Read La Bible en Malgache Nomery 23 Bible Online

Nomery 23 - La Bible en Malgache bible

Nomery 23

¹Ary hoy i Balama tamin’i Balaka: Manorena alitara fito eto ho ahy ka manomàna vantotra ombilahy fito sy ondrilahy fito eto.

²Dia narahin’i Balaka izay efa nolazain’i Balama; ary nanolotra vantotra ombilahy iray sy ondrilahy iray teo ambonin’ny alitara tsirairay i Balaka sy i Balama ho fanatitra dorana manontolo.

³Dia hoy i Balama tamin’i Balaka: Mijoroa eo anilan’ny fanatitra doranao, fa izaho kosa dia handeha; angamba ho avy hitsena ahy NY TOMPO; ary izay hasehony amiko dia hambarako aminao. Dia lasa nankany amin’ny tendrombohitra iray mangadihady izy.

⁴Ary Andriamanitra nitsena an’i Balama; dia hoy i Balama Taminy: Efa namboariko ny alitara fito ary efa nanolotra vantotra ombilahy iray sy ondrilahy iray teo ambonin’ny alitara tsirairay aho.

⁵Ary NY TOMPO nanisy teny teo am-bavan’i Balama ka niteny hoe: Miverena any amin’i Balaka ka toy izany no holazainao.

⁶Dia niverina tany amin’i Balaka izy ary indro, nijoro teo anilan’ny fanatitra dorany izy, dia izy sy ireo andriandahin’i Moaba rehetra.

⁷Dia nilaza ny oha-teniny i Balama ka niteny hoe: I Balaka dia nampaka ahy avy tany Arama, ny mpanjakan’i Moaba dia nampaka ahy avy tany amin’ny tendrombohitra atsinanana: Avia ka ozòny i Jakoba! Mankanesa atỳ ka anamparo ny fahatezeranao Israely!

⁸Hataoko ahoana no ho fanozona izay tsy nozonin’Andriamanitra? Ary hataoko ahoana no ho tezitra amin’izay tsy nitezeran’NY TOMPO?

⁹Fa avy eto an-tampon’ny vatolampy no ahitako azy ary avy eto amin’ny havoana no itazanako azy. Indro, firenena mitoka-monina izy ary tsy hatao ho isan’ny Jentilisa*.

¹⁰Iza no mahaisa ny vovok’i Jakoba na ny isan’ny ampahefatry ny Israely akory? Aoka ho tahaka ny fahafatesan’ny olo-marina ny fahafatesako ary aoka ny hiafarako ho tahaka ny azy!

¹¹Dia hoy i Balaka tamin’i Balama: Inona izao nataonao tamiko izao? Hanozona ny fahavaloko no nakako anao, kanjo ny nanome azy tsodrano feno indray no nataonao!

¹²Dia namaly izy hoe: Tsy izay napetraky NY TOMPO tao am-bavako va no hotandremako ka tsy maintsy holazaiko?

¹³Dia hoy i Balaka taminy: Andeha mba hiaraka amiko ho any amin’ny toerana hafa izay hahatazananao azy; kanefa ny tapany ihany no ho hitanao eo fa tsy ho hitanao avokoa izy rehetra, koa ozòny avy eo izy!

¹⁴Dia nitondra azy tao an-tsaha Zofima[9], tao an-tampon’i Pisga izy; ary nanorina alitara fito izy ka nanatitra vantotra ombilahy iray sy ondrilahy iray teo ambonin’ny alitara tsirairay.

¹⁵Dia hoy i Balama tamin’i Balaka: Mijoroa eto anilan’ny fanatitra dorana manontolo atolotrao, fa izaho dia hankerỳ hihaona amin’NY TOMPO.

¹⁶Ary NY TOMPO nitsena an’i Balama dia nanisy teny teo am-bavany hoe: Miverena mankeo amin’i Balaka ary izany no holazainao.

¹⁷Nony tonga tany aminy izy dia indreo, teo anilan’ny fanatitra dorana manontolo izay nateriny izy sy ireo andriandahin’i Moaba izay teo aminy. Dia hoy i Balaka taminy: Ahoana no nolazain’NY TOMPO?

¹⁸Dia nilaza ny oha-teniny i Balama hoe: Mitsangàna, ry Balaka, ka mandrenesa! Atongilano amiko ny sofinao, ry zanak’i Zipora!

¹⁹Andriamanitra tsy mba olona ka handainga na zanak’olombelona ka hanenina. Moa efa nilaza va Izy nefa tsy nanatanteraka? Na efa niteny va Izy ka tsy notoviny?

²⁰Indro, ny hitahy no nomena hataoko; ary efa nitahy Izy ka tsy mahaova izany aho.

²¹Tsy mahita faharatsiana eo amin’i Jakoba Izy ary tsy mahatsikaritra fahoriana eo amin’Israely; NY TOMPO Andriamaniny no momba azy; hoby fanao amin’andriana no re eo aminy.

²²Noentin’Andriamanitra nivoaka avy tany Ejipta izy ary manan-kery toy ny ombimanga.

²³Tsy misy fisikidiana eo amin’i Jakoba ary tsy misy fanandroana eo amin’Israely. Fa amin’ny fotoanany no hilazana amin’i Jakoba sy Israely ny asa izay ataon’NY TOMPO.

²⁴Indro, firenena mitsangana toy ny liom-bavy sy miarina toy ny liona; tsy handry izy mandra-pihinany haza sy mandra-pisotrony ny ran’ny voavono.

²⁵Dia hoy i Balaka tamin’i Balama: Rehefa tsy hanozona azy ihany ianao dia aza mitsodrano azy!

²⁶Fa namaly an’i Balaka kosa i Balama hoe: Tsy efa nilaza taminao va aho hoe: Izay rehetra holazain’NY TOMPO ihany no hataoko?

²⁷Dia hoy i Balaka tamin’i Balama: Andeha hoentiko amin’ny toerana hafa indray ianao; angamba ho sitrak’Andriamanitra ny hanozonanao azy avy any!

²⁸Ary noentin’i Balaka ho ao an-tampon’i Peora, izay manatrika ny tany efitra, i Balama.

²⁹Dia hoy i Balama tamin’i Balaka: Manorena alitara fito eto ho ahy ka manamboara vantotra ombilahy fito sy ondrilahy fito.

³⁰Ary nanatanteraka izay efa nolazain’i Balama i Balaka ka nanatitra vantotra ombilahy iray sy ondrilahy iray teo ambonin’ny alitara tsirairay.