Read La Bible en Malgache Nomery 8 Bible Online

Nomery 8 - La Bible en Malgache bible

Nomery 8

¹Ary NY TOMPO niteny tamin’i Mosesy hoe:

²Mitenena amin’i Arona hoe: Rehefa mampirehitra ny jiro fito ianao dia ataovy mahazava ny eo anoloan’ny fitoeran-jiro ireo.

³Dia nataon’i Arona izany ka nampirehetiny ny jiro mba hahazava ny eo anoloan’ny fitoeran-jiro, araka izay nandidian’NY TOMPO an’i Mosesy.

⁴Izao no nanaovana ny fitoeran-jiro: Volamena voatefy, koa hatramin’ny faladiany sy ny voniny aza dia samy voatefy avokoa; araka ny endrika izay nasehon’NY TOMPO an’i Mosesy no nanaovany ny fitoeran-jiro.

⁵Ary NY TOMPO niteny tamin’i Mosesy hoe:

⁶Alao ireo levita* avy amin’ny Zanak’Israely ka diovy.

⁷Izao no hataonao aminy hanadiovana azy: Fafazo rano fanadiovana amin’ny ota izy, asaivo haratany avokoa ny tenany manontolo, ary aoka hosasany ny fitafiany ka hadio izy.

⁸Dia asaivo maka vantotra ombilahy iray izy, mbamin’ny fanatitra avy amin’ny zavamaniry ampombaina azy, dia koba tsara toto voaharo diloilo; ary vantotra ombilahy iray koa no halainao ho fanatitra noho ny ota.

⁹Ento ny levita hankeo anoloan’ny tranolay fihaonana*; dia vorio ny fiangonan’ny Zanak’Israely manontolo.

¹⁰Ento ny levita hankeo anatrehan’NY TOMPO ka ny Zanak’Israely dia hametraka ny tanany aminy;

¹¹ary i Arona dia hanao ny levita ho fanatitra asandratra eo anatrehan’NY TOMPO avy amin’ny Zanak’Israely, mba hanaovan’izy ireo ny fanompoana NY TOMPO.

¹²Ary hametraka ny tanany amin’ny lohan’ireo vantotra ombilahy ny levita; dia atolory ny iray ho fanatitra noho ny ota, ary ny iray kosa ho fanatitra dorana manontolo ho an’NY TOMPO, hanaovana fanavotana ho an’ny levita.

¹³Ary ampijoroy eo anatrehan’i Arona sy ireo zanany ny levita ka ataovy fanatitra asandratra ho an’NY TOMPO izy ireo.

¹⁴Avaho amin’ny Zanak’Israely ny levita, dia ho Ahy ny levita.

¹⁵Rehefa vita izany dia hiditra hanao fanompoana ao amin’ny tranolay fihaonana ny levita. Toy izany no hanadiovanao azy ka hataonao fanatitra asandratra izy.

¹⁶Fa efa nomena ho Ahy avy tamin’ny Zanak’Israely mihitsy izy ireo; mba ho solon’izay voalohan-teraka rehetra, dia izay lahimatoa rehetra amin’ny Zanak’Israely no nanalako azy ho Ahy.

¹⁷Fa Ahy ny voalohan-teraka rehetra amin’ny Zanak’Israely, na olona na biby fiompy; tamin’ilay andro namelezako ny voalohan-teraka rehetra tany amin’ny tany Ejipta no nanamasinako azy ireo ho Ahy.

¹⁸Efa nalaiko ho solon’ny lahimatoa rehetra amin’ny Zanak’Israely ny levita.

¹⁹Ary nomeko ho an’i Arona sy ireo zanany mihitsy ny levita, avy amin’ny Zanak’Israely, mba hanatanteraka ny fanompoan’ny Zanak’Israely ao amin’ny tranolay fihaonana sady hanao fanavotana ho an’ny Zanak’Israely, mba tsy hisy areti-mandringana hanjo ny Zanak’Israely raha manakaiky ny fitoerana masina izy ireo.

²⁰Ary i Mosesy sy i Arona mbamin’ny fiangonan’ny Zanak’Israely manontolo dia nanatanteraka tamin’ny levita izay rehetra nandidian’NY TOMPO an’i Mosesy ny amin’ny levita. Araka izany no nataon’ny Zanak’Israely taminy.

²¹Dia nanadio ny tenany ny levita sady nosasany ny fitafiany; ary i Arona dia nanao azy ireo ho fanatitra asandratra eo anatrehan’NY TOMPO sady nanao fanavotana hanadiovana azy.

²²Rehefa vita izany dia niditra hanao ny fanompoana tao amin’ny tranolay fihaonana ny levita, teo anatrehan’i Arona sy teo anatrehan’ireo zanany; araka izay nandidian’NY TOMPO an’i Mosesy ny amin’ny levita no nataony taminy.

²³Ary NY TOMPO niteny tamin’i Mosesy hoe:

²⁴Ny amin’ny levita dia izao: Hatramin’ny dimy amby roapolo taona no ho miakatra izy ireo no hanatona, hilatsaka amin’ny antokony, hanao ny fanompoana ao amin’ny tranolay fihaonana;

²⁵rehefa dimampolo taona kosa izy dia hiala amin’ny antokon’ny fanompoana ka tsy hanompo intsony.

²⁶Hanampy ny rahalahiny ao amin’ny tranolay fihaonana ihany izy mba hitandrina raharaha; fa tsy hanao ny tena fanompoana akory. Izany no hataonao amin’ny levita ny amin’ny anjara raharahany.