Read La Bible en Malgache Nomery 28 Bible Online

Nomery 28 - La Bible en Malgache bible

Nomery 28

¹Ary NY TOMPO niteny tamin’i Mosesy

²mba hanome didy ny Zanak’Israely hoe: Ny fanatitra ho Ahy, dia ny haniko, izay fanatitra levonina amin’ny afo ho hanitra ankasitrahana ho Ahy, dia aoka hotandremanareo ny hanolorana izany ho Ahy amin’ny fotoanany avy.

³Lazao aminy hoe: Izao no fanatitra levonina amin’ny afo, izay hatolotrao ho an’NY TOMPO: Zanak’ondry izay iray taona sady tsy misy kilema, roa isanandro, ho fanatitra mandrakariva, dorana manontolo izany,

⁴koa ny zanak’ondry iray dia hatolotrao vao maraina ary ny zanak’ondry iray dia hatolotrao amin’ny hariva;

⁵koba tsara toto ampahafolon’ny efaha*, voaharo diloilo nofiazana ampahefatry ny hina* kosa no ho fanatitra avy amin’ny zavamaniry.

⁶Ho fanatitra mandrakariva, dorana manontolo izany, izay voatendry tao an-tendrombohitra Sinay ho hanitra ankasitrahana, fanatitra levonina amin’ny afo ho an’NY TOMPO.

⁷Ary ny fanatitra aidina dia ampahefatry ny hina isan-janak’ondry; ao amin’ny fitoerana masina no handrarahanao ny divay ho an’NY TOMPO ho fanatitra aidina.

⁸Ny zanak’ondry faharoa kosa dia hatolotrao amin’ny hariva milenti-masoandro; fanatitra avy amin’ny zavamaniry sy fanatitra aidina, tahaka ny atao amin’ny fanatitra maraina no hampombainao azy, ho fanatitra levonina amin’ny afo, ho hanitra ankasitrahana ho an’NY TOMPO.

⁹Amin’ny andro Sabata kosa dia izao no hatolotrao: Zanak’ondry roa, izay iray taona avy sady tsy misy kilema, miampy koba tsara toto roa ampahafolon’ny efaha*, voaharo diloilo, ho fanatitra avy amin’ny zavamaniry; ampombaina azy ireo ny fanatitra aidina.

¹⁰Fanatitra dorana manontolo ho amin’ny Sabata izany, ary ho isan-tSabata, ho fanampin’ny fanatitra mandrakariva dorana manontolo sy ny fanatitra aidina ampombaina azy.

¹¹Izao no hatolotrareo ho fanatitra dorana manontolo ho an’NY TOMPO amin’ny voaloham-bolanareo: Vantotra ombilahy roa sy ondrilahy iray ary zanak’ondry fito, izay iray taona avy sady tsy misy kilema,

¹²miampy koba tsara toto telo ampahafolon’ny efaha*, voaharo diloilo, ho fanatitra avy amin’ny zavamaniry, ampombaina ny vantotra ombilahy; koba tsara toto roa ampahafolon’ny efaha, voaharo diloilo, ho fanatitra avy amin’ny zavamaniry, ampombaina ny ondrilahy;

¹³koba tsara toto ampahafolon’ny efaha, voaharo diloilo, ho fanatitra avy amin’ny zavamaniry, ampombaina ny zanak’ondry tsirairay; ho fanatitra dorana manontolo izany, dia hanitra ankasitrahana, fanatitra levonina amin’ny afo ho an’NY TOMPO.

¹⁴Ny fanatitra aidina ampombaina izany dia divay antsasaky ny hina*, ho amin’ny vantotra ombilahy iray, ampahatelon’ny hina, ho amin’ny ondrilahy iray ary ampahefatry ny hina, ho amin’ny zanak’ondry iray. Izany no fanatitra dorana manontolo isam-bolana, araka ireo volana amin’ny taona,

¹⁵ary osilahy iray koa dia hatao fanatitra noho ny ota ho an’NY TOMPO; ho fanampin’ny fanatitra mandrakariva, dorana manontolo, no hanolorana azy sy ny fanatitra aidina ampombaina azy.

¹⁶Ny andro fahefatra amby folo amin’ny volana voalohany dia Paska* an’NY TOMPO.

¹⁷Andro firavoravoana ny andro fahadimy amby folo amin’izany volana izany. Hafitoana no hihinanana mofo tsy misy masirasira.

¹⁸Amin’ny andro voalohany dia hisy fivoriana masina; aza manao raharaha mavesatra.

¹⁹Izao no hatolotrareo ho fanatitra levonina amin’ny afo, dia fanatitra dorana manontolo ho an’NY TOMPO: Vantotra ombilahy roa sy ondrilahy iray ary zanak’ondry fito, izay iray taona avy, izay tsy misy kilema, no hatolotrareo;

²⁰ary ny fanatitra avy amin’ny zavamaniry ampombaina azy dia koba tsara toto voaharo diloilo; telo hampahafolon’ny efaha* no hatolotrareo miaraka amin’ny vantotra ombilahy tsirairay; roa ampahafolon’ny efaha no ampombaina ny ondrilahy,

²¹ampahafolon’ny efaha no ampombaina ny zanak’ondry tsirairay amin’ireo zanak’ondry fito,

²²ary osilahy iray no ho fanatitra noho ny ota, hanaovana fanavotana ho anareo.

²³Atolory ireo ho fanampin’ny fanatitra dorana manontolo isa-maraina, izay atao fanatitra mandrakariva, dorana manontolo.

²⁴Araka ireo no hanoloranareo isanandro, mandritra ny fito andro, ho hanina levonina amin’ny afo, ho hanitra ankasitrahana ho an’NY TOMPO; ho fanampin’ny fanatitra dorana mandrakariva manontolo no hanolorana izany sy ny fanatitra aidina ampombaina azy.

²⁵Amin’ny andro fahafito dia hisy fivoriana masina ho anareo; aza manao raharaha mavesatra.

²⁶Amin’ny andro fanaterana ny voaloham-bokatra, raha manolotra fanatitra vaovao avy amin’ny zavamaniry ho an’NY TOMPO ianareo amin’ny fetin’ireo Herinandronareo[10], dia hisy fivoriana masina ho anareo; aza manao raharaha mavesatra.

²⁷Ireto no atolory ho fanatitra dorana manontolo, ho hanitra ankasitrahana ho an’NY TOMPO: Vantotra ombilahy roa, ondrilahy iray ary zanak’ondry fito, izay iray taona avy;

²⁸ny fanatitra avy amin’ny zavamaniry ampombaina azy dia koba tsara toto voaharo diloilo, telo ampahafolon’ny efaha*, ampombaina ny ombilahy tsirairay, roa ampahafolon’ny efaha, ampombaina ny ondrilahy,

²⁹ary ampahafolon’ny efaha, ampombaina ny zanak’ondry tsirairay amin’ireo zanak’ondry fito,

³⁰ary osilahy iray, hanaovana fanavotana ho anareo.

³¹Dia hatolotrareo ireo ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy; izay tsy misy kilema hatrany no haterinareo.