Read La Bible en Malgache Habakoka 2 Bible Online

Habakoka 2 - La Bible en Malgache bible

Habakoka 2

¹Hitsangana eo ambonin’ny toerana fiambenako Aho ary hijoro eo ambonin’ny manda; hiandry Aho mba hahitako izay holazainy Amiko sy izay havaliko amin’ny fitarainako.

²Dia namaly ahy NY TOMPO hoe: Soraty ny fahitana ka ataovy velona tsara ny soratra eo amin’ny fafana mba ho azon’izay mihazakazaka mamaky.

³Fa ny fahitana dia mbola ho amin’ny fotoana voatendry, ary mikendry ny farany izy ka tsy ho diso; eny, na dia mitaredretra aza izy dia andraso ihany, fa ho avy tokoa izy ka tsy hijanona.

⁴Indro, feno avonavona ireny; tsy mahitsy ny fanahiny ao anatiny, fa ny marina kosa dia ho velon’ny finoany.

⁵Eny tokoa, mamitaka ny divay. Tsy mba mahatoetra ny lehilahy miavonavona, dia ilay mitanatana vava tahaka ny fitoeran’ny maty*; eny, toy ny fahafatesana ka tsy mety voky. Fa manangona ny firenena rehetra ho ao aminy izy sady mamory ny olona rehetra ho ao aminy.

⁶Tsy hanao oha-teny hamelezana azy va ireto olona rehetra ireto? Tsy hanao eson-teny sy fitenenana hanoherana azy va izy? Izao no holazainy: Lozan’izay mahery manangona ny tsy azy! Mandra-pahoviana? Dia izay mivesatra tombon-trosa tsy voaloa ara-potoana.

⁷Tsy hitsangana tampoka va ny tompon-trosa? Tsy hifoha va ireo izay hampijaly anao? Ho babony ianao!

⁸Fa efa namabo firenena maro ianao ka mba hobaboin’ny sisa rehetra amin’ny firenena kosa, noho ny ran’olona sy ny herisetra natao tamin’ny tany, dia tamin’ny tanàna sy ny mponina rehetra ao aminy.

⁹Lozan’izay fatra-pila harena amin’ny tsy marina ho an’ny taranany, hanaovany ny akaniny any amin’ny avo mba tsy ho tratry ny tanan’ny loza!

¹⁰Izay hahatonga henatra ho an’ny taranakao no noheverinao, dia ny handringanana firenena maro; niantso loza hihatra amin’ny ainao ianao.

¹¹Fa hitaraina ny vato ao amin’ny rindrina ary ny sakamandimby ao amin’ny trano no hamaly azy.

¹²Lozan’izay manangana vohitra amin’ny fandatsahan-dra sy manorina tanàna amin’ny tsy fahamarinana!

¹³Moa tsy avy amin’Andriamanitra, Tompon’izao rehetra izao va no hisasaran’ny olona ho an’ny afo sy hisahiranan’ny firenena amin’ny zava-poana?

¹⁴Fa ho feno ny fahalalana ny voninahitry NY TOMPO ny tany, toy ny fanaron’ny rano ny fanambanin’ny ranomasina.

¹⁵Lozan’izay mampisotro toaka ny namany, dia ianao izay manome poizina ka mampahamamo azy mba hijery ny fitanjahany!

¹⁶Efa feno henatra ianao fa tsy voninahitra; mba misotroa koa ka asehoy ny fitanjahanao! Hatolotra anao ny kapoaka eny an-tanana ankavanan’NY TOMPO, ary fahamenarana no ho solon’ny voninahitrao.

¹⁷Fa hanody anao ny herisetra natao tamin’i Libanona sy ny fandringanana mahatahotra namelezana ny biby, noho ny ran’olona sy ny herisetra natao tamin’ny tany, dia tamin’ny tanàna sy ny mponina rehetra ao aminy.

¹⁸Inona moa no ilàna ny sarin-javatra voasokitra, no misokitra azy ny mpanao azy? Na ny sarin-javatra voarendrika sy ny mpampianatra lainga, no matoky azy izay namorona azy ka manao sampy moana aminy?

¹⁹Lozan’izay miteny amin’ny hazo hoe: Mifohaza! Ary amin’ny vato moana hoe: Mitsangàna! Hampianatra va ireo? E! voapetaka takelaka volamena sy volafotsy ihany izy, nefa tsy misy fanahy akory ao anatiny.

²⁰NY TOMPO dia ao amin’ny tempoliny masina. Aoka hangina eo anatrehany ny tany rehetra!