Read La Bible en Malgache Nomery 29 Bible Online

Nomery 29 - La Bible en Malgache bible

Nomery 29

¹Amin’ny andro voalohany amin’ny volana fahafito dia hisy fivoriana masina ho anareo; aza manao raharaha mavesatra; ho andro fitsofana ny trompetra fanairana ho anareo izany.

²Ary izao no hatolotrareo ho fanatitra dorana manontolo, ho hanitra ankasitrahana ho an’NY TOMPO: Vantotra ombilahy iray sy ondrilahy iray ary zanak’ondry fito, izay iray taona avy, sady tsy misy kilema;

³ny fanatitra avy amin’ny zavamaniry ampombaina azy kosa dia koba tsara toto telo ampahafolon’ny efaha*, voaharo diloilo, ampombaina ny vantotra ombilahy, roa ampahafolon’ny efaha ampombaina ny ondrilahy,

⁴ampahafolon’ny efaha ampombaina ny zanak’ondry tsirairay amin’ireo zanak’ondry fito,

⁵ary osilahy iray ho fanatitra noho ny ota, hanaovana fanavotana ho anareo,

⁶ho fanampin’ny fanatitra dorana manontolo noho ny voaloham-bolana, ny fanatitra avy amin’ny zavamaniry ampombaina azy, ny fanatitra mandrakariva, dorana manontolo, ny fanatitra avy amin’ny zavamaniry ampombaina azy ary ny fanatitra aidina ampombaina azy, araka ny fanao aminy, ho hanitra ankasitrahana; fanatitra levonina amin’ny afo ho an’NY TOMPO izany.

⁷Amin’ny andro fahafolo amin’izany volana fahafito izany dia hisy fivoriana masina ho anareo ka hampahory ny tenanareo ianareo; aza manao raharaha na dia kely aza.

⁸Izao no hatolotrareo ho fanatitra dorana manontolo ho an’NY TOMPO, ho hanitra ankasitrahana: Vantotra ombilahy iray sy ondrilahy iray ary zanak’ondry fito, izay iray taona avy, sady tsy misy kilema, no hatolotrareo;

⁹ary ny fanatitra avy amin’ny zavamaniry ampombaina azy dia koba tsara toto telo ampahafolon’ny efaha*, voaharo diloilo, ampombaina ny vantotra ombilahy, roa ampahafolon’ny efaha ampombaina ny ondrilahy,

¹⁰ary ampahafolon’ny efaha ampombaina ny zanak’ondry tsirairay amin’ireo zanak’ondry fito,

¹¹ary osilahy iray ho fanatitra noho ny ota; ho fanampin’ny fanatitra noho ny ota hanaovana fanavotana, ny fanatitra mandrakariva, dorana manontolo, ny fanatitra avy amin’ny zavamaniry ampombaina azy ary ny fanatitra aidina ampombaina azy.

¹²Amin’ny andro fahadimy amby folo amin’ny volana fahafito dia hisy fivoriana masina ho anareo; koa aza manao raharaha mavesatra fa mitandrema ny andro firavoravoana ho an’NY TOMPO mandritra ny hafitoana.

¹³Izao no hatolotrareo ho fanatitra dorana manontolo, dia fanatitra levonina amin’ny afo ho hanitra ankasitrahana ho an’NY TOMPO: Vantotra ombilahy telo amby folo sy ondrilahy roa ary zanak’ondry efatra amby folo, izay iray taona avy, sady tsy misy kilema izy ireo;

¹⁴ny fanatitra avy amin’ny zavamaniry ampombaina azy dia koba tsara toto telo ampahafolon’ny efaha*, voaharo diloilo, ampombaina ny ombilahy tsirairay, dia ireo vantotra ombilahy telo amby folo; roa ampahafolon’ny efaha no ampombaina ny ondrilahy tsirairay, dia ny ondrilahy roa;

¹⁵ampahafolon’ny efaha no ampombaina ny zanak’ondry tsirairay amin’ireo zanak’ondry efatra amby folo,

¹⁶ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

¹⁷Amin’ny andro faharoa indray, vantotra ombilahy roa amby folo sy ondrilahy roa ary zanak’ondry efatra amby folo, izay iray taona, sady tsy misy kilema;

¹⁸ary ny fanatitra avy amin’ny zavamaniry sy ny fanatitra araraka ampombaina ny vantotra ombilahy sy ireo ondrilahy ary ireo zanak’ondry, araka ny isany avy, araka ny fanao,

¹⁹ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra araraka ampombaina azy.

²⁰Amin’ny andro fahatelo dia vantotra ombilahy iraika amby folo sy ondrilahy roa ary zanak’ondry efatra amby folo, izay iray taona avy, sady tsy misy kilema,

²¹ny fanatitra avy amin’ny zavamaniry ampombainy azy; ary koa fanatitra aidina ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

²²ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

²³Amin’ny andro fahefatra kosa dia vantotra ombilahy folo sy ondrilahy roa ary zanak’ondry efatra amby folo, izay iray taona avy, sady tsy misy kilema,

²⁴ampiana ny fanatitra avy amin’ny zavamaniry ampombaina azy sy ny fanatitra aidina, ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

²⁵ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

²⁶Amin’ny andro fahadimy indray, vantotra ombilahy sivy sy ondrilahy roa ary zanak’ondry efatra amby folo, izay iray taona avy, sady tsy misy kilema,

²⁷ao koa ny fanatitra avy amin’ny zavamaniry ampombaina azy sy ny fanatitra aidina, ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

²⁸ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

²⁹Amin’ny andro fahenina dia vantotra ombilahy valo sy ondrilahy roa ary zanak’ondry efatra amby folo, izay iray taona avy, sady tsy misy kilema,

³⁰ampiana ny fanatitra avy amin’ny zavamaniry hateriny, sy ny fanatitra aidina ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

³¹ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

³²Amin’ny andro fahafito dia vantotra ombilahy fito sy ondrilahy roa ary zanak’ondry efatra amby folo, izay iray taona avy, sady tsy misy kilema,

³³ary ny fanatitra avy amin’ny zavamaniry ampombaina azy sy ireo fanatitra aidina ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

³⁴ary osilahy iray ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

³⁵Ary amin’ny andro fahavalo dia hisy fivoriana ho anareo; aza manao raharaha mavesatra.

³⁶Izao kosa no atolory ho fanatitra dorana manontolo, dia fanatitra levonina amin’ny afo ho hanitra ankasitrahana ho an’NY TOMPO: Vantotra ombilahy iray sy ondrilahy iray ary zanak’ondry fito, izay iray taona avy, sady tsy misy kilema,

³⁷ampiana ny fanatitra avy amin’ny zavamaniry hatolotr’ireo sy ny fanatitra aidina ampombaina ny vantotra ombilahy sy ny ondrilahy ary ny zanak’ondry, araka ny isany avy, araka ny fanao,

³⁸ary osilahy iray, ho fanatitra noho ny ota, ho fanampin’ny fanatitra mandrakariva, dorana manontolo, sy ny fanatitra avy amin’ny zavamaniry ampombaina azy ary ny fanatitra aidina ampombaina azy.

³⁹Ireo no hatolotrareo ho an’NY TOMPO amin’ny fotoam-pivavahanareo, ankoatra ny fanatitra fanalam-boadinareo, ny fanatitra an-tsitrapo izay hatolotrareo ho fanatitra dorana manontolo, ho fanatitra avy amin’ny zavamaniry, ho fanatitra aidina ary ho fanati-pihavanana.