Read La Bible en Malgache Nomery 31 Bible Online

Nomery 31 - La Bible en Malgache bible

Nomery 31

¹Ary NY TOMPO niteny tamin’i Mosesy indray hoe:

²Valio noho ny nataony tamin’ny Zanak’Israely ny Midianita, ary rehefa afaka izany dia hangonina any amin’ny razanao ianao.

³Dia niteny tamin’ny olona i Mosesy hoe: Misia aminareo mandray fiadiana ka hanafika ny Midianita mba hahatanteraka ny famalian’NY TOMPO ny Midianita.

⁴Arivo lahy avy isam-poko amin’ny fokon’ny Israely no halefanareo hanafika.

⁵Dia navahana tamin’ny fokon’ny Israely ny arivo isam-poko, izany hoe roa arivo sy iray alina, samy mitam-piadiana.

⁶Nampandehanin’i Mosesy hanafika ireo arivo lahy isam-poko ireo sy i Finehasa, zanak’i Eleazara mpisorona, izay nitondra ny fanaka masina teny an-tanany, miaraka amin’ireo trompetra fanairana.

⁷Dia niady tamin’ny Midianita ireo, araka izay efa nandidian’NY TOMPO an’i Mosesy; dia matiny ny lehilahy rehetra.

⁸Ary matiny niaraka tamin’ireny koa ny mpanjakan’i Midiana dimy lahy, dia i Evy, i Rekema, i Zora, i Hora ary i Reba; ary i Balama, zanak’i Beora koa dia novonoiny tamin’ny sabatra.

⁹Nobaboin’ny Zanak’Israely koa ny vehivavy midianita sy ny zanany madinika; nalainy avokoa ny biby fiompiny rehetra sy ny omby aman’ondriny rehetra mbamin’ny fananany rehetra.

¹⁰Ary ny tanàna rehetra izay nonenany sy ny tobiny rehetra dia nodoran’izy ireo tamin’ny afo.

¹¹Dia nalainy avokoa ny babo rehetra, na olona na biby fiompy,

¹²ka noentiny tany amin’i Mosesy sy i Eleazara mpisorona ary ny fiangonan’ny Zanak’Israely teo an-toby, tany Arbota-Moaba izay eo amoron’i Jordana tandrifin’i Jeriko.

¹³Ary i Mosesy sy i Eleazara mpisorona mbamin’ny lohan’ny fiangonana rehetra dia nivoaka hitsena azy ireo teo ivelan’ny toby.

¹⁴Nefa tezitra tamin’ny mpifehy ny miaramila i Mosesy, dia tamin’ny mpifehy arivo sy ny mpifehy zato, izay avy nanafika,

¹⁵ka hoy izy tamin’ireo: Nahoana no navelanareo ho velona ny vehivavy rehetra?

¹⁶Ireo ihany no nampikomy ny Zanak’Israely tamin’NY TOMPO noho ny tenin’i Balama, tamin’ilay raharahan’i Peora, ka nahazo ny fiangonan’NY TOMPO ilay areti-mandringana.

¹⁷Koa ankehitriny, vonoy ny zazalahy madinika rehetra, ary vonoy koa ny vehivavy rehetra izay efa nahalala lahy.

¹⁸Fa ny zazavavy rehetra izay tsy mbola nahalala lahy kosa dia velomy ho anareo.

¹⁹Mitobia eo ivelan’ny toby mandritra ny hafitoana; ary izay nahafaty olona na nikasika faty dia samia manadio ny tenany amin’ny andro fahatelo sy ny andro fahafito, na ianareo, na ny olona babonareo.

²⁰Ny fitafiana rehetra na ny fanaka hoditra na ny fanaka volon’osy na ny fanaka hazo dia diovy avokoa.

²¹Ary hoy i Eleazara mpisorona tamin’ireo mpanafika, izay efa tany amin’ny ady: Izao no lalàna hotandremana, izay nandidian’NY TOMPO an’i Mosesy:

²²Ny volamena, ny volafotsy, ny varahina, ny vy, ny firapotsy ary ny firaka,

²³dia ny zavatra rehetra izay mahatanty afo, dia ataovy ao amin’ny afo mba hadio. Kanefa hodiovina amin’ny rano fanadiovana koa izy; ary izay rehetra tsy maharitra afo kosa dia ataovy ao amin’ny rano ihany.

²⁴Sasao koa ny fitafianareo amin’ny andro fahafito dia hadio ianareo, koa rehefa afaka izany vao mahazo miditra ao amin’ny toby ianareo.

²⁵Ary NY TOMPO niteny tamin’i Mosesy hoe:

²⁶Alaonao sy i Eleazara mpisorona sy ny lohan’ny fianakaviana ao amin’ny fiangonana ny isan’ny babo izay azo, na olona na biby fiompy.

²⁷Sasaho ny babo ho an’izay niady, dia ireo izay nanafika, sy ho an’ny fiangonana manontolo;

²⁸kanefa makà anjara ho an’NY TOMPO avy amin’ny mpanafika izay nandeha nanafika, dia iray isan-dimanjato, na olona na omby na boriky na ondry aman’osy;

²⁹ilay antsasany izay anjaran’ireo no hanalanao izany ka homenao an’i Eleazara mpisorona ho fanomezana ho an’NY TOMPO.

³⁰Ary ilay antsasany izay an’ny Zanak’Israely kosa dia analao iray isan-dimampolo, na olona na omby na boriky na ondry aman’osy, dia ny biby fiompy rehetra ka omeo ho an’ny levita* izay mitandrina ny anjara raharaha momba ny tabernakelin’NY TOMPO.

³¹Dia notanterahin’i Mosesy sy i Eleazara mpisorona izany, araka izay nandidian’NY TOMPO an’i Mosesy.

³²Ary ny babo sisa afa-tsy izay azon’ny mpanafika dia ondry aman’osy dimy arivo sy fito alina sy enina hetsy,

³³omby roa arivo sy fito alina,

³⁴boriky arivo sy enina alina

³⁵ary olona, dia ny zazavavy izay tsy mbola nahalala lahy, roa arivo sy telo alina.

³⁶Ireto ny antsasany izay anjaran’ny mpanafika: Dimanjato sy fito arivo sy telo alina sy telo hetsy ny ondry aman’osy;

³⁷ny anjaran’NY TOMPO avy tamin’ireo ondry aman’osy ireo dia dimy amby fitopolo sy eninjato.

³⁸Ny omby kosa dia enina arivo sy telo alina; ny anjaran’NY TOMPO avy tamin’ireo dia roa amby fitopolo.

³⁹Dimanjato sy telo alina ny boriky; ny anjaran’NY TOMPO avy tamin’ireo dia iraika amby enimpolo.

⁴⁰Ny olona indray dia enina arivo sy iray alina; ny anjaran’NY TOMPO avy tamin’ireo dia roa amby telopolo.

⁴¹Dia nomen’i Mosesy an’i Eleazara mpisorona ny fanomezana izay nalaina ho an’NY TOMPO, araka izay nandidian’NY TOMPO an’i Mosesy.

⁴²Avy tamin’ilay antsasany izay an’ny Zanak’Israely, izay nozarain’i Mosesy avy tamin’ny mpanafika,

⁴³dia ilay antsasany izay an’ny fiangonana; izany hoe ondry aman’osy dimanjato sy arivo sy telo alina sy telo hetsy,

⁴⁴omby enina arivo sy telo alina,

⁴⁵boriky dimanjato sy telo alina

⁴⁶ary olona enina arivo sy iray alina.

⁴⁷Tamin’ny antsasany izay an’ny Zanak’Israely no nanalan’i Mosesy iray isan-dimampolo, na olona na biby fiompy, ka nomeny ho an’ny levita mpitandrina ny anjara raharaha momba ny tabernakelin’NY TOMPO izany, araka izay nandidian’NY TOMPO an’i Mosesy.

⁴⁸Ary ireo mpifehy, izay nifehy ny miaramila, dia ny mpifehy arivo sy ny mpifehy zato, dia nanatona an’i Mosesy

⁴⁹ka niteny taminy hoe: Ny mpanomponao dia efa naka ny isan’ny mpanafika izay nofehezinay ka tsy misy diso isa aminay na dia lehilahy iray aza;

⁵⁰koa nitondra fanatitra ho an’NY TOMPO izahay, dia ny firavaka volamena efa azonay avy, dia fehin-tanana, haba, peratra fitombo-kase, kavina ary firavaka iambozonana, hanaovana fanavotana ho an’ny ainay eo anatrehan’NY TOMPO.

⁵¹Dia noraisin’i Mosesy sy i Eleazara mpisorona taminy ny volamena izay firavaka voatefy avokoa.

⁵²Ary ny volamena rehetra izay natokan’ny mpifehy arivo sy ny mpifehy zato ho fanomezana ho an’NY TOMPO dia sekela dimampolo sy fitonjato sy enina arivo sy iray alina

⁵³satria ny mpanafika dia samy namabo ho an’ny tenany.

⁵⁴Dia noraisin’i Mosesy sy i Eleazara mpisorona ny volamena nomen’ny mpifehy arivo sy ny mpifehy zato ka noentiny tao amin’ny tranolay fihaonana*, ho fahatsiarovana ho an’ny Zanak’Israely eo anatrehan’NY TOMPO.