Read La Bible en Malgache Nahoma 2 Bible Online

Nahoma 2 - La Bible en Malgache bible

Nahoma 2

¹Indro tonga eny an-tendrombohitra ilay mitondra teny soa mahafaly sady manambara fiadanana! Ankalazao ny andro firavoravoanao, ry Joda, efao ny voadinao; fa tsy handeha hamakivaky eo aminao intsony ilay tena ratsy fanahy, indray ripaka izy rehetra.

²Misy mpanafika miakatra hamely anao. Ambeno ny manda, tazano ny lalana, mivonòna hiady, mahereza, aoka hitomban-dahy!

³Fa NY TOMPO efa mampody ny voninahitr’i Jakoba, toy ny ampodiany ny voninahitr’Israely; fa efa nandroba azy ny mpandroba ary nanimba ny sampam-boalobony.

⁴Miloko mena ny ampingan’ny lehilahy maheriny, miloko jaky ny fanamian’ny miaramilany, ny kalesy fitondrany miady dia misy vy mahery, mamirapiratra toy ny afo amin’ny andro fiomanany, ary arangaranga ny lefona.

⁵Miriotra eny an-dalambe ny kalesy fitondra miady ka mifamoivoy eny amin’ny toerana malalaka; tahaka ny harendrina no fijery azy, mitsoriaka tahaka ny tselatra izy.

⁶Tsaroany ny lehilahy malazany, kanjo tafintohina am-pandehanana ireny; mihazakazaka ho any amin’ny manda ireny, kanjo efa voatsangana hatrany an-tampony ny manda.

⁷Novohana ireo vavahadin’ny renirano ary mirodana ny lapa.

⁸Izao no iafarany: Ampitanjahina izy dia noentina ho babo, ary mitoloko azy manao feom-boromailala ny mpanompovavy sady miteha-tratra.

⁹Hatramin’izay i Ninive dia tahaka ny fitahirizan-drano; kanefa manary rano izy izao. Mijanòna! Mijanòna e! Nefa tsy misy miherika.

¹⁰Mandrobà volafotsy, Mandrobà volamena! Fa tsy hita lany ny rakitra soa, dia ny habetsahan’ny zavatra sarobidy isan-karazany.

¹¹Voaroba daholo, potipotika, foana sady lao! Kivy ny fo, mangozohozo ny lohalika, manaintaina ny andilana rehetra, mivaloarika ny tarehy rehetra.

¹²Aiza ilay lavaky ny liona sy firembin’ny liona tanora, dia ilay nandehanan’ny lion-dahy sy ny liom-bavy mbamin’ny zanany ka tsy nisy nanaitaitra azy?

¹³Ny liona dia mamotipotika izay ilain’ny zanany, manakenda koa mba hanomezany ho an’ny liom-bavy sady mameno haza ny lavaka misy azy sy mameno remby voarotidrotika ny fonenany.

¹⁴Indro, hamely anao Aho, hoy Andriamanitra, Tompon’izao rehetra izao. Holevoniko ho setroka ny kalesy fitondranao miady, hovonoiko amin’ny sabatra ny liona tanoranao; hofongorako amin’ny tany ny hazanao; ary tsy ho re intsony ny feon’ny irakao.