Read La Bible en Malgache Nomery 34 Bible Online

Nomery 34 - La Bible en Malgache bible

Nomery 34

¹Ary NY TOMPO niteny tamin’i Mosesy hoe:

²Mandidia ny Zanak’Israely hoe: Raha tonga any amin’ny tany Kanana ianareo dia izao no tany izay ho azonareo ho lova, dia ny tany Kanana araka ny voafaritry ny sisintaniny.

³Ny lafiny atsimo amin’ny taninareo dia hatramin’ny tany efitra Zina, izay mifanolotra amin’i Edoma. Ny sisintaninareo atsimo dia hatramin’ny faran’ny Ranomasintsira[12],

⁴dia miolaka eo atsimon’ny fiakarana Akrabima, dia mandroso hatrany Zina, dia mahazo any atsimon’i Kadesy-Barnea, dia mahazo an’i Hazara-Adara ka mandroso hatrany Azmona;

⁵ary miolaka hatreo Azmona ka hatrany amin’ny lohasahan-driakan’i Ejipta, ary mipaka hatrany amin’ny ranomasina.

⁶Ny amin’ny sisintany andrefana dia indro ny Ranomasina Lehibe sy ny morony, koa hatreo no ho sisintaninareo andrefana.

⁷Izao no ho sisintaninareo avaratra: Hatreo amin’ny Ranomasina Lehibe dia ny tendrombohitra Hora no hotandrifìnareo;

⁸avy eo amin’ny tendrombohitra Hora dia ny lalana mankany Hamata no hotandrifìnareo ary hahazo an’i Zedada ny sisintany;

⁹dia hahazo an’i Zifrona ka hipaka hatrany Hazara-Enana; izany no ho sisintaninareo avaratra.

¹⁰Ary ny ho sisintaninareo atsinanana dia farito hatreo Hazara-Enana ka hatrany Sefama,

¹¹ary hidina avy ao Sefama hatrany Ribla any atsinanan’i Aina, dia mbola hidina ihany koa ka hipaka amin’ny moron’ny ranomasin’i Kinereta, any atsinanana;

¹²ary hidina indray hatrany Jordana ny sisintany ka hipaka amin’ny Ranomasintsira. Izany no ho taninareo araka ny sisintaniny manodidina.

¹³Ary nandidy ny Zanak’Israely i Mosesy hoe: Izany no tany izay hozarainareo araka ny antsapaka, dia izay andidian’NY TOMPO mba homena ny foko sivy sy ny antsasaky ny fokon’i Manase;

¹⁴fa ny foko taranak’i Robena araka ny fianakaviany sy ny foko taranak’i Gada araka ny fianakaviany dia efa nandray ny zarataniny, ary ny antsasaky ny fokon’i Manase koa dia efa nandray ny zarataniny.

¹⁵Ireo ny foko roa sy sasany izay samy efa nandray ny zarataniny atỳ andafy atsinanan’i Jordana, hitsin’i Jeriko, tandrifin’ny fiposahan’ny masoandro.

¹⁶Ary NY TOMPO niteny tamin’i Mosesy hoe:

¹⁷Ireto ny anaran’ny lehilahy izay hizara ny tany ho anareo: I Eleazara mpisorona sy i Josoa, zanak’i Nona.

¹⁸Ary loholona iray avy amin’ny foko tsirairay koa no halainareo hizara ny tany.

¹⁹Izao no anaran’ireo lehilahy ireo: Ny avy amin’ny fokon’i Joda dia i Kaleba, zanak’i Jefone;

²⁰ny avy amin’ny foko taranak’i Simeona dia i Semoela, zanak’i Amihoda;

²¹ny avy amin’ny fokon’i Benjamina dia i Elidada, zanak’i Kislona;

²²ny lehiben’ny foko taranak’i Dana dia i Bokỳ, zanak’i Jogly;

²³ny avy amin’ny taranak’i Josefa: Ny lehiben’ny foko taranak’i Manase dia i Haniela, zanak’i Efoda;

²⁴ny lehiben’ny foko taranak’i Efraima dia i Kemoela, zanak’i Siftana;

²⁵ny lehiben’ny foko taranak’i Zebolona dia i Elizafana, zanak’i Parnaka;

²⁶ny lehiben’ny foko taranak’Isakara dia i Paltiela, zanak’i Azana;

²⁷ny lehiben’ny foko taranak’i Asera dia i Ahihoda, zanak’i Selomy;

²⁸ny lehiben’ny foko taranak’i Naftaly dia i Pedahela, zanak’i Amihoda.

²⁹Ireo no nodidian’NY TOMPO hizara ny tany Kanana ho an’ny Zanak’Israely.