Read La Bible en Malgache Nomery 3 Bible Online

Nomery 3 - La Bible en Malgache bible

Nomery 3

¹Izao no taranak’i Arona sy i Mosesy tamin’ny andro nitenenan’NY TOMPO tamin’i Mosesy teo amin’ny tendrombohitra Sinay.

²Toy izao ny anaran’ireo zanakalahin’i Arona: I Nadaba lahimatoa, i Abiho, i Eleazara ary Itamara.

³Ireo no anaran’ny zanakalahin’i Arona, dia ny mpisorona voahosotra, izay natokana hanao fisoronana.

⁴Maty teo anatrehan’NY TOMPO i Nadaba sy i Abiho tamin’izy ireo nanatitra afo tsy izy teo anatrehan’NY TOMPO tany amin’ny tany efitr’i Sinay, sady samy tsy nanan-janaka izy mirahalahy. Koa i Eleazara sy Itamara no nanao fisoronana teo anatrehan’i Arona rainy.

⁵Ary NY TOMPO niteny tamin’i Mosesy hoe:

⁶Ampanatony ny fokon’i Levy ka atsangano eo anatrehan’i Arona mpisorona mba hanampy azy.

⁷Hitandrina ny anjara raharahan’i Arona sy ny anjara raharahan’ny fiangonana manontolo eo anoloan’ny tranolay fihaonana* izy ireo ka hanao ny fanompoana ao amin’ny tabernakely*.

⁸Hitandrina ny fanaka rehetra momba ny tranolay fihaonana sy ny anjara raharahan’ny Zanak’Israely izy ireo ka hanao ny fanompoana ao amin’ny tabernakely.

⁹Homenao an’i Arona sy ireo zanany lahy ny levita*, fa efa nomena azy mihitsy avy amin’ny Zanak’Israely ireo.

¹⁰I Arona sy ireo zanany lahy no hotendrenao hitandrina ny fisoronany, fa raha olon-kafa no manakaiky dia hovonoina izy.

¹¹Ary NY TOMPO niteny tamin’i Mosesy hoe:

¹²Indro Aho efa naka ny levita avy tamin’ny Zanak’Israely ho solon’ny lahimatoa rehetra izay voalohan-teraka eo amin’ny Zanak’Israely, koa Ahy ny levita.

¹³Satria Ahy ny lahimatoa rehetra; tamin’ilay andro namelezako ny voalohan-teraka rehetra tany amin’ny tany Ejipta no nanamasinako ny voalohan-teraka rehetra eo amin’ny Israely ho Ahy, na olona, na biby fiompy: Ahy ireo. Izaho no TOMPO.

¹⁴Ary NY TOMPO niteny tamin’i Mosesy tany amin’ny tany efitr’i Sinay hoe:

¹⁵Isao ny levita* araka ny fianakaviany; ny lahy rehetra eo aminy hatramin’ny iray volana no ho miakatra no hisainao.

¹⁶Ary nanisa azy ireo i Mosesy araka ny tenin’NY TOMPO, dia araka izay efa nandidiana azy.

¹⁷Izao no zanakalahin’i Levy, araka ny anarany: I Gersona sy i Kehata ary i Merary.

¹⁸Ireto kosa ny anaran’ireo zanakalahin’i Gersona, araka ny fianakaviany: I Libny sy i Simey.

¹⁹Ny zanakalahin’i Kehata, araka ny fianakaviany, dia i Amrama, i Jizara, i Hebrona ary i Oziela.

²⁰Ny zanakalahin’i Merary indray, araka ny fianakaviany, dia i Maly sy i Mosy. Ireo no fokon’ny levita, araka ny fianakaviany.

²¹Avy tamin’i Gersona, ny fianakavian’ny Libnita sy ny Simeita: Ireo no fianakavian’ny Gersonita.

²²Izay voaisa, araka ny isan’ny lahy rehetra hatramin’ny iray volana no ho miakatra, dia dimanjato sy fito arivo.

²³Ny fianakavian’ny Gersonita dia hitoby eo ivohon’ny tabernakely*, avy eo andrefany.

²⁴Ny lohan’ny fianakavian’ny Gersonita dia i Eliasafa, zanak’i Laela.

²⁵Ny anjara raharahan’ireo zanak’i Gersona eo amin’ny tranolay fihaonana dia ny tabernakely, ny lay, ny rakotra eo aminy, ny varavarana lamba amin’ny varavaran’ny tranolay fihaonana*,

²⁶ny fefy lamba amin’ny kianja sy ny vavahady lamba amin’ny vavahadin’ny kianja izay manodidina ny tabernakely sy ny alitara, ary ny kofehy rehetra momba azy.

²⁷Avy tamin’i Kehata, ny fianakavian’ny Amramita, ny fianakavian’ny Jizarita, ny fianakavian’ny Hebronita ary ny fianakavian’ny Ozielita; ireo no fianakavian’ny Kehatita.

²⁸Ny isan’ny lahy rehetra hatramin’ny iray volana no ho miakatra, izay mpitandrina ny anjara raharaha momba ny fitoerana masina, dia eninjato sy valo arivo.

²⁹Ny fianakavian’ny zanak’i Kehata dia hitoby eo amin’ny lafiny atsimo amin’ny tabernakely.

³⁰Ny lohan’ny fianakavian’ny Kehatita dia i Elizafana, zanak’i Oziela.

³¹Ny anjara raharahany dia ny vata misy ny Vavolombelona, ny latabatra, ny fitoeran-jiro, ny alitara roa sy ireo fanaky ny fitoerana masina, izay ampiasaina amin’ny fanompoam-pivavahana, ary koa ny varavarana lamba mbamin’izay zavatra rehetra momba azy.

³²Ny lehiben’ireo lohan’ny levita dia i Eleazara, zanak’i Arona mpisorona, izay lehiben’ireo mpitandrina ny anjara raharaha ny amin’ny fitoerana masina.

³³Avy tamin’i Merary, ny fianakavian’ny Malita sy ny fianakavian’ny Mosita. Ireo no fianakavian’i Merary.

³⁴Izay voaisa, araka ny isan’ny lahy rehetra hatramin’ny iray volana no ho miakatra, dia roanjato sy enina arivo.

³⁵Ny lohan’ny fianakavian’i Merary dia i Zoriela, zanak’i Abihaila. Ireo no hitoby eo amin’ny lafiny avaratra amin’ny tabernakely.

³⁶Ny anjara raharahan’ny zanak’i Merary dia ny hazo fisaka amin’ny tabernakely, ny barany, ny andriny, ny faladiany ary ny fanaka rehetra momba azy mbamin’ny zavatra rehetra momba azy,

³⁷ireo andrin’ny kianja manodidina sy ny faladiany, ny tsatòkan-day ary ny kofehy momba azy.

³⁸Ny hitoby eo anoloan’ny tabernakely, eo atsinanany, izany hoe eo anoloan’ny tranolay fihaonana, tandrifin’ny fiposahan’ny masoandro, dia i Mosesy sy i Arona ary ireo zanany, izay mpitandrina ny anjara raharaha momba ny fitoerana masina, dia ny anjara raharahan’ny Zanak’Israely; fa raha olon-kafa no manakaiky dia hovonoina izy.

³⁹Ny tontalin’izay voaisa avy tamin’ny levita, dia izay nisain’i Mosesy sy i Arona araka ny didin’NY TOMPO, avy tamin’ny fianakaviany, ny lahy rehetra hatramin’ny iray volana no ho miakatra, dia roa arivo sy roa alina.

⁴⁰Hoy NY TOMPO tamin’i Mosesy: Isao ny lahimatoa rehetra eo amin’ny Zanak’Israely hatramin’ny iray volana no ho miakatra ka alao isa araka ny anarany.

⁴¹Alao ho Ahy ny levita* ho solon’ny lahimatoa rehetra eo amin’ny Zanak’Israely. Izaho no TOMPO. Ny biby fiompin’ny levita dia ho solon’ny voalohan-teraka rehetra amin’ny biby fiompin’ny Zanak’Israely.

⁴²Dia nisain’i Mosesy ny lahimatoa rehetra teo amin’ny Zanak’Israely, araka izay nandidian’NY TOMPO azy.

⁴³Ny lahimatoa rehetra izay nisaina, araka ny anarany tsirairay, hatramin’ny iray volana no ho miakatra, dia telo amby fitopolo sy roanjato sy roa arivo sy roa alina.

⁴⁴Ary NY TOMPO niteny tamin’i Mosesy hoe:

⁴⁵Alao ny levita ho solon’ny lahimatoa rehetra eo amin’ny Zanak’Israely, ary ny biby fiompin’ny levita ho solon’ny biby fiompiny. Ahy ny levita. Izaho no TOMPO.

⁴⁶Ny amin’ny fanavotana ireo telo amby fitopolo sy roanjato amin’ny lahimatoan’ny Zanak’Israely, izay mihoatra noho ny isan’ny levita,

⁴⁷dia hakanao sekela dimy isan’olona; araka ny sekela masina no hakanao azy, gera roapolo ny sekela iray.

⁴⁸Homenao an’i Arona sy ireo zanany ny vola ho fanavotana an’ireo mihoatra isa ireo.

⁴⁹Ary i Mosesy dia nandray ny vola avotr’ireo izay nihoatra tamin’ny isan’ireo voaavotry ny levita;

⁵⁰tamin’ny lahimatoan’ny Zanak’Israely no nandraisany ny vola, dia sekela dimy amby enimpolo sy telonjato sy arivo, araka ny sekela masina.

⁵¹Dia nomen’i Mosesy an’i Arona sy ireo zanany izany vola avotra izany, araka ny tenin’NY TOMPO, araka izay nandidian’NY TOMPO an’i Mosesy.