Read La Bible en Malgache Mika 6 Bible Online

Mika 6 - La Bible en Malgache bible

Mika 6

¹Miangavy anareo aho, mihainoa izay lazain’NY TOMPO: Mitsangàna, mandahara eo anoloan’ny tendrombohitra, ary aoka ho ren’ny havoana ny feonao!

²Mihainoa ny adin’NY TOMPO ianareo, ry tendrombohitra sy ianareo, ry fanorena-matezan’ny tany. Fa NY TOMPO manana ady amin’ny olony, eny, amin’ny Israely no ifandaharany.

³Ry oloko, inona no nataoko taminao? Inona no nanasarako anao? Tondroy maso ary Aho.

⁴Fa nentiko niakatra avy tany amin’ny tany Ejipta ianao sady navotako avy tao amin’ny trano nanandevozana. Dia nirahiko hitarika anao i Mosesy sy i Arona ary i Miriama.

⁵Ry oloko, mba tsarovy ny saina nataon’i Balaka, mpanjakan’i Moaba, sy izay navalin’i Balama, zanak’i Beora, azy, ary izay natao hatrany Sitima ka hatrany Gilgala, hahafantaranareo ny asa marina nataon’NY TOMPO.

⁶Inona no hoentiko manatona NY TOMPO sy miondrika eo anatrehan’Andriamanitra izay any amin’ny avo? Hanatona Azy mitondra fanatitra dorana manontolo sy ombilahy kely izay iray taona va aho?

⁷Ho sitraky NY TOMPO va ny ondrilahy arivoarivo, na renirano diloilo iray alina? Hanolotra ny lahimatoako noho ny fahadisoako va aho, na ny ateraky ny kiboko noho ny fahotan’ny tenako?

⁸Ry olombelona, efa naseho anao izay tsara sy izay ilain’NY TOMPO aminao, dia izao ihany: Ny hanao ny rariny sy ny ho tia famindrampo ary ny hanaraka an’Andriamanitrao amin’ny fanetren-tena.

⁹Manaitra ny tanàna ny feon’NY TOMPO ary mahita ny anaranao ny hendry; henoinareo ny tsorakazo sy izay nanendry azy!

¹⁰Mbola misy rakitry ny harena azo tamin’ny tsy rariny ihany va ao an-tranon’ny ratsy fanahy na misy efaha* tsy ampy famarana ao, izay mahatonga fahatezerana?

¹¹Mety madio va aho raha manana mizana mandainga sy kitapo misy vatomizana tsy marina?

¹²Feno hetraketraka ny mpanankarenany, miteny lainga ny mponina ao aminy ary ny lelany ao am-bavany dia fitaka avokoa.

¹³Izaho kosa dia hikapoka maharary anao ka handringana anao noho ny helokao.

¹⁴Ary ianao dia hihinana nefa tsy ho voky, fa mbola ho ao anatinao ihany ny hanoananao; hanokana ho tahiry ianao nefa tsy hahita toerana azo antoka hasiana azy, ary izay sendra voatahirinao aza dia hatolotro ho amin’ny sabatra.

¹⁵Ianao dia hamafy nefa tsy hijinja; ianao dia hanosihosy oliva nefa tsy hihosotra diloilo, ary hanosihosy ranom-boaloboka nefa tsy hisotro divay.

¹⁶Fa fatra-pitandrina ny lalànan’i Omry sy ny asan’ny taranak’i Ahaba rehetra ianareo, sady manaraka ny toroheviny; noho izany no hanolorako anao ho amin’ny faharavana ary ny mponina ao aminao dia ho zavatra mampisitrisitra ka hitondra ny latsan’ny oloko ianareo.