Read La Bible en Malgache Mika 1 Bible Online

Mika 1 - La Bible en Malgache bible

Mika 1

¹Ny tenin’NY TOMPO izay tonga tamin’i Mika morastita tamin’ny andro nanjakan’i Jotama sy i Ahaza ary i Hezekia, mpanjakan’i Joda, dia ilay hitany ny amin’i Samaria sy i Jerosalema.

²Samia mihaino ianareo, ry firenena rehetra. Atongilano ny sofinareo, ry tany sy izay zavatra rehetra eo aminy. Aoka NY TOMPO Andriamanitra no ho vavolombelona hanameloka anareo, dia NY TOMPO, avy ao amin’ny tempoliny masina.

³Fa indro, NY TOMPO miala avy ao amin’ny fitoerany ary midina ka mandia ny havoana amin’ny tany.

⁴Miempo ao ambaniny ny tendrombohitra, ary mivava ny lohasaha, tahaka ny savoka taninin’ny afo sy tahaka ny rano mivarina any amin’ny hantsana.

⁵Izany rehetra izany dia noho ny fahadisoan’i Jakoba sy ny fahotan’ny taranak’Israely. Iza no nahadiso an’i Jakoba? Tsy i Samaria va? Ary iza no toerana fanaovana soron’i Joda? Tsy i Jerosalema va?

⁶Koa i Samaria dia hataoko korontam-bato any an-tsaha sy tany fambolem-boaloboka; havariko ho any an-dohasaha ny vatony ka haharihariko ny fanorenany.

⁷Hotorotoroina ny sampiny voasokitra rehetra, ary hodorana amin’ny afo ny karama malotony rehetra sady hofoanako ny sampiny rehetra satria karama maloton’ny vehivavy janga no nanangonany ireny, ary hody ho karama maloton’ny vehivavy janga indray ilay izy.

⁸Koa izany no hitomaniako sy hidradradradrako ka hahatonga ahy handeha tsy mikiraro sady mitanjaka; hikaonkaona toy ny amboadia aho ary hikiakiaka toy ny aotirisy.

⁹Fa tsy azo sitranina ny ferin’i Samaria; mihatra amin’i Joda izany ary mahatratra ny vavahadin’ny oloko aza, dia any Jerosalema.

¹⁰Aza ambaranareo any Gata izany ary aza mitomany akory! Mihosinkosina vovoka ao Bety-Le-afra aho.

¹¹Mandehana mitanjaka mitondra henatra, ry mponina ao Safira. Tsy mivoaka ny trano ny mponina ao Zanàna; misaona ny ao Bety-Haezela ka tsy hanohana anareo intsony.

¹²Mitaintaina ny amin’ny soa ho azy ny mponina ao Marota satria loza no nidina avy tamin’NY TOMPO ho ao am-bavahadin’i Jerosalema.

¹³Fehezo amin’ny soavaly haingam-pandeha ny kalesy fitondra miady, ry mponina ao Lakisy! Niandohan’ny fahotan’i Ziona* zanakavavy iny, fa tao aminao no nahitana ny fahadisoan’ny Israely.

¹⁴Koa izany no hanomezanao taratasy fisaorana ho an’i Moreseta-Gata; ranotrambo ho an’ny mpanjakan’ny Israely ireo tranon’i Akziba.

¹⁵Mbola hitondrako olon-kafa izay handova anao ianao, ry mponina ao Maresa; ho tonga hatrany Adolama ny voninahitr’Israely.

¹⁶Miheteza sy mikakasa noho ireo zanakao maminao. Halehibiazo ny solanao ho toy ny an’ny vaotoro fa lasan-ko babo lavitra anao izy.