Read La Bible en Malgache Nomery 18 Bible Online

Nomery 18 - La Bible en Malgache bible

Nomery 18

¹Ary hoy NY TOMPO tamin’i Arona: Ianao sy ireo zanakao ary ny taranaky ny rainao miaraka aminao no hitondra ny heloky ny fitoerana masina; ary ianao sy ireo zanakao miaraka aminao no hitondra ny heloky ny fisoronanareo.

²Ary ireo rahalahinao avy amin’ny fokon’i Levy[5] izay fokon’ny razanao koa dia ento miaraka aminao mba hikambana aminao izy ireo ka hanompo anao; fa ianao sy ireo zanakao no ho eo anoloan’ny tranolain’ny Vavolombelona.

³Dia hitandrina ny anjara raharahanao sy ny anjara raharaha rehetra momba ny tranolay izy ireo; kanefa ny fanaky ny fitoerana masina sy ny alitara dia tsy mba hakaikeziny, fandrao ho faty izy ireo sy ny tenanareo koa.

⁴Dia hikambana aminao izy ireo ka hitandrina ny anjara raharaha momba ny tranolay fihaonana*, dia ny fanompoana rehetra momba ny tranolay. Tsy hisy olon-kafa hanakaiky anareo.

⁵Dia hotandremanareo ny anjara raharaha momba ny fitoerana masina sy ny anjara raharaha momba ny alitara mba tsy hisy fahatezerana hahazo ny Zanak’Israely intsony.

⁶Ary indro Aho efa naka ireo levita* rahalahinareo avy tamin’ny Zanak’Israely; omena anareo izy ireo ho fanomezana ho an’NY TOMPO mba hanao ny fanompoana momba ny tranolay fihaonana.

⁷Fa ianao sy ireo zanakao miaraka aminao kosa no hitandrina ny fisoronanareo ka hanompo ny amin’ny zavatra rehetra mikasika ny alitara sy ny ao anatin’ny efitra lamba satria fanompoana omeko anareo ny fisoronana. Ny olon-kafa izay manakaiky kosa dia hovonoina.

⁸Ary NY TOMPO niteny tamin’i Arona hoe: Indro Aho efa nanome ho anjaranao ny fitandremana ireo fanomezana ho Ahy, dia ireo zava-masina rehetra atolotry ny Zanak’Israely; efa nomeko ho anjaranao sy ireo zanakao izany ka ho lalàna maharitra.

⁹Izao no ho anao amin’ireo zavatra masina indrindra, avy amin’ny fanatitra izay tsy nolevonina tamin’ny afo: Ny fanatitra rehetra izay atolony ho fanatitra avy amin’ny zavamaniry sy ho fanatitra noho ny ota ary ho fanati-panonerana izay hanonerany ho Ahy; ho masina indrindra ho anao sy ireo zanakao izany.

¹⁰Amin’ireo zavatra masina indrindra no hihinananareo; ny lehilahy rehetra no mahazo mihinana azy; ho masina ho anao izany.

¹¹Izao koa no anjaranao: Ny anjara nalaina avy tamin’ny zavatra nomeny ho fanatitra dia ny fanatitra asandratra rehetra izay atolotry ny Zanak’Israely; efa nomeko ho anao sy ny zanakao lahy ary ny zanakao vavy koa izany ho lalàna maharitra. Izay rehetra madio amin’ny ankohonanao no mahazo mihinana izany.

¹²Izay rehetra tsara indrindra amin’ny diloilo sy ny ranom-boaloboka ary ny vary, dia ny voaloham-bokatra aminy, izay atolony ho an’NY TOMPO, dia efa nomeko anao koa.

¹³Ny voaloham-bokatra rehetra eo amin’ny taniny, izay hatolony ho an’NY TOMPO, dia ho anao. Izay rehetra madio amin’ny ankohonanao no mahazo mihinana aminy.

¹⁴Ny zavatra voaozona rehetra ao amin’ny Israely dia ho anao.

¹⁵Ny voalohan-teraka rehetra, izay atolony ho an’NY TOMPO, na olona izany na biby, dia ho anao avokoa. Kanefa tsy maintsy havotanao ny voalohan-teraky ny olona, ary havotanao ny voalohan-teraky ny biby maloto.

¹⁶Ny amin’ny fanavotana azy, dia izay efa iray volana no havotanao, araka izay anombanana azy, dia sekela dimy na gera roapolo, araka ny sekela masina.

¹⁷Fa ny voalohan-teraky ny omby na ny voalohan-teraky ny ondry na ny voalohan-teraky ny osy kosa dia tsy mba havotanao, fa masina ireny. Ny rany dia hafafinao amin’ny alitara ary ny jaborany dia hodoranao ho fofona, ho fanatitra levonina amin’ny afo, ho hanitra ankasitrahana ho an’NY TOMPO.

¹⁸Dia ho anao ny henany, ho anao tahaka ny tratrany nasandratra sy tahaka ny feny havanana.

¹⁹Ny fanatitra rehetra izay alaina avy amin’ny zava-masina atolotry ny Zanak’Israely ho an’NY TOMPO dia efa nomeko anao miaraka amin’ireo zanakao lahy sy ireo zanakao vavy ho anjarany; lalàna maharitra izany, dia fanekena mandrakizay asian-tsira eo anatrehan’NY TOMPO, ho anao sy ireo zanakao miaraka aminao.

²⁰Ary hoy NY TOMPO tamin’i Arona: Tsy mba hanana lova eo amin’ny tanin’ireo ianao sady tsy mba hanana anjara eo aminy; Izaho no anjaranao sy lovanao eo anivon’ny Zanak’Israely.

²¹Indro, efa nomeko ny taranak’i Levy ho fananany ny fahafolonkarena rehetra amin’ny Israely noho ny fanompoana izay ataony, dia ny fanompoana ny amin’ny tranolay fihaonana*.

²²Tsy mahazo manakaiky ny tranolay fihaonana intsony ny Zanak’Israely, fandrao meloka izy ka maty.

²³Fa ny levita* ihany no hanao ny fanompoana momba ny tranolay fihaonana ary izy ireo no hitondra ny helony; ho lalàna maharitra amin’ny taranakareo hatramin’ny taranaka fara aman-dimby izany, fa tsy hanan-tany ho lova eo amin’ny Zanak’Israely izy.

²⁴Fa ny fahafolonkarenan’ny Zanak’Israely, izay atolony ho fanomezana ho an’NY TOMPO, dia efa nomeko ho an’ny taranak’i Levy ho fananany; izany no nilazako taminy hoe: Tsy hanana lova eo amin’ny Zanak’Israely izy.

²⁵Ary NY TOMPO niteny tamin’i Mosesy hoe:

²⁶Mitenena indray amin’ny levita hoe: Rehefa raisinareo avy amin’ny Zanak’Israely io fahafolonkarena io, izay efa nomeko ho fanananareo avy aminy, dia hanalanareo indray ny ampahafolon’izany ho fanomezana ho an’NY TOMPO.

²⁷Ary izany fanomezana izany dia hisaina ho anareo toy ny fanomezana nalaina avy amin’ny vary avy eo am-pamoloana sy ny divay avy eo amin’ny famiazana.

²⁸Toy izany koa no hanokananareo fanomezana ho an’NY TOMPO avy amin’ny fahafolonkarenanareo rehetra, izay horaisinareo avy amin’ny Zanak’Israely; avy amin’izany no hanateranareo ho an’NY TOMPO, dia ho an’i Arona mpisorona.

²⁹Avy amin’ny zavatra rehetra omena anareo no hanokananareo ny fanomezana rehetra ho an’NY TOMPO, avy amin’izay rehetra tsara indrindra ka natokana avy aminy.

³⁰Ary lazao aminy hoe: Rehefa maka ny tsara indrindra avy amin’izany ianareo dia hisaina ho an’ny levita toy ny vokatra avy eo am-pamoloana sy avy eo amin’ny famiazana izany.

³¹Dia mahazo mihinana izany na aiza na aiza ianareo sy ny ankohonanareo; fa karamanareo izany, anjara noho ny fanompoanareo ao amin’ny tranolay fihaonana.

³²Tsy hahazoanareo heloka ireny raha maka ny tsara indrindra avy aminy ianareo; ary tsy mandoto ny zava-masina aterin’ny Zanak’Israely ianareo ka tsy ho faty.