Read La Bible en Malgache Nomery 35 Bible Online

Nomery 35 - La Bible en Malgache bible

Nomery 35

¹Ary NY TOMPO niteny tamin’i Mosesy tany amin’ireo tany lemaka ngazana tany Moaba, teo amoron’i Jordana, tandrifin’i Jeriko, hoe:

²Mandidia ny Zanak’Israely mba hanome tanàna ao amin’ny zarataniny avy honenan’ny levita*. Homenareo tany manodidina ny tanàna koa izy.

³Ireo tanàna ireo no ho fonenany; ary ny tany dia ho an’ny biby fiompiny sy ny fananany mbamin’ny bibiny rehetra.

⁴Ny tany manodidina ny tanàna izay homenareo ny levita dia izao: Hatreo amin’ny mandan’ny tanàna ka hatrany amin’ny sisin’ny tany manodidina dia arivo hakiho*.

⁵Handrefy roa arivo hakiho eo ivelan’ny tanàna ianareo amin’ny lafiny atsinanana. Roa arivo hakiho amin’ny lafiny atsimo, roa arivo hakiho amin’ny lafiny andrefana, roa arivo hakiho amin’ny lafiny avaratra, ary ny tanàna dia ho eo afovoany. Izany no ho taniny manodidina ny tanàna.

⁶Ny tanàna homenareo ny levita dia tanàna fialofana, enina izay ho fandosiran’izay nahafaty olona, ary tanàna roa amby efapolo koa ambonin’ireo.

⁷Koa ny tanàna rehetra izay homenareo ny levita dia valo amby efapolo mbamin’ny tany manodidina azy.

⁸Ny amin’ny tanàna izay homenareo avy amin’ny zaratanin’ny Zanak’Israely dia izay be no hanalanareo be ary izay kely no hanalanareo kely. Samy hanome tanàna ho an’ny levita izy rehetra araka ny zarataniny avy.

⁹Ary NY TOMPO niteny tamin’i Mosesy hoe:

¹⁰Mitenena amin’ny Zanak’Israely hoe: Rehefa tafita an’i Jordana ianareo ka tonga any amin’ny tany Kanana

¹¹dia hifidy tanàna ianareo, ho tanàna fialofana ho anareo mba handosiran’izay nahafaty olona tsy nahy.

¹²Ho fialofana ho anareo izany tanàna izany mba tsy ho azon’ny mpamaly ra ka tsy ho faty izay nahafaty olona, mandra-pisehony hotsaraina eo anatrehan’ny fiangonana.

¹³Ireo tanàna homenareo dia tanàna enina ho fialofana ho anareo.

¹⁴Tanàna telo no homenareo etỳ andafin’i Jordana ary tanàna telo no homenareo ao amin’ny tany Kanana; ho tanàna fialofana ireo.

¹⁵Ireo tanàna enina ireo dia ho fialofana ho an’ny Zanak’Israely sy ny mpifindra monina ary izay vahiny mandalo eo anivony mba handosiran’izay rehetra nahafaty olona tsy nahy.

¹⁶Kanefa raha misy mamely olona amin’ny vy ka mahafaty azy dia mpamono olona izy; hovonoina ho faty izay namono olona.

¹⁷Raha misy mamely olona amin’ny vato ka mahafaty azy dia mpamono olona izy; hovonoina ho faty izay namono olona.

¹⁸Raha misy mamely olona amin’ny hazo ka mahafaty azy dia mpamono olona izy; hovonoina ho faty izay namono olona.

¹⁹Ny mpamaly ra no hamono azy; rehefa mifanena aminy izy dia izy no hamono azy.

²⁰Raha misy manosika olona noho ny lolompo na mitoraka olona amin’ny fanotrehana ka mahafaty azy

²¹na mamely olona amin’ny tanany noho ny fandrafiana ka mahafaty azy dia hovonoina ho faty ilay namely satria mpamono olona izy. Ny mpamaly ra no hamono azy rehefa mifanena aminy izy.

²²Fa raha misy nahatosika olona tsy nahy, fa tsy noho ny fandrafiana, na nahatoraka olona na amin’inona na amin’inona, nefa tsy tamin’ny fanotrehana,

²³na sendra nanjera vato nahafaty olona, nefa tsy hitany ilay olona fa nianjera taminy ilay vato ary tsy fahavalony ilay olona sady tsy nitady handratra azy izy,

²⁴dia hotsarain’ny fiangonana ilay namely sy ny mpamaly ra araka ireo lalàna ireo.

²⁵Hovonjen’ny fiangonana ho afaka amin’ny mpamaly ra ilay nahafaty olona ka hateriny indray ho ao amin’ny tanàna fialofana izay nalehany tamin’izy nandositra. Dia hitoetra ao izy mandra-pahafatin’ny Mpisoronabe* izay voahosotra tamin’ny diloilo masina.

²⁶Fa raha mivoaka ho eny ivelan’ny tanàna fialofana izay nalehany tamin’izy nandositra ilay nahafaty olona

²⁷ka hitan’ny mpamaly ra eny ivelan’ny tanàna dia azony vonoina izy; ary tsy hisy valin-dra amin’izany

²⁸satria tokony hitoetra tao an-tanàna fialofana izy mandra-pahafatin’ny Mpisoronabe; fa rehefa maty ny Mpisoronabe dia mahazo mody any amin’ny zarataniny ihany ilay nahafaty olona.

²⁹Izany dia ho lalàna hitondrana anareo hatramin’ny taranakareo fara aman-dimby any amin’izay rehetra onenanareo.

³⁰Raha misy vonoana olona dia hovonoina izay nahafaty rehefa noporofoin’ny vavolombelona maromaro; fa raha vavolombelona iray monja dia tsy ampy hanamelohana olona ho faty izany.

³¹Ianareo dia tsy handray avotr’aina avy amin’izay namono olona, izay meloka ka tokony ho faty, fa hovonoina ho faty izy.

³²Ary ianareo dia tsy handray vola avotra avy amin’izay nandositra ho ao an-tanàna fialofany mba hodiany indray honina amin’ny taniny raha tsy mbola maty akory ny mpisorona.

³³Aza mandoto ny tany izay onenanareo, fa ny ra dia fandotoana ny tany; ary ny tany dia tsy azo anaovana fanavotana ny amin’ny ra izay nalatsaka teo, afa-tsy amin’ny ran’izay nandatsaka azy ihany.

³⁴Aza lotoina ny tany onenanareo izay itoerako; fa Izaho TOMPO no mitoetra eo anivon’ny Zanak’Israely.