Read La Bible en Malgache Mika 4 Bible Online

Mika 4 - La Bible en Malgache bible

Mika 4

¹Ary izao no ho tonga amin’ny andro ho avy: Ny tendrombohitra misy ny tranon’NY TOMPO dia haorina eo an-tampon’ny tendrombohitra; hasandratra ho avo noho ny havoana rehetra izy ary hitanjozotra hankany ny firenena maro.

²Eny, maro ny Jentilisa* no hiainga ka hiteny hoe: Andeha isika hiakatra any amin’ny tendrombohitry NY TOMPO, ho any amin’ny tranon’Andriamanitr’i Jakoba mba hampianarany antsika ny amin’ny lalany ka handehanantsika amin’ny sakeli-dalany. Fa avy any Ziona* no hivoahan’ny lalàna, ary avy any Jerosalema ny tenin’NY TOMPO.

³Ho mpitsara amin’ny firenena maro Izy ka hampiaiky ny firenena matanjaka na dia ireo any lavitra aza. Dia hanefy ny sabany ho lelan’angadinomby ireny, ary ny lefony ho fanetezam-boaloboka: Tsy hisy firenena hanainga sabatra hifamely na hianatra ady intsony.

⁴Samy hipetraka eny ambanin’ny voalobony sy ny aviaviny izy, ary tsy hisy hampihorohoro azy, fa ny vavan’Andriamanitra, Tompon’izao rehetra izao, no niteny.

⁵Ny firenena rehetra dia samy mandeha amin’ny anaran’ny andriamaniny avy, fa isika kosa dia handeha amin’ny anaran’NY TOMPO Andriamanitsika mandrakizay doria.

⁶Amin’izany andro izany, hoy NY TOMPO, no hanangonako ny mandringa sy hamoriako izay noroahina mbamin’izay nampahoriko.

⁷Ny mandringa no havelako ho sisa, ary izay noroahina lavitra no ho firenena matanjaka. NY TOMPO hanjaka aminy ao amin’ny tendrombohitra Ziona* manomboka amin’izany ka ho mandrakizay.

⁸Ary ianao, ry Tilikambon’ny andian’ondry, tendrombohitr’i Ziona zanakavavy, aminao no ho tonga izany; eny, ho tonga indray ny fahefana voalohany, dia ny fanjakan’i Jerosalema zanakavavy.

⁹Koa nahoana no mitaraina mafy ianao? Moa tsy misy mpanjaka va ao aminao, sa lany ringana avokoa ny mpanolotsainanao, no dia azon’ny fanaintainana ianao, toy ny vehivavy eo am-piterahana?

¹⁰Ry Ziona zanakavavy, mararia ka manezaha, toy ny vehivavy eo am-piterahana! Fa ankehitriny dia hivoaka avy any an-tanàna ianao ka hipetraka any an-tsaha, dia ho tonga hatrany Babilona aza; any no hamonjena anao, eny, any no hanavotan’NY TOMPO anao ho afaka amin’ny tanan’ny fahavalonao.

¹¹Ankehitriny dia tafangona hamely anao ny firenena maro izay milaza hoe: Voaloto i Ziona, ary aoka hifaly mijery azy ny masontsika.

¹²Kanjo tsy fantatr’ireny ny hevitry NY TOMPO ary tsy azony ny fisainany: Efa nanangona azy toy ny amboara ho ao am-pamoloana Izy.

¹³Mitsangàna ka manosihoseha, ry Ziona zanakavavy, fa hataoko vy ny tandrokao ary hataoko varahina ny kitronao ka hanorotoro firenena maro ianao; tsy azonao kasihina fa atokàny ho an’NY TOMPO ny harena azony tamin’ny tsy rariny, ary ho an’ny Tompon’ny tany rehetra ny fananany.

¹⁴Koa mivoria ho andiany ianao, ry zanakavavin’ny andian-tafika! Ataovy fahirano izahay; asio amin’ny tsorakazo ny takolaky ny mpitsaran’ny Israely.