Read La Bible en Malgache Nomery 27 Bible Online

Nomery 27 - La Bible en Malgache bible

Nomery 27

¹Ary avy ireo zanakavavin’i Zelofada, zanak’i Hefera, zanak’i Gileada, zanak’i Makira, zanak’i Manase, avy tamin’ny fianakavian’i Manase, zanak’i Josefa, ary izao avy no anarany: i Mahala, i Noa, i Hogla, i Milka ary i Tirza.

²Izy ireo dia nitsangana teo anatrehan’i Mosesy sy teo anatrehan’i Eleazara mpisorona ary teo anatrehan’ireo lohan’ny fiangonana sy ny fiangonana manontolo, teo anoloan’ny varavaran’ny tranolay fihaonana* ka niteny hoe:

³Ny rainay dia maty tany an-tany efitra, kanefa tsy mba isan’ny antokon’i Kora izay niangona hikomy tamin’NY TOMPO akory; fa ny fahotan’izy tenany no nahafaty azy, ary tsy nanan-janakalahy izy.

⁴Nahoana ny rainay no ho maty maso eo amin’ny fianakaviany na dia tsy nanan-janakalahy aza izy? Mba omeo zaratany eo amin’ny rahalahin’ny rainay izahay.

⁵Ary nalahatr’i Mosesy teo anatrehan’NY TOMPO ny raharahan’ireo.

⁶Ary NY TOMPO niteny tamin’i Mosesy hoe:

⁷Marina ny tenin’ny zanakavavin’i Zelofada: Omeo zaratany eo amin’ny rahalahin-drainy tokoa izy; dia ampandovay ny zaratanin’ny rainy izy.

⁸Ary lazao amin’ny Zanak’Israely hoe: Raha misy lehilahy maty ka tsy manan-janakalahy dia ny zanany vavy no hampandovainareo ny zarataniny.

⁹Ary raha tsy manan-janakavavy izy dia ny rahalahiny no homenareo ny zarataniny.

¹⁰Ary raha tsy manan-drahalahy izy dia ny rahalahin-drainy no homenareo ny zarataniny.

¹¹Ary raha tsy manan-drahalahy ny rainy dia ny havany akaiky azy amin’ny fianakaviany no homenareo ny zarataniny, koa izy no handova azy. Ho lalàna hitondrana ny Zanak’Israely izany araka ny didy nomen’NY TOMPO an’i Mosesy.

¹²Hoy NY TOMPO tamin’i Mosesy: Miakara amin’irỳ tendrombohitra Abarima irỳ ka tazano ny tany izay omeko ny Zanak’Israely.

¹³Ary rehefa hitanao izany dia hangonina any amin’ny razanao koa ianao, tahaka izay nanangonana an’i Arona rahalahinao;

¹⁴fa nandà ny teniko ianareo tany an-tany efitra Zina, tamin’ilay nilan’ny fiangonana ady ka tsy nanamasina Ahy teo amin’ny rano teo imasony. Izany no ranon’i Meriba, any Kadesy, any an-tany efitra Zina.

¹⁵Ary niteny tamin’NY TOMPO i Mosesy hoe:

¹⁶Aoka NY TOMPO, Andriamanitry ny fanahin’ny nofo rehetra, hanendry lehilahy izay hitandrina ny fiangonana

¹⁷ka hivoaka mialoha azy sy hiditra mialoha azy, ary hitarika azy hivoaka sy hitarika azy hiditra mba tsy ho tahaka ny ondry tsy misy mpiandry ny fiangonan’NY TOMPO.

¹⁸Ary hoy NY TOMPO tamin’i Mosesy: Alao i Josoa, zanak’i Nona, izay lehilahy manam-panahy ka ametraho ny tananao izy.

¹⁹Asaivo mijoro eo anatrehan’i Eleazara mpisorona sy ny fiangonana manontolo izy ka manomeza didy azy eo imason’ireo ianao.

²⁰Dia anomezo azy ny voninahitrao mba hihainoan’ny fiangonan’ny Zanak’Israely manontolo azy.

²¹Ary hijoro eo anatrehan’i Eleazara mpisorona, izay hanadina amin’ny fitsaran’ny Orima eo anatrehan’NY TOMPO ho azy, izy; araka ny teniny no hivoahany ary araka ny teniny no hidirany, dia izy sy ny Zanak’Israely rehetra miaraka aminy, dia ny fiangonana manontolo.

²²Ary nanatanteraka izay nandidian’NY TOMPO azy i Mosesy. Dia naka an’i Josoa izy ka nampijoro azy teo anatrehan’i Eleazara mpisorona sy ny fiangonana manontolo

²³ka nametraka ny tanany taminy ary nanome didy azy, araka ny tenin’NY TOMPO izay nampitondrainy an’i Mosesy.