Read La Bible en Malgache Nomery 20 Bible Online

Nomery 20 - La Bible en Malgache bible

Nomery 20

¹Tamin’ny volana voalohany dia tonga tao an-tany efitra Zina ny Zanak’Israely, dia ny fiangonana manontolo, ary nitoetra tao Kadesy ny olona. Maty tao i Miriama ka nalevina tao.

²Ary tsy nisy rano ho an’ny fiangonana ka nitangorona mba hikomy tamin’i Mosesy sy i Arona izy ireo.

³Nila ady tamin’i Mosesy ny olona ka niteny hoe: Tahaka izay izahay mba maty tamin’ny nahafatesan’ny rahalahinay teo anatrehan’NY TOMPO!

⁴Fa nahoana no nitondra ny fiangonan’NY TOMPO ho amin’ity tany efitra ity ianareo mba hahafaty anay sy ny ombinay eto?

⁵Ary nahoana izahay no noentinareo niakatra avy tany Ejipta ka nampidirinareo atỳ amin’ity tany ratsy ity, izay tsy misy voan-javatra, na aviavy na voaloboka na ampongabendanitra akory sady tsy misy rano hosotroina?

⁶Dia niala teo anatrehan’ny fiangonana i Mosesy sy i Arona ka nankeo anoloan’ny varavaran’ny tranolay fihaonana* ary niankohoka tamin’ny tany. Dia niseho taminy ny voninahitry NY TOMPO.

⁷Ary NY TOMPO niteny tamin’i Mosesy hoe:

⁸Alao ny tehina ka vorionao sy i Arona rahalahinao ny fiangonana, ary mitenena amin’ny vatolampy eo imasony dia hanome ny ranony izy; hampivoaka rano ho an’ny olona avy amin’ny vatolampy tokoa ianao ka hampisotroinao ny fiangonana sy ny biby fiompiny izany.

⁹Dia nalain’i Mosesy ny tehina avy teo anatrehan’NY TOMPO, araka izay nandidiany azy.

¹⁰Ary novorin’i Mosesy sy i Arona teo anoloan’ny vatolampy ny fiangonana ka hoy izy: Mihainoa, ry mpikomy! Moa avy amin’ity vatolampy ity va no hampivoahanay rano ho anareo?

¹¹Ary nanainga ny tanany i Mosesy ka nikapoka ny vatolampy indroa tamin’ny tehiny. Dia niboiboika be dia be ny rano ka nisotro avokoa ny fiangonana sy ny biby fiompiny.

¹²Ary NY TOMPO niteny tamin’i Mosesy sy i Arona hoe: Satria tsy nino Ahy ianareo ka tsy nanamasina Ahy teo imason’ny Zanak’Israely dia tsy hitondra izao fiangonana izao hiditra ho any amin’ny tany izay nomeko azy ianareo.

¹³Ity no ranon’i Meriba[6] izay nilan’ny Zanak’Israely ady tamin’NY TOMPO ka nisehoan’NY TOMPO ho masina taminy.

¹⁴Ary nandefa iraka avy tao Kadesy hankany amin’ny mpanjakan’i Edoma i Mosesy hilaza hoe: Izao no lazain’Israely rahalahinao: Ianao dia mahafantatra ny fahasahiranana rehetra izay nanjo anay,

¹⁵dia ny nidinan’ny razanay tany Ejipta sy ny nitoeranay ela tany. Nampahory anay sy ny razanay anefa ny Ejiptiana.

¹⁶Ary raha nitaraina tamin’NY TOMPO izahay dia nihaino ny feonay Izy ka naniraka anjely sy namoaka anay avy tany Ejipta; ary indreto, tonga eto Kadesy, izay tanàna eto amin’ny tendron’ny taninao, izahay;

¹⁷koa avelao mba handeha hamakivaky ny taninao izahay; fa tsy handeha hamakivaky ny saha sy ny tanim-boaloboka na hisotro ny rano amin’ny vovo fantsakana akory izahay, fa ny Lalan’andriana[7] ihany no halehanay ka tsy hivily izahay na ho amin’ny ankavanana na ho amin’ny ankavia mandra-pihoatranay ny sisintaninao.

¹⁸Fa hoy ny Edomita taminy: Tsy mahazo mandeha mamakivaky ny taniko ianao, fandrao hivoaka hamely anao amin’ny sabatra aho.

¹⁹Dia hoy ny Zanak’Israely taminy: Ny lalambe ihany no halehanay, fa raha hisotro ny ranonao izaho sy ny omby aman’ondriko dia hefaiko vola izany; fa zavatra tsotra ihany: Tsy hanao na inona na inona aho fa handalo an-tongotra fotsiny ihany.

²⁰Hoy anefa ny navaliny: Tsy mahazo mandalo eto ianao! Ary niainga hisakana azy ny Edomita ka nitondra vahoaka betsaka sady nampiseho hery be.

²¹Toy izany no nandavan’ny Edomita tsy hamela ny Israelita hamakivaky ny taniny ka nivily niala taminy ny Zanak’Israely.

²²Dia niala tao Kadesy ny Zanak’Israely, dia ny fiangonana manontolo, ka tonga tao amin’ny tendrombohitra Hora.

²³Ary NY TOMPO niteny tamin’i Mosesy sy tamin’i Arona tao amin’ny tendrombohitra Hora, tao amin’ny faritanin’i Edoma hoe:

²⁴Hangonina any amin’ny razany i Arona; fa tsy hiditra any amin’ny tany izay nomeko ny Zanak’Israely izy satria nandà ny teniko teo amin’ny ranon’i Meriba ianareo.

²⁵Alao i Arona sy i Eleazara zanany ka ento miakatra ao amin’ny tendrombohitra Hora izy mianaka.

²⁶Esory ny fitafian’i Arona ka atafio an’i Eleazara zanany. Ary hangonina any amin’ny razany i Arona; any no hahafatesany.

²⁷Ary nanatanteraka izay nandidian’NY TOMPO i Mosesy ka niakatra tao amin’ny tendrombohitra Hora, teo imason’ny fiangonana manontolo, izy telo mianaka.

²⁸Dia nesorin’i Mosesy ny fitafian’i Arona ka natafiny an’i Eleazara zanany, dia maty tao an-tampon’ny tendrombohitra i Arona. Ary nidina avy tao an-tendrombohitra i Mosesy sy i Eleazara.

²⁹Nony hitan’ny fiangonana manontolo fa maty i Arona dia nitomany azy nandritra ny telopolo andro izy, dia ny taranak’Israely rehetra.