Read La Bible en Malgache Nomery 2 Bible Online

Nomery 2 - La Bible en Malgache bible

Nomery 2

¹Hoy NY TOMPO tamin’i Mosesy sy i Arona:

²Samy eo amin’ny fanevany sy eo amin’ny faneva kelin’ny fianakaviany avy no hitobian’ny Zanak’Israely; manodidina ny tranolay fihaonana*, sady manandrify azy, no hitobiany.

³Ny hitoby eo amin’ny lafiny atsinanana, tandrifin’ny fiposahan’ny masoandro, dia izay momba ny fanevan’ny tobin’i Joda, araka ny antokony. Ny lohan’ny taranak’i Joda dia i Nasona, zanak’i Aminadaba.

⁴Ny miaramilany izay voaisa dia eninjato sy efatra arivo sy fito alina.

⁵Ny fokon’Isakara kosa no hitoby eo anilany. Ny lohan’ny taranak’Isakara dia i Netanela, zanak’i Zoara.

⁶Ny miaramilany izay voaisa dia efajato sy efatra arivo sy dimy alina.

⁷Avy eo dia ny fokon’i Zebolona. Ny lohan’ny taranak’i Zebolona dia i Eliaba, zanak’i Helona.

⁸Ny miaramilany izay voaisa dia efajato sy fito arivo sy dimy alina.

⁹Ny tontalin’izay voaisa teo amin’ny tobin’i Joda dia efajato sy enina arivo sy valo alina sy iray hetsy, araka ny antokony. Ireo no ho lohalalana.

¹⁰Ny fanevan’ny tobin’i Robena no ho eo amin’ny lafiny atsimo, araka ny antokony. Ny lohan’ny taranak’i Robena dia i Elizora, zanak’i Sedeora.

¹¹Ny miaramilany izay voaisa dia dimanjato sy enina arivo sy efatra alina.

¹²Ny fokon’i Simeona no hitoby eo anilany. Ny lohan’ny taranak’i Simeona dia i Selomiela, zanak’i Zorisaday.

¹³Ny miaramilany izay voaisa dia telonjato sy sivy arivo sy dimy alina.

¹⁴Manaraka izany ny fokon’i Gada. Ny lohan’ny taranak’i Gada dia i Eliasafa, zanak’i Reoela.

¹⁵Ny miaramilany izay voaisa dia dimampolo sy eninjato sy dimy arivo sy efatra alina.

¹⁶Ny tontalin’izay voaisa teo amin’ny tobin’i Robena dia dimampolo sy efajato sy arivo sy dimy alina sy iray hetsy, araka ny antokony. Ireo no mandeha faharoany.

¹⁷Dia handroso ny tranolay fihaonana sy ny tobin’ny levita* izay eo afovoan’ny toby rehetra, ka araka ny itobiany ihany no handrosoany, samy eo amin’ny filaharany avy, araka ny fanevany avy.

¹⁸Ny fanevan’ny tobin’i Efraima, araka ny antokony, dia ho eo amin’ny lafiny andrefana. Ny lohan’ny taranak’i Efraima dia i Elisama, zanak’i Amihoda.

¹⁹Ny miaramilany izay voaisa dia dimanjato sy efatra alina.

²⁰Ny fokon’i Manase no ho eo anilany. Ny lohan’ny taranak’i Manase dia i Gamaliela, zanak’i Pedazora.

²¹Ny miaramilany izay voaisa dia roanjato sy roa arivo sy telo alina.

²²Manaraka izany ny fokon’i Benjamina. Ny lohan’ny taranak’i Benjamina dia i Abidana, zanak’i Gideony.

²³Ny miaramilany izay voaisa dia efajato sy dimy arivo sy telo alina.

²⁴Ny tontalin’izay voaisa teo amin’ny tobin’i Efraima dia zato sy valo arivo sy iray hetsy, araka ny antokony. Ireo no mandeha fahatelony.

²⁵Ny fanevan’ny tobin’i Dana, araka ny antokony, dia ho eo amin’ny lafiny avaratra. Ny lohan’ny taranak’i Dana dia i Ahiezera, zanak’i Amisaday.

²⁶Ny miaramilany izay voaisa dia fitonjato sy roa arivo sy enina alina.

²⁷Ny fokon’i Asera no hitoby eo anilany. Ny lohan’ny taranak’i Asera dia i Pagiela, zanak’i Okrana.

²⁸Ny miaramilany izay voaisa dia dimanjato sy arivo sy efatra alina.

²⁹Manaraka izany ny fokon’i Naftaly. Ny lohan’ny taranak’i Naftaly dia i Ahira, zanak’i Enana.

³⁰Ny miaramilany izay voaisa dia efajato sy telo arivo sy dimy alina.

³¹Ny tontalin’izay voaisa teo amin’ny tobin’i Dana dia eninjato sy fito arivo sy dimy alina sy iray hetsy. Ireo kosa no vodilalana, araka ny fanevany.

³²Ireo no voaisa tamin’ny Zanak’Israely, araka ny fianakaviany. Ny tontalin’izay voaisa tamin’ny toby rehetra, araka ny antokony, dia dimampolo sy dimanjato sy telo arivo sy enina hetsy.

³³Ny levita kosa dia tsy mba nisaina niaraka tamin’ny Zanak’Israely, araka izay nandidian’NY TOMPO an’i Mosesy.

³⁴Nanatanteraka izay rehetra nandidian’NY TOMPO an’i Mosesy ny Zanak’Israely ka nitoby araka ny fanevany avy; samy nandroso araka ny fokony avy sy ny fianakaviany avy.