Read La Bible en Malgache Nomery 7 Bible Online

Nomery 7 - La Bible en Malgache bible

Nomery 7

¹Tamin’ny andro nahavitan’i Mosesy ny fananganana ny tabernakely* dia nanosotra sy nanamasina azy sy ny fanaka rehetra momba azy ary ny alitara sy ny fanaka rehetra momba azy izy, nanosotra sy nanamasina ireo izy.

²Dia nitondra fanatitra ireo lohan’ny firenen’ny Israely, dia ny lohan’ny fianakaviana isanisany; ireo no lohan’ny fokony avy, izay nifehy ny voaisa.

³Ary izy ireo dia nitondra ny fanatiny teo anatrehan’NY TOMPO, dia sarety enina mirakotra sy omby roa amby folo, koa sarety iray sy omby iray avy ny avy tamin’ny lehiben’ny firenena roa, ary omby iray avy; dia noentin’izy ireo teo anoloan’ny tabernakely izany.

⁴Ary NY TOMPO niteny tamin’i Mosesy hoe:

⁵Raiso avy aminy ireo hanaovana ny fanompoana momba ny tranolay fihaonana* ka omeo ny levita*, dia samy araka ny fanompoany avy.

⁶Dia noraisin’i Mosesy ny sarety sy ny omby ka nomeny ny levita.

⁷Sarety roa sy omby efatra no nomeny ho an’ny taranak’i Gersona, araka ny fanompoany;

⁸ary sarety efatra sy omby valo no nomeny ho an’ny taranak’i Merary, araka ny fanompoany teo ambany fitarihan’Itamara, zanak’i Arona mpisorona.

⁹Fa ny taranak’i Kehata kosa tsy mba nomeny na dia iray akory aza, satria ny fanompoana momba ny fitoerana masina no anjarany, ary eo an-tsorony ihany no hilanjany azy.

¹⁰Ireo lohan’ny foko kosa no nanolotra fanatitra ho amin’ny fitokanana ny alitara amin’ny andro izay hanosorana azy; samy nanolotra ny fanatiny teo anoloan’ny alitara ireo lohan’ny foko.

¹¹Hoy NY TOMPO tamin’i Mosesy: Aoka ireo lohan’ny foko hanolotra ny fanatiny, samy araka ny androny avy, ho amin’ny fitokanana ny alitara.

¹²I Nasona, zanak’i Aminadaba, avy tamin’ny fokon’i Joda no nanolotra ny fanatiny tamin’ny andro voalohany.

¹³Lovia volafotsy iray, milanja sekela telopolo amby zato no fanatiny; miaraka amin’io koa, lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

¹⁴lovia kely volamena iray, sekela folo, feno ditin-kazo manitra;

¹⁵ny ho fanatitra dorana manontolo dia vantotra ombilahy iray sy ondrilahy iray ary zanak’ondry iray izay iray taona;

¹⁶osilahy iray no ho fanatitra noho ny ota;

¹⁷ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Nasona, zanak’i Aminadaba.

¹⁸Tamin’ny andro faharoa dia i Netanela, zanak’i Zoara, lohan’ny taranak’i Isakara, no nanolotra ny fanatiny.

¹⁹Nanolotra ny fanatiny izy, dia lovia volafotsy iray, sekela telopolo amby zato no lanjany, lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

²⁰lovia kely volamena iray, sekela folo, feno ditin-kazo manitra;

²¹ary vantotra ombilahy iray sy ondrilahy iray ary zanak’ondry iray izay iray taona kosa no ho fanatitra dorana manontolo;

²²osilahy iray, ho fanatitra noho ny ota;

²³ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Netanela, zanak’i Zoara.

²⁴Tamin’ny andro fahatelo dia ny lohan’ny taranak’i Zebolona, i Eliaba, zanak’i Helona, no nanolotra ny fanatiny.

²⁵Ny fanatiny dia lovia volafotsy iray, sekela telopolo amby zato no lanjany, lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

²⁶lovia kely volamena iray, sekela folo, feno ditin-kazo manitra;

²⁷vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

²⁸osilahy iray ho fanatitra noho ny ota;

²⁹ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Eliaba, zanak’i Helona.

³⁰Tamin’ny andro fahefatra dia ny lohan’ny taranak’i Robena, i Elizora, zanak’i Sedeora, no nanolotra ny fanatiny.

³¹Ny fanatiny dia lovia volafotsy iray, sekela telopolo amby zato no lanjany, lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

³²lovia kely volamena iray, sekela folo, feno ditin-kazo manitra;

³³vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

³⁴osilahy iray, ho fanatitra noho ny ota;

³⁵ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Elizora, zanak’i Sedeora.

³⁶Tamin’ny andro fahadimy dia ny lohan’ny taranak’i Simeona, i Selomiela, zanak’i Zorisaday, no nanolotra ny fanatiny.

³⁷Lovia volafotsy iray kosa no fanatiny, sekela telopolo amby zato no lanjany, dia lovia volafotsy iray famafazana, sekela fitopolo, araka ny sekela masina; izy roa ireo dia samy feno koba tsara toto voaharo diloilo, ho fanatitra avy amin’ny zavamaniry;

³⁸lovia kely volamena iray, sekela folo, feno ditin-kazo manitra;

³⁹vantotra ombilahy iray, ondrilahy iray, zanak’ondry izay iray taona, iray, ho fanatitra dorana manontolo;

⁴⁰osilahy iray ho fanatitra noho ny ota;

⁴¹ary ho fanati-pihavanana dia omby roa, ondrilahy dimy, osilahy dimy, zanak’ondry izay iray taona, dimy; ireo no fanatitr’i Selomiela, zanak’i Zorisaday.

⁴²Tamin’ny andro fahenina dia ny lohan’ny taranak’i Gada, i Eliasafa, zanak’i Deoela, no nanolotra.

⁴³Ny fanatiny dia lovia volafotsy iray, sekela telopolo amby zato no lanjany, ary lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

⁴⁴lovia kely volamena iray, sekela folo, feno ditin-kazo manitra;

⁴⁵vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

⁴⁶osilahy iray, ho fanatitra noho ny ota;

⁴⁷ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Eliasafa, zanak’i Deoela.

⁴⁸Tamin’ny andro fahafito dia ny lohan’ny taranak’i Efraima, i Elisama, zanak’i Amihoda, no nanatitra.

⁴⁹Lovia volafotsy iray, milanja sekela telopolo amby zato no fanatiny, dia lovia volafotsy iray famafazana, sekela fitopolo, araka ny sekela masina; izy roa ireo dia samy feno koba tsara toto voaharo diloilo, ho fanatitra avy amin’ny zavamaniry;

⁵⁰lovia kely volamena iray, sekela folo, feno ditin-kazo manitra;

⁵¹vantotra ombilahy iray, ondrilahy iray, zanak’ondry iray taona iray, ho fanatitra dorana manontolo;

⁵²osilahy iray, ho fanatitra noho ny ota;

⁵³ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Elisama, zanak’i Amihoda.

⁵⁴Tamin’ny andro fahavalo dia ny lohan’ny taranak’i Manase, i Gamaliela, zanak’i Pedazora, no nanatitra.

⁵⁵Ny fanatiny dia lovia volafotsy iray, sekela telopolo amby zato no lanjany, sy lovia volafotsy iray famafazana, sekela fitopolo, araka ny sekela masina; izy roa ireo dia samy feno koba tsara toto voaharo diloilo, ho fanatitra avy amin’ny zavamaniry;

⁵⁶lovia kely volamena iray, sekela folo, feno ditin-kazo manitra;

⁵⁷vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

⁵⁸osilahy iray, ho fanatitra noho ny ota;

⁵⁹ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Gamaliela, zanak’i Pedazora.

⁶⁰Tamin’ny andro fahasivy dia ny lohan’ny taranak’i Benjamina, i Abidana, zanak’i Gideony.

⁶¹Ny fanatiny kosa dia lovia volafotsy iray, sekela telopolo amby zato no lanjany, lovia volafotsy iray famafazana koa, sekela fitopolo, araka ny sekela masina; izy roa ireo dia samy feno koba tsara toto voaharo diloilo, ho fanatitra avy amin’ny zavamaniry;

⁶²lovia kely volamena iray, sekela folo, feno ditin-kazo manitra;

⁶³vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

⁶⁴osilahy iray, ho fanatitra noho ny ota;

⁶⁵ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Abidana, zanak’i Gideony.

⁶⁶Tamin’ny andro fahafolo dia ny lohan’ny taranak’i Dana, i Ahiezera, zanak’i Amisaday, no nanolotra ny fanatiny.

⁶⁷Ny fanatiny dia lovia volafotsy iray, sekela telopolo amby zato no lanjany, lovia volafotsy iray famafazana, sekela fitopolo, araka ny sekela masina; samy feno koba tsara toto voaharo diloilo, ho fanatitra avy amin’ny zavamaniry izy roa;

⁶⁸lovia kely volamena iray, sekela folo, feno ditin-kazo manitra;

⁶⁹vantotra ombilahy iray, ondrilahy iray, zanak’ondry iray izay iray taona kosa no ho fanatitra dorana manontolo;

⁷⁰osilahy iray, ho fanatitra noho ny ota;

⁷¹ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Ahiezera, zanak’i Amisaday.

⁷²Tamin’ny andro fahiraika amby folo indray dia ny lohan’ny taranak’i Asera, i Pagiela, zanak’i Okrana, no nanatitra.

⁷³Ny fanatiny koa dia lovia volafotsy iray, sekela telopolo amby zato no lanjany, lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

⁷⁴lovia kely volamena iray, sekela folo, feno ditin-kazo manitra;

⁷⁵vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

⁷⁶osilahy iray, ho fanatitra noho ny ota;

⁷⁷ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Pagiela, zanak’i Okrana.

⁷⁸Tamin’ny andro faharoa amby folo, dia ny lohan’ny taranak’i Naftaly, i Ahira, zanak’i Enana, no nanatitra.

⁷⁹Lovia volafotsy iray milanja sekela telopolo amby zato no fanatiny, dia lovia volafotsy iray famafazana, sekela fitopolo, araka ny sekela masina; izy roa dia samy feno koba tsara toto voaharo diloilo, ho fanatitra avy amin’ny zavamaniry;

⁸⁰lovia kely volamena iray, sekela folo, feno ditin-kazo manitra;

⁸¹vantotra ombilahy iray, ondrilahy iray, zanak’ondry iray izay iray taona, ho fanatitra dorana manontolo;

⁸²osilahy iray no ho fanatitra noho ny ota;

⁸³ary ho fanati-pihavanana dia omby roa, ondrilahy dimy, osilahy dimy, zanak’ondry dimy izay iray taona; ireo no fanatitr’i Ahira, zanak’i Enana.

⁸⁴Ireo no zavatra naterin’ireo lohan’ny Israely ho amin’ny fitokanana ny alitara tamin’ny andro izay hanosorana azy: Lovia volafotsy roa amby folo, lovia volafotsy famafazana roa amby folo, lovia kely volamena roa amby folo;

⁸⁵sekela telopolo amby zato avy no lanjan’ny lovia volafotsy, sekela fitopolo avy ny lovia famafazana; ny lanjan’ny volafotsy rehetra tamin’ireo fanaka ireo dia sekela efajato sy roa arivo, araka ny sekela masina;

⁸⁶lovia kely volamena roa amby folo, feno ditin-kazo manitra, milanja sekela folo avy, araka ny sekela masina; ny lanjan’ny lovia kely volamena rehetra dia sekela roapolo amby zato.

⁸⁷Ny biby rehetra izay hatao fanatitra dorana manontolo dia vantotra ombilahy roa amby folo, ondrilahy roa amby folo, zanak’ondry roa amby folo izay iray taona, mbamin’ny fanatitra avy amin’ny zavamaniry miaraka aminy, ary osilahy roa amby folo ho fanatitra noho ny ota.

⁸⁸Ary ny biby rehetra izay hatao fanati-pihavanana dia vantotra ombilahy efatra amby roapolo, ondrilahy enimpolo, osilahy enimpolo, zanak’ondry enimpolo, izay samy iray taona. Izany no nateriny ho amin’ny fitokanana ny alitara rehefa voahosotra izy.

⁸⁹Rehefa niditra tao amin’ny tranolay fihaonana* i Mosesy mba hiteny amin’Andriamanitra dia nandre ny feo miresaka aminy izy avy tao amin’ny rakotra fanaovam-panavotana izay teo ambonin’ny vata misy ny Vavolombelona, avy eo anelanelan’ny kerobima* roa. Dia niteny taminy NY TOMPO.