ny rahona ary niseho ny voninahitry NY TOMPO.

⁸Dia nankeo anoloan’ny tranolay fihaonana i Mosesy sy i Arona.

⁹Ary NY TOMPO niteny tamin’i Mosesy hoe:

¹⁰Mialà amin’io fiangonana io handringanako azy amin’ny indray mipy maso monja! Dia niankohoka tamin’ny tany izy roa lahy.

¹¹Hoy i Mosesy tamin’i Arona: Alao ny fitondrana afo dia asio afo avy eo amin’ny alitara izany ary asio ditin-kazo manitra ka ento haingana eo amin’ny fiangonana ary manaova fanavotana ho azy; fa efa mivoaka avy amin’NY TOMPO ny fahatezerana ary efa miantomboka ny areti-mandringana.

¹²Dia nalain’i Arona araka izay nandidian’i Mosesy izany ka nihazakazaka ho eo afovoan’ny fiangonana izy; ary indro, efa niantomboka teo amin’ny olona ny areti-mandringana. Dia nandoro ny ditin-kazo manitra teo izy ka nanao fanavotana ho an’ny olona.

¹³Dia nijanona teo anelanelan’ny maty sy ny velona izy ka nitsahatra ny areti-mandringana.

¹⁴Ary izay efa matin’ny areti-mandringana dia fitonjato sy efatra arivo sy iray alina, afa-tsy izay efa maty noho ny amin’i Kora.

¹⁵Ary niverina ho eo amin’i Mosesy teo anoloan’ny varavaran’ny tranolay fihaonana i Arona, dia nitsahatra ny areti-mandringana.

¹⁶Ary NY TOMPO niteny tamin’i Mosesy indray hoe:

¹⁷Mitenena amin’ny Zanak’Israely ka analao tehina iray avy araka ny fokony izy, koa ny lehiben’ny fokony rehetra araka ny fianakaviany avy no hanalana azy, dia tehina roa amby folo. Samy soraty eo amin’ny tehiny avy ny anaran’izy rehetra.

¹⁸Fa ny anaran’i Arona no hosoratanao amin’ny tehin’i Levy; fa tehina iray avy no ho an’ny lohan’ny fianakaviany.

¹⁹Dia hataonao ao amin’ny tranolay fihaonana* ireo, eo anoloan’ny Vavolombelona, izay ihaonako aminareo.

²⁰Ary ny tehin’ny lehilahy izay hofidiko dia hitsimoka ka hampanginiko ny fimonomononan’ny Zanak’Israely Amiko, izay imonomononany aminareo.

²¹Ary niteny tamin’ny Zanak’Israely i Mosesy ka samy nanatitra tehina iray avy teo aminy araka ny fianakaviany ary ny lohan’ny fokony, dia tehina roa amby folo; ary ny tehin’i Arona no teo afovoan’ireo tehiny ireo.

²²Dia napetrak’i Mosesy teo anatrehan’NY TOMPO, tao amin’ny tranolain’ny Vavolombelona, ireo tehina ireo.

²³Nony ampitso dia niditra tao amin’ny tranolain’ny Vavolombelona i Mosesy ary indro, nitsimoka tokoa ny tehin’i Arona, izay ho an’ny taranak’i Levy, dia nanaroka sy namony ka namoa amanda masaka.

²⁴Dia noentin’i Mosesy niala eo anatrehan’NY TOMPO ny tehina rehetra, ho eo amin’ny Zanak’Israely rehetra ka nijery izy ireo ary samy nandray ny tehiny avy.

²⁵Dia hoy NY TOMPO tamin’i Mosesy: Avereno ho eo anoloan’ny Vavolombelona ny tehin’i Arona, hotahirizina mba ho famantarana ho an’ireo taranaka mpikomy, dia hatsahatrao hiala Amiko ny fimonomononany mba tsy hahafaty azy ireo.

²⁶Dia notanterahin’i Mosesy izany; araka izay nandidian’NY TOMPO azy no nataony.

²⁷Dia niteny tamin’i Mosesy ny Zanak’Israely hoe: Indro, maty izahay, ringana izahay; eny, ringana avokoa izahay rehetra!

²⁸Ho faty izay rehetra manakaiky, dia izay manakaiky ny tabernakelin’NY TOMPO! Ho tapitra maty va izahay?