Read La Bible en Malgache Nomery 24 Bible Online

Nomery 24 - La Bible en Malgache bible

Nomery 24

¹Rehefa hitan’i Balama fa sitraky NY TOMPO ny hitahy ny Israely dia tsy nandeha hanao sikidy tahaka ny teo aloha intsony izy fa nitodika nanatrika ny tany efitra fotsiny.

²Dia natopin’i Balama ny masony ka nahita ny Israely mitoby araka ny fokony avy izy. Ary ny Fanahin’Andriamanitra tonga tamin’i Balama.

³Dia nilaza ny oha-teniny izy hoe: Hoy i Balama, zanak’i Beora, dia ny lehilahy izay nampahiratina ny masony,

⁴hoy ilay mandre ny tenin’Andriamanitra sady mahita fahitana avy amin’ny Tsitoha, torana, kanefa nampahiratina ny masony:

⁵Endre ny hatsaran’ny tranolainao, ry Jakoba ô! Sy ny lasinao, ry Israely ô!

⁶Tahaka ny lohasaha misandrahaka, tahaka ny saha ao amoron’ny ony, tahaka ny hazo manitra nambolen’NY TOMPO, tahaka ny hazo sedera ao amoron-drano.

⁷Mikoriana avy amin’ny sininy ny rano ary ny voa afafiny dia tondrahin’ny rano betsaka. Hisandratra noho i Agaga ny mpanjakany ary handroso voninahitra ny fanjakany.

⁸Noentin’Andriamanitra nivoaka avy tany Ejipta izy ary manan-kery toy ny ombimanga. Handany ny Jentilisa fahavalony izy ka hotapatapahiny ny taolany, ary haripany amin’ny zana-tsipìkany izy.

⁹Mamitsaka izy, mandry toy ny liona, ary toy ny liom-bavy, koa iza no hampitsangana azy? Hotahina anie izay manisy soa anao ary ho voaozona anie izay manozona anao!

¹⁰Dia nirehitra tamin’i Balama ny fahatezeran’i Balaka ka niteha-tanana izy sady niteny tamin’i Balama hoe: Hanozona ny fahavaloko no niantsoako anao, kanefa dia efa nitsodrano azy intelo ianao izao!

¹¹Koa ankehitriny, mandosira ho any amin’ny fonenanao ianao! Efa nilaza aho hoe: Hanome voninahitra anao tokoa aho; kanefa indro NY TOMPO efa nisakana anao tsy hahazo voninahitra.

¹²Dia hoy i Balama tamin’i Balaka: Moa tsy efa nilaza tamin’ireo irakao izay nirahinao tany amiko va aho hoe:

¹³Na dia homen’i Balaka volafotsy sy volamena eran’ny tranony aza aho dia tsy mahazo manoatra ny didin’NY TOMPO, na hanao soa na hanao ratsy avy amin’ny saiko, fa izay holazain’NY TOMPO ihany no holazaiko?

¹⁴Ankehitriny, indro, handeha ho any amin’ny fireneko aho, dia aoka aho hampahafantatra anao ny amin’izay hataon’ity firenena ity amin’ny vahoakanao amin’ny andro ho avy.

¹⁵Dia nilaza ny oha-teniny izy hoe: Hoy i Balama, zanak’i Beora, dia ny lehilahy izay nampahiratina ny masony;

¹⁶izay mandre ny tenin’Andriamanitra sady mahalala ny fahalalan’ny Avo Indrindra, izay mahita fahitana avy amin’ny Tsitoha, torana, kanefa nampahiratina ny masony:

¹⁷Hitako Izy nefa tsy ankehitriny. Tazako Izy nefa tsy akaiky. Misy kintana miseho avy amin’i Jakoba ary tehim-panjakana miposaka avy amin’Israely ka manapotika ny fihirifan’i Moaba sy ny karandohan’ireo mpitabataba rehetra.

¹⁸I Edoma sy i Seìra fahavalony dia samy lasany ary dia mandroso amin-kery Israely.

¹⁹Avy amin’i Jakoba no isehoan’Izay hanapaka ka handringana izay sisa tao an-tanàna.

²⁰Nahita ny Amalekita koa izy dia nilaza ny oha-teniny hoe: Voalohany tamin’ny Jentilisa* i Amaleka, kanefa ho lany ringana ny hiafarany!

²¹Ary nahita ny Kenita izy dia nilaza ny oha-teniny hoe: Mafy orina ny fonenanao ary natao eo amin’ny vatolampy ny akaninao.

²²Kanefa ho lanin’ny afo i Kaina alohan’ny hamaboan’i Asira anao.

²³Dia nilaza ny oha-teniny koa izy hoe: Indrisy! Iza no ho velona, raha manao izany Andriamanitra?

²⁴Ary hisy sambo avy any amin’ny tany Kitima ka hampietry an’i Asira ary hampietry an’i Ebera, ary izy koa dia ho lany ringana mandrakizay!

²⁵Dia niainga i Balama ka lasa nody tany amin’ny fonenany; i Balaka koa dia mba nandeha tany amin’izay nalehany.