Read La Bible en Malgache Nomery 4 Bible Online

Nomery 4 - La Bible en Malgache bible

Nomery 4

¹Ary NY TOMPO niteny tamin’i Mosesy sy i Arona hoe:

²Alao isa ny taranak’i Kehata ao amin’ny taranak’i Levy, araka ny fokony sy ny fianakaviany,

³hatramin’ny telopolo taona ka hatramin’ny dimampolo taona, dia izay rehetra azo alefa hanafika, fa hanao fanompoana ao amin’ny tranolay fihaonana* ireo.

⁴Izao no ho fanompoan’ny taranak’i Kehata ao amin’ny tranolay fihaonana, dia ny zavatra masina indrindra:

⁵Rehefa hiainga ny toby dia hiditra i Arona sy ireo zanany ka hampidina ny efitra lamba fanakonana, ary hasarony ny vata misy ny Vavolombelona izany;

⁶hoditra trozona no hataony sarona eo amboniny, koa lamba volon’ondry manga tokam-bolo no hovelariny ary hasarony eo ambonin’io, dia hataony eo aminy ny baony.

⁷Hamelatra lamba volon’ondry manga eo ambonin’ny latabatry ny mofo atao fanatitra izy ireo ka hataony eo ny lovia, ny lovia kely, ny kapoaka ary ny kapoaka lehibe fandrarahana divay; ary ny mofo atao fanatitra dia hataony eo amboniny.

⁸Hovelarany lamba jaky eo ambonin’io ka hosaronany amin’ny rakotra hoditra trozona izany, dia hataony eo aminy ny baony.

⁹Haka lamba volon’ondry manga indray izy ka hasarony ny fitoeran-jiro fanazavana, ireo jirony, hetin-jirony sy fitoeran-davenon-jirony ary ireo fitaovany fitoeran-diloilo rehetra, izay anaovana ny fanompoam-pivavahana;

¹⁰ireo sy ny fanaka rehetra momba azy dia hataony ao anatin’ny sarona hoditra trozona ka hapetrany eo ambonin’ny filanjana azy.

¹¹Hamelatra lamba manga eo ambonin’ny alitara volamena izy, dia hosaronany rakotra hoditra trozona, ary hataony eo aminy ny baony.

¹²Avy eo dia halainy ny fanaka rehetra fitondra manompo, dia izay fanaovany fanompoam-pivavahana ao amin’ny fitoerana masina ka hataony ao anaty lamba volon’ondry manga, ary hosaronany rakotra hoditra trozona, dia hapetrany eo ambonin’ny filanjana azy.

¹³Dia hanaisotra ny lavenona amin’ny alitara izy ka hamelatra lamba volomparasy eo amboniny.

¹⁴Hapetrany eo amboniny avokoa ny fanaka rehetra momba azy, izay fampiasa amin’ny fanompoam-pivavahana, dia ny fitondrana afony, ny fitrebiny, ny sotron’afony ary ny loviany famafazana, dia ireo fanaka rehetra momba ny alitara; hovelarany rakotra hoditra trozona eo amboniny dia hataony eo aminy ny baony.

¹⁵Rehefa vitan’i Arona sy ireo zanany ny manarona ny fitoerana masina sy ireo fanaka rehetra momba azy ka efa hifindra ny toby, dia izay vao ho avy ireo zanak’i Kehata hitondra azy; satria tsy hikasika ny fitoerana masina izy ireo sao ho faty. Izany no anjara asan’ireo taranak’i Kehata ao amin’ny tranolay fihaonana.

¹⁶Ary i Eleazara, zanak’i Arona mpisorona, dia hanara-maso ny diloilo hatao fanazavana, ny ditin-kazo mani-pofona, ny fanatitra avy amin’ny zavamaniry fanao isanandro ary ny diloilo fanosorana; hanara-maso ny tabernakely* manontolo sy izay rehetra ao anatiny izy, ao amin’ny fitoerana masina sy ireo fanaka momba azy.

¹⁷Ary NY TOMPO niteny tamin’i Mosesy sy i Arona hoe:

¹⁸Ataovy izay tsy hahafongotra ny fianakavian’ny Kehatita izay naman’ny levita*.

¹⁹Izao no hataonareo aminy mba ho velona izy fa tsy ho faty, raha manatona ny zavatra masina indrindra: I Arona sy ireo zanany no ho avy ka hanendry ny olona samy ho amin’izay fanompoany sy ny asany avy.

²⁰Tsy hiditra hijery ny zava-masina izy ireo na dia indray mipy maso akory aza fandrao maty.

²¹Ary NY TOMPO niteny tamin’i Mosesy hoe:

²²Alao isa koa ny taranak’i Gersona, araka ny fianakaviany sy ny fokony avy;

²³izay hatramin’ny telopolo taona ka hatramin’ny dimampolo taona no hisainao, dia izay rehetra azo alefa hanafika, fa hanao fanompoana ao amin’ny tranolay fihaonana* izy ireo.

²⁴Izao no anjaran’ny fianakavian’ny Gersonita amin’ny fanompoana sy ny entana tokony hoentiny:

²⁵Ny ambain’ny tabernakely* sy ny tranolay fihaonana, ny rakotra sy ny sarona hoditra trozona izay eo amboniny, ny varavarana lamba amin’ny varavaran’ny tranolay fihaonana,

²⁶ny fefy lamban’ny kianja sy ny vavahady lamba amin’ny vavahadin’ny kianja, izay manodidina ny tabernakely sy ny alitara, ny kofehy mbamin’ny fiasana rehetra momba azy. Izay asa rehetra momba ireo no ho fanompoany.

²⁷Araka ny tenin’i Arona sy ireo zanany no hanaovan’ny Gersonita ny fanompoany amin’ny fitondrana ny entana sy ny fanompoany rehetra; hatolotrao azy ho anjara raharahany ny zavatra rehetra izay entiny.

²⁸Izany no ho fanompoan’ny fianakavian’ny Gersonita momba ny tranolay fihaonana; ny ho mpifehy azy amin’izany anjara raharahany izany dia Itamara, zanak’i Arona mpisorona.

²⁹Ny amin’ny taranak’i Merary, dia araka ny fokony sy ny fianakaviany no handaminanao azy;

³⁰izay hatramin’ny telopolo taona ka hatramin’ny dimampolo taona no hisainao, dia izay rehetra tokony hanafika, fa hanao ny fanompoana momba ny tranolay fihaonana* izy ireo.

³¹Izao no ho anjara raharahany ny amin’ny entana araka ny fanompoana rehetra ao amin’ny tranolay fihaonana: Ireo hazo fisaka amin’ny tabernakely* sy ny barany, ny andriny sy ny faladiany,

³²ireo andrin’ny kianja manodidina sy ny faladiany, ny tsatòkan-day rehetra ary ny kofehy momba ny fiasana rehetra mbamin’ny zavatra rehetra enti-manao fanompoana ao. Araka ny anarany avy no hanisanareo ny fanaka, izay anjara entany.

³³Izany no ho fanompoan’ny fianakavian’ny taranak’i Merary, araka ny fanompoany rehetra ao amin’ny tranolay fihaonana, ary Itamara, zanak’i Arona mpisorona, no ho mpifehy azy.

³⁴Ary i Mosesy sy i Arona mbamin’ireo lohan’ny fiangonana nanisa dia ny taranaky ny Kehatita, araka ny fokony sy ny fianakaviany avy,

³⁵hatramin’ny telopolo taona ka hatramin’ny dimampolo taona, dia izay rehetra tokony hanafika, fa hanao fanompoana ao amin’ny tranolay fihaonana* izy ireo.

³⁶Izay voaisa taminy, araka ny fianakaviany, dia dimampolo sy fitonjato sy roa arivo.

³⁷Ireo no voaisa tamin’ny fianakavian’ny Kehatita, dia izay rehetra manao fanompoana ao amin’ny tranolay fihaonana, izay nisain’i Mosesy sy i Arona araka ny didin’NY TOMPO nampitondrainy an’i Mosesy.

³⁸Izay voaisa tamin’ny taranak’i Gersona, araka ny fokony sy ny fianakaviany,

³⁹hatramin’ny telopolo taona ka hatramin’ny dimampolo taona, dia izay rehetra tokony hanafika, fa hanao fanompoana ao amin’ny tranolay fihaonana.

⁴⁰Izay voaisa taminy, araka ny fokony sy ny fianakaviany, dia telopolo sy eninjato sy roa arivo.

⁴¹Ireo no voaisa tamin’ny fokon’ny taranak’i Gersona, dia izay rehetra manao fanompoana ao amin’ny tranolay fihaonana ka nalamin’i Mosesy sy i Arona araka ny didin’NY TOMPO.

⁴²Ary izay voaisa tamin’ny fianakavian’ny taranak’i Merary, araka ny fokony sy ny fianakaviany,

⁴³hatramin’ny telopolo taona ka hatramin’ny dimampolo taona, dia izay rehetra afaka hanafika, fa hanao fanompoana ao amin’ny tranolay fihaonana,

⁴⁴izay voaisa taminy, araka ny fianakaviany, dia roanjato sy telo arivo.

⁴⁵Ireo no voaisa tamin’ny fianakavian’ny taranak’i Merary, izay nisain’i Mosesy sy i Arona araka ny didin’NY TOMPO nampitondrainy an’i Mosesy.

⁴⁶Ny tontalin’ny taranak’i Levy izay voaisan’i Mosesy sy i Arona mbamin’ireo lehiben’ny Israely, araka ny fokony sy ny fianakaviany,

⁴⁷hatramin’ny telopolo taona ka hatramin’ny dimampolo taona, dia izay rehetra niditra hanao raharaha amin’ny fanompoana, dia ny fanompoana ny amin’ny fitondrana entana ao amin’ny tranolay fihaonana.

⁴⁸Izay voaisa taminy dia valopolo sy dimanjato sy valo arivo.

⁴⁹Araka ny didin’NY TOMPO nampitondrainy an’i Mosesy no nandaminany azy samy ho amin’ny fanompoany avy sy ny anjara entany avy. Nomena andraikitra araka izay nandidian’NY TOMPO an’i Mosesy ireo.