Read La Bible en Malgache Mika 3 Bible Online

Mika 3 - La Bible en Malgache bible

Mika 3

¹Hoy aho: Mihainoa re ianareo, ry loholon’i Jakoba sy ianareo mpanapaka ny taranak’Israely. Tsy anjara raharahanareo va ny hahalala ny rariny?

²Dia ianareo izay mankahala ny tsara ka tia ny ratsy, izay manendaka ny hoditry ny olona sy ny nofony amin’ny taolany;

³eny, ianareo izay homana ny nofon’ny oloko koa sady manendaka ny hodiny ary manapotipotika ny taolany; eny, mitetika azy toy ny hatao am-bilany izy, dia toy ny hena ao anatin’ny fahandroan-kena.

⁴Rehefa mitaraina amin’NY TOMPO ireo dia tsy hihaino azy Izy; hanafina ny tavany aminy Izy amin’izany andro izany, ho valin’ny ratsy nataony.

⁵Izao no lazain’NY TOMPO ny amin’ny mpaminany izay mampaniasia ny oloko: Rehefa misy zavatra hotsakoiny dia mitory fiadanana izy, fa izay tsy manisy hanina eo am-bavany kosa dia iantsoany ady masina!

⁶Koa izany no hahatongavan’ny alina aminareo ka tsy hisy fahitana intsony, ary koa ny maizina aminareo ka tsy hisy fanandroana intsony; fa hilentika tsy hanazava ireny mpaminany ireny ny masoandro ary ho maizina aminy ny andro.

⁷Ho menatra ny mpahita ary hangaihay ny mpanao fanandroana; eny, hitampim-bava avokoa izy rehetra satria tsy misy valinteny avy amin’Andriamanitra.

⁸Fa izaho kosa dia feno hery avy amin’ny Fanahin’NY TOMPO, mbamin’ny rariny sy fahasahiana mba hanambara amin’i Jakoba ny helony sy hilaza amin’Israely ny fahotany.

⁹Mba mihainoa izao, ianareo loholon’ny taranak’i Jakoba sy mpitondra eo amin’ny taranak’Israely, dia ianareo izay manao ny rariny ho fahavetavetana sy mamadika ny hitsiny rehetra,

¹⁰ianareo izay manangana an’i Ziona* amin’ny fandatsahan-dra, sy i Jerosalema amin’ny faharatsiana.

¹¹Mitsara hahazoany kolikoly ny mpifehiny, mampianatra hahazoany karama ny mpisorony ary manao fanandroana hahazoany vola ny mpaminany; nefa NY TOMPO mbola iankinany ihany ka hoy izy ireo hoe: Tsy ato amintsika va NY TOMPO? Tsy hisy loza hanjo antsika.

¹²Koa hasaina toy ny tanimboly i Ziona noho ny nataonareo, ary i Jerosalema dia ho tonga korontam-bato, ary ny tendrombohitra misy ny trano dia ho tonga toy ny havoana rakotra ala.