Read La Bible en Malgache Mika 5 Bible Online

Mika 5 - La Bible en Malgache bible

Mika 5

¹Fa ianao, ry Betlehema Efrata, izay kely tsy tokony ho isan’ny arivon’i Joda akory, avy ao aminao no hivoahan’ny iray ho mpitondra ho Ahy ao amin’ny Israely; hatry ny fahagola no niaviany, dia hatrizay hatrizay.

²Koa hatolony ireny ambara-pahatongan’ny fotoana hiterahan’ny iray izay hiteraka; ary izay sisa amin’ny rahalahiny dia hiverina ho eo amin’ny Zanak’Israely.

³Hitsangana Izy hiandry ny ondriny amin’ny herin’NY TOMPO sy amin’ny voninahitry ny anaran’NY TOMPO Andriamaniny ka handry fehizay ireny, fa hatramin’izao Izy dia ho lehibe hatrany amin’ny faran’ny tany.

⁴Ary Izy no ho fiadanana. Raha tonga eto amin’ny tanintsika ny Asiriana ka miditra ao amin’ny tranobentsika dia hanangana mpiandry ondry fito sy mpanapaka valo hisakana azy isika.

⁵Handany ny tany Asiria amin’ny sabatra sy ny tanin’i Nimroda ao an-tanànany ireo. Ary Izy hanafaka antsika amin’ny Asiriana, raha tonga amin’ny tanintsika ireny ka hanitsaka ato amin’ny faritanintsika.

⁶Ary izay sisa amin’i Jakoba ao amin’ny firenena maro dia ho tahaka ny ando avy amin’NY TOMPO, tahaka ny ranonorana eny amin’ny ahitra, izay tsy manantena na inona na inona avy amin’ny olona, na miandry zavatra avy amin’ny zanak’olombelona.

⁷Ary izay sisa amin’i Jakoba any amin’ny Jentilisa*, any amin’ny firenena maro, dia ho tahaka ny liona amin’ny biby any an’ala sy ho tahaka ny liona tanora ao amin’ny andian’ondry aman’osy: Raha mamakivaky ao izy dia manitsakitsaka sy mamiravira nefa tsy misy manafaka.

⁸Aoka ny tananao hiainga hamely ny rafilahinao ary aoka ho ringana ny fahavalonao rehetra.

⁹Amin’izany andro izany, hoy NY TOMPO, dia haringako tsy ho eo aminao intsony ny soavalinao ary hofonganiko ny kalesy fitondranao miady;

¹⁰hofoanako ny tanàna amin’ny taninao ary harodako ny tanànanao mimanda rehetra;

¹¹hofoanako tsy hisy amin’ny tananao ny fanandroanao ary tsy hanana mpanandro intsony ianao.

¹²Hofoanako tsy hisy aminao koa ny sampinao voasokitra sy ny tsangambaton-tsampinao ka tsy hiankohoka eo anatrehan’ny asan’ny tananao intsony ianao.

¹³Hongotako tsy ho eo aminao ny tsangankazon-tsampin’ny Aserahanao ary horavako koa ny tanànanao.

¹⁴Ary amin’ny fahatezerana sy ny fahavinirana no hamaliako ny firenena izay tsy mihaino.