Read La Bible en Malgache Nomery 36 Bible Online

Nomery 36 - La Bible en Malgache bible

Nomery 36

¹Dia nanatona ireo loham-pianakaviana tamin’ny fokon’ireo taranak’i Gileada, zanak’i Makira, zanak’i Manase, avy tamin’ny fianakavian’ireo taranak’i Josefa, ka niteny teo anatrehan’i Mosesy sy teo anatrehan’ireo lehibe, izay loham-pianakaviana tamin’ny Zanak’Israely hoe:

²Ianao, tompokolahy, dia efa nodidian’NY TOMPO hizara ny tany ho an’ny Zanak’Israely amin’ny antsapaka. Ary ianao, tompokolahy, dia efa nodidian’NY TOMPO hanome ny zaratanin’i Zelofada rahalahinay ho an’ny zanany vavy.

³Koa raha manambady ny zanakalahin’ny foko sasany amin’ny Zanak’Israely ireo dia hesorina amin’izay an’ny razanay ny zarataniny ka hanampy ny zaratanin’ny firenena izay hatoniny, dia hesorina amin’ny zarataninay izay azonay tamin’ny antsapaka izany.

⁴Ary raha tonga ny Jobilin’ny Zanak’Israely, ny zarataniny dia hanampy ny an’ny foko izay hatoniny, ary izay azy dia hesorina amin’ny zaratanin’ny razanay.

⁵Ary nandidy ny Zanak’Israely araka ny tenin’NY TOMPO i Mosesy hoe: Marina ny tenin’ireo foko taranak’i Josefa.

⁶Izao no teny izay andidian’NY TOMPO ny amin’ny zanakavavin’i Zelofada: Mahazo manambady izay tiany izy, nefa avy ao amin’ny fokon’ny razany ihany no hovadiny.

⁷Tsy hafindra foko ny zaratanin’ny firenen’ny Zanak’Israely fa samy hifikitra ao amin’ny zaratanin’ny razany avy.

⁸Ary ny zazavavy rehetra izay mandova zaratany eo amin’ny foko iray amin’ny Zanak’Israely dia hanambady lehilahy avy ao amin’ny fokon’ny razany ihany mba hananan’ny Zanak’Israely rehetra ny zaratanin’ny razany avy.

⁹Aoka tsy hisy hifindra foko ny zaratany samihafa, fa samy hifikitra eo amin’ny azy avy ny Zanak’Israely.

¹⁰Araka izay nandidian’NY TOMPO an’i Mosesy no nataon’ny zanakavavin’i Zelofada,

¹¹koa i Mahala, i Tirza, i Hogla, i Milka ary i Noa, zanakavavin’i Zelofada, dia samy nanambady ny zanaky ny rahalahin-drainy avy.

¹²Izay avy tamin’ny fokon’ny taranak’i Manase, zanak’i Josefa, no novadin’ireo, dia nitoetra teo amin’ny fokon’ny mpianakavin’ny rainy ihany ny zarataniny.

¹³Ireo no didy sy fitsipika izay nandidian’NY TOMPO ka nampitondrainy an’i Mosesy ho amin’ny Zanak’Israely tany Arbota-Moaba, teo amoron’i Jordana, tandrifin’i Jeriko.