Read La Bible en Malgache Nahoma 1 Bible Online

Nahoma 1 - La Bible en Malgache bible

Nahoma 1

¹Faminaniana ny amin’ny loza hanjo an’i Ninive, dia ny bokin’ny fahitan’i Nahoma elkosita.

²Andriamanitra saro-piaro sy mamaly heloka NY TOMPO; NY TOMPO dia mpamaly heloka sady feno fahatezerana; NY TOMPO dia mpamaly ny rafilahiny ary mitahiry fahatezerana hamelezany ny fahavalony.

³Mahari-po NY TOMPO sady be hery ary tsy mety manamarina ny meloka. Ao anatin’ny tadio sy ny tafio-drivotra no lalan’NY TOMPO; ny rahona dia vovoka avy amin’ny dian-tongony.

⁴Miteny mafy ny ranomasina Izy ka mahatankina azy sady mandritra ny ony rehetra; malazo i Basana sy i Karmela ary malazo koa ny vonin’i Libanona.

⁵Mihovotrovotra eo anatrehany ny tendrombohitra sady mihotsaka ny havoana; mihorohoro eo anatrehany koa ny tany, dia ny tany onenana sy ny mponina rehetra ao aminy.

⁶Iza no mahajoro eo anoloan’ny fahavinirany? Ary iza no mahatanty ny firehitry ny fahatezerany? Aidina toy ny afo ny fahatezerany ary mirodana eo anoloany ny vatolampy.

⁷Tsara NY TOMPO, fialofana amin’ny andro fahoriana; mahalala izay mialoka aminy Izy.

⁸Fa amin’ny riaka manafotra no anatanterahany fandringanana amin’io toerana io, ary ny fahavalony dia henjehiny ho any amin’ny maizina.

⁹Inona no heverinareo hoenti-manohitra NY TOMPO? Fandringanana no hataony, tsy hiverina fanindroany ny fahoriana.

¹⁰Fa na dia toy ny tsilo mifamatopatotra aza ireny sady mamon’ny zava-pisotrony dia ho levona tanteraka toy ny mololo maina izy.

¹¹Avy tao aminao no nivoahan’ny iray izay misain-dratsy hoenti-manohitra NY TOMPO sady mamoron-kevi-dratsy.

¹²Izao no lazain’NY TOMPO: Na dia tsy latsaka isa fa mbola maro aza ireny dia hofongorana ihany izy ka tsy hisy intsony. Efa nampahory anao Aho ka tsy hampahory anao intsony.

¹³Fa ankehitriny, hopotehiko ny ziogany ho afaka aminao ary hotapahiko ny famatorana anao.

¹⁴Ary NY TOMPO efa nandidy ny aminao hoe: Tsy hisy intsony taranaka hamelo-maso ny anaranao; halaiko tsy ho ao amin’ny tranon’ny andriamanitrao ny sarin-javatra voasokitra sy ny sarin-javatra voarendrika; hanao fasana ho anao Aho satria hita fa latsa-danja ianao.