Read La Bible en Malgache Nomery 19 Bible Online

Nomery 19 - La Bible en Malgache bible

Nomery 19

¹Hoy NY TOMPO tamin’i Mosesy sy i Arona:

²Izao no lalàna hotandremana, dia izay nandidian’NY TOMPO: Lazao amin’ny Zanak’Israely mba hitondra vantotra ombivavy mena iray, izay tsy misy kilema na tsiny sady mbola tsy nasiana zioga.

³Omeo an’i Eleazara mpisorona iny, dia hasaina hoentina eny ivelan’ny toby ka hovonoina eo anatrehany.

⁴Dia hanalan’i Eleazara mpisorona amin’ny fanondrony ny rany ka hafafiny impito manandrify ny tranolay fihaonana*.

⁵Hodorana eo imasony ilay vantotra ombivavy ka ny hodiny sy ny henany ary ny rany mbamin’ny tain-drorohany dia hodorana avokoa.

⁶Ary ny mpisorona dia haka hazo sedera sy hisopa* ary jaky ka hanipy izany eo afovoan’ny afo andoroana ny vantotra ombivavy.

⁷Dia hosasan’ny mpisorona ny fitafiany ary handro amin’ny rano izy; avy eo dia hankao amin’ny toby izy, nefa haloto mandra-paharivan’ny andro ilay mpisorona.

⁸Izay mandoro ilay ombivavy dia hanasa ny fitafiany sady handro amin’ny rano ary haloto mandra-paharivan’ny andro koa.

⁹Hangonin’ny lehilahy madio iray ny lavenon’ilay vantotra ombivavy ka hapetrany eo ivelan’ny toby, eo amin’izay toerana madio, dia hotahirizina ho an’ny fiangonan’ny Zanak’Israely izy io ho rano fanadiovana. Fanatitra fanadiovana izany.

¹⁰Ary ilay nanangona ny lavenon’ny vantotra ombivavy dia hanasa ny fitafiany, ary haloto mandra-paharivan’ny andro izy. Ho lalàna maharitra ho an’ny Zanak’Israely sy ny mpifindra monina eo aminy izany.

¹¹Izay mikasika fatin’olona dia haloto mandritra ny hafitoana.

¹²Hanadio ny tenany amin’izany rano izany izy amin’ny andro fahatelo, ary amin’ny andro fahafito vao hadio; fa raha tsy manadio ny tenany amin’ny andro fahatelo kosa izy dia tsy hadio amin’ny andro fahafito.

¹³Izay rehetra mikasika faty, olona maty izany, ka tsy manadio ny tenany, dia mandoto ny tabernakelin’NY TOMPO ka hofongorana tsy ho amin’ny Israely. Satria tsy nofafazana ny rano fanadiovana izy dia haloto; mbola eo aminy ihany ny fahalotoany.

¹⁴Izao no lalàna, raha misy olona maty ao an-day: Izay rehetra miditra ao an-day sy izay rehetra ao anatin’ny tranolay dia haloto hafitoana.

¹⁵Ny fanaka rehetra misokatra, izay tsy misy rakotra mifehy aminy, dia haloto.

¹⁶Izay rehetra mikasika izay matin-tsabatra any an-tsaha, na fatin’olona na taolan’olona na fasana, dia haloto hafitoana.

¹⁷Dia hakana ho an’ny voaloto ny lavenon’ilay nodorana ho fanatitra fanadiovana ary hatao eo amin’ny lovia nasiana rano nalaina tamin’ny rano mandeha.

¹⁸Dia haka hisopa* ny lehilahy madio iray ka hanatsoboka azy ao amin’ilay rano ao anaty lovia, dia hafafiny amin’ny tranolay mbamin’ny fanaka rehetra izany, ary koa amin’ny olona izay eo sy amin’ilay nahakasika ny taolana, na amin’izay novonoina na amin’izay matin’aretina na amin’ny fasana.

¹⁹Ary ilay madio dia hamafy rano an’ilay voaloto amin’ny andro fahatelo sy ny fahafito; dia hanadio ny tenany izy amin’ny andro fahafito ka hanasa ny fitafiany sy handro amin’ny rano, ary hadio rehefa hariva.

²⁰Fa ny olona izay voaloto kosa ka tsy nanadio ny tenany dia hofongorana tsy ho eo amin’ny fiangonana satria nandoto ny fitoerana masin’NY TOMPO izy; tsy nafafy taminy ny rano fanadiovana, koa maloto izy.

²¹Ho lalàna maharitra ho anareo izany, fa izay mamafy ny rano fanadiovana dia hanasa ny fitafiany; ary izay mikasika ny rano fanadiovana koa dia haloto mandra-paharivan’ny andro.

²²Ny zavatra rehetra izay voakasiky ny maloto dia haloto; ny olona izay mikasika azy dia haloto mandra-paharivan’ny andro.