Read La Bible en Malgache Nomery 21 Bible Online

Nomery 21 - La Bible en Malgache bible

Nomery 21

¹Rehefa ren’ilay Kananita, mpanjakan’i Arada, izay nonina tany Negeva, fa mandeha amin’ny lalana mankany Atarima ny Israely, dia niady taminy izy ka noentiny ho babo ny sasany tamin’ny Israely.

²Dia nivoady tamin’NY TOMPO ny Israely ka niteny hoe: Raha atolotrao eo an-tananay tokoa io firenena io dia hataonay zavatra voaozona avokoa ny tanànany.

³Ary NY TOMPO nihaino ny feon’ny Israely ka natolony azy ny Kananita. Dia nataon’ny Israely ho zavatra voaozona izy ireo sy ny tanànany; koa ny anaran’izany tany izany dia natao hoe Horma na Ozona.

⁴Niala tany an-tendrombohitra Hora indray izy ireo ka nihazo ny lalana mankany amin’ny Ranomasina Mena hanodidina ny tany Edoma. Dia kivy teny an-dalana ny olona.

⁵Dia niteny nanome tsiny an’Andriamanitra sy i Mosesy izy hoe: Nahoana no noentinao niakatra avy tany Ejipta ho faty atỳ an-tany efitra izahay? Tsy misy mofo na rano atỳ, ary leon’itony mofo tsy izy itony izahay.

⁶Ary NY TOMPO nampandeha menarana mandoro teny amin’ny olona; nanaikitra ny olona ireny ka nahafatesana be tamin’ny Israely.

⁷Dia nankeo amin’i Mosesy ny olona ka niteny hoe: Efa nanota izahay fa niteny nanohitra NY TOMPO sy ianao. Ifony amin’NY TOMPO izahay mba hanesorany ny menarana hiala aminay. Dia nifona ho an’ny olona i Mosesy.

⁸Dia hoy NY TOMPO tamin’i Mosesy: Manaova menarana varahina ka ahantòny amin’ny hazo lava, ary izay rehetra voakaikitra ka mijery izany dia ho velona.

⁹Dia nanao menarana varahina i Mosesy ka nanantona azy tamin’ny hazo lava; koa izay olona voakaikitry ny menarana ka nijery ilay menarana varahina dia velona.

¹⁰Dia niainga ny Zanak’Israely ka nitoby tao Obota.

¹¹Rehefa niala tao Obota izy dia nitoby tao Ie-Abarima, tany amin’ny tany efitra izay mifanolotra amin’i Moaba, tandrifin’ny fiposahan’ny masoandro.

¹²Nony niala tao izy ireo dia nitoby tao amin’ny lohasahan-driaka Zereda.

¹³Ary niala tao dia nilasy tany andafin’i Arnona, izay any amin’ny tany efitra sady mivoaka avy ao amin’ny faritanin’ny Amorita; fa ny ranon’i Arnona no mamaritra ny sisintanin’ny Moabita, eo anelanelan’i Moaba sy ny Amorita.

¹⁴Koa izany no ilazana ao amin’ny Bokin’ny Adin’NY TOMPO hoe: I Vaheba any Sofa sy ireo lohasahan-driaka, i Arnona,

¹⁵ary ny hantsana manamorona ny lohasahan-driaka, izay mivily mankany amin’ny tanin’i Ara ka mipaka any amin’ny sisintanin’i Moaba.

¹⁶Ary niala tao izy hankany Bera, dia ilay lava-drano fantsakana nilazan’NY TOMPO tamin’i Mosesy hoe: Angony ny olona fa homeko rano izy.

¹⁷Dia nanao izao hira izao ny Israely: Aoka hiboiboika ianao, ry lavaka fantsakana! Ataovinareo an-kira izy!

¹⁸Lavaka fantsakana izay nohadin’ireo olo-manankaja, nohadin’ireo manankaja amin’ny firenena tamin’ny tehiny, dia ireo tehiny fanapahana!

¹⁹Nony niala tany Matana izy ireo dia nankany Nahaliela; nony niala tany Nahaliela dia nankao Bamota;

²⁰nony niala tany Bamota dia nankany amin’ny lohasaha izay ao amin’ny tany Moaba, ao an-tampon’i Pisga, izay manatrika ny tany efitra.

²¹Nandefa iraka ho any amin’i Sihona, mpanjakan’ny Amorita, ny Israely mba hilaza hoe:

²²Avelao izahay mba handeha hamakivaky ny taninao, fa tsy hivily ho any amin’ny saha na ho amin’ny tanim-boaloboka izahay ary tsy hisotro ny rano amin’ny lavaka fantsakana; ny Lalan’andriana[8] ihany no halehanay mandra-pihoatranay ny sisintaninao.

²³Nefa tsy namela ny Israely handeha hamakivaky ny taniny i Sihona fa nanangona ny vahoakany rehetra izy ka niainga hikatroka tamin’ny Israely tany an-tany efitra, dia nankany Jahaza ary niady tamin’ny Israely.

²⁴Ary namely azy tamin’ny lelan-tsabatra ny Israely ka nahazo ny taniny hatrany Arnona ka hatrany Jaboka, dia hatrany amin’ny taranak’i Amona; fa nisy manda mafy ny sisintanin’ny taranak’i Amona.

²⁵Dia nalain’ny Israely ireny tanàna rehetra ireny. Nonenan’ny Israely ny tanànan’ny Amorita rehetra, dia i Hesbona sy ireo vohitra miankina aminy rehetra.

²⁶I Hesbona no tanànan’i Sihona, mpanjakan’ny Amorita, izay nanafika ny mpanjakan’i Moaba taloha ka naka ny taniny rehetra hatrany Arnona.

²⁷Izany no nilazan’ny mpanao oha-teny hoe: Midira ao Hesbona ianareo! Aoka hatsangana indray sy hatao mafy orina ny tanànan’i Sihona;

²⁸fa nisy afo nivoaka avy tao Hesbona ary lelafo avy tao an-tanànan’i Sihona ka nandevona an’i Ara-Moaba sy ireo tompon’ny havoana any Arnona.

²⁹Lozanao, ry Moaba! Ringana ianao, ry olon’i Kemosy! Nafoiny ho mpandositra ny zanany lahy ary navelany ho babo ny zanany vavy, ho an’i Sihona, mpanjakan’ny Amorita.

³⁰Notifirintsika tamin’ny zana-tsipìka izy; ringana i Hesbona hatrany Dibona; nolevonintsika izy hatrany Nofa ka hatrany Medeba.

³¹Dia nonina tao amin’ny tanin’ny Amorita ny Israely.

³²Ary naniraka mpisafo tany ho any Jazera i Mosesy; ary naka ireo vohitra miankina aminy ny Israely ka nandroaka ny Amorita izay tany.

³³Ary niverina izy ireo ka niakatra tamin’ny lalana mankany Basana. Dia niainga i Oga, mpanjakan’i Basana, hifanehatra aminy, dia izy sy ny vahoakany rehetra mba hiady tao Edirehy.

³⁴Dia hoy NY TOMPO tamin’i Mosesy: Aza matahotra azy ianao, fa efa natolotro eo an-tananao izy sy ny vahoakany rehetra ary ny taniny; hataonao aminy araka izay nataonao tamin’i Sihona, mpanjakan’ny Amorita, izay nonina tao Hesbona.

³⁵Dia namely azy sy ny zanany lahy ary ny vahoakany rehetra izy ka tsy nasiany niangana na dia iray akory aza, dia azony ny taniny.