Read La Bible en Malgache Habakoka 1 Bible Online

Habakoka 1 - La Bible en Malgache bible

Habakoka 1

¹Faminaniana ny loza hanjo, araka izay ahitan’i Habakoka mpaminany.

²Mandra-pahoviana, RY TOMPO, no hitarainako, ka tsy hohenoinao? Mandra-pahoviana no hitarainako hoe: Loza! Nefa tsy vonjenao ihany?

³Nahoana no ataonao mahita haratsiam-panahy aho ary mahajery fampahoriana Ianao? Fa herisetra sy loza no eo anatrehako, misy ady sady misy ny fifandirana.

⁴Noho izany dia tsy manan-kery intsony ny lalàna ary tsy mivoaka mihitsy ny rariny; fa tsy mahatohitra ny ratsy fanahy ny marina ka izany no ivoahan’ny fitsarana miangatra.

⁵Jereo any amin’ny Jentilisa* ka diniho, ary aoka ianareo ho gaga fa manao zavatra amin’ny andronareo Aho, izay tsy hinoanareo raha olona no mitantara aminareo.

⁶Fa indro, atsangako ny Kaldeana, ilay firenena lozabe sady mirehidrehitra, izay mitety ny tany rehetra mba hahazoany fonenana izay tsy azy akory.

⁷Mahatsiravina sy mahatahotra izy; avy amin’ny tenany ihany ny fitsarany sy ny fahalehibiazany.

⁸Haingam-pandeha noho ny leoparda ny soavaliny sady masiaka noho ny amboadia amin’ny hariva. Mampiriotra ny kalesy fitondra miady ny mpitaingin-tsoavaliny; eny, avy lavitra ny mpitaingin-tsoavaliny; manidina toy ny voromahery maika hihinana izy.

⁹Hampidi-doza no iavian’izy rehetra, ny handroso ihany no imatimatesany ka manangona babo toy ny fasika izy.

¹⁰Manakora ny mpanjaka izy ary ihomehezany ny mpanapaka eo aminy. Ny tanàna mimanda rehetra dia ihomehezany ka manandratra tovon-tany izy ary mahafaka izany.

¹¹Dia mihelina toy ny rivotra izy ary mandroso ka mahazo heloka, izany heriny izany no andriamaniny.

¹²Moa tsy hatrizay hatrizay va Ianao, RY TOMPO Iray Masina Andriamanitro? Tsy ho faty Ianao! TOMPO ô, ho amin’ny fitsarana no nanendrenao ireny; ry Vatolampy ô, ho fananarana no nanangananao azy.

¹³Ianao izay madio maso ka tsy ta hahita ny ratsy ary tsy mahazaka mijery fampahoriana, nahoana Ianao no mijery ny mpamitaka? Nahoana no mangina Ianao raha mandrapaka ny marina noho izy ny ratsy fanahy?

¹⁴Mitondra ny olona toy ny hazandrano any an-dranomasina sy toy ny biby mandady sy mikisaka, izay tsy manam-panapaka Ianao.

¹⁵Aingainy amin’ny fintana izy rehetra, samboriny amin’ny haratony ary sarihiny amin’ny harato tarihiny ka faly sy ravoravo izy.

¹⁶Koa izany no amonoany zavatra hatao fanatitra ho an’ny haratony sy andoroany ditin-kazo manitra ho an’ny harato tarihiny, fa ireo no ahazoany anjara matavy sy hanina matsiro.

¹⁷Koa noho izany, moa va hanaisotra ny ao amin’ny tandrohony izy ary hamono firenena mandrakariva ka tsy hiantra?