Read La Bible en Malgache Zefania 2 Bible Online

Zefania 2 - La Bible en Malgache bible

Zefania 2

¹Miangòna; eny, mivoria ianareo ry firenena tsy manan-kenatra,

²dieny tsy mbola mihatra ny didy, fa mihelina toy ny akofa ny andro, dieny tsy mbola tonga aminareo ny hamafin’ny hatezeran’NY TOMPO; eny, dieny tsy mbola tonga aminareo ny andro firehetan’ny fahatezeran’NY TOMPO!

³Mitadiava NY TOMPO ianareo mpanetry tena rehetra amin’ny tany, izay efa nanaraka ny fitsipiny! Tadiavo ny fahamarinana, tadiavo ny fanetren-tena! Angamba ho voafina ianareo amin’ny andron’ny fahatezeran’NY TOMPO.

⁴Fa hafoy i Gaza, ho lao i Askelona; horoahina mitataovovonana i Asdoda ary hofongorana i Ekrona.

⁵Lozan’ny mponina any amoron-tsiraka, dia ny firenen’ny Keretita! Mihatra aminareo ny tenin’NY TOMPO hoe: Ry Kanana, tanin’ny Filistina, haringako tsy hisy mponina eo aminao!

⁶Ny moron-tsiraka dia ho tonga tany fiandrasana ondry, ho toeram-piandrasan’ny mpiandry ondry sy ho valan’ondry aman’osy.

⁷Ho tanin’ny sisa amin’ny taranak’i Joda izany ka any no hiandrasany ondry. Ao amin’ny tranon’i Askelona no handriany amin’ny hariva, fa NY TOMPO Andriamaniny no hamangy azy ka hampody azy avy amin’ny fahababoany.

⁸Efa reko ny latsa ataon’i Moaba sy ny fanaratsiana ataon’ny taranak’i Amona izay nandatsany ny oloko sy nireharehany teny amin’ny sisintaniny.

⁹Koa raha velona koa Aho, hoy NY TOMPO, Andriamanitra Tompon’izao rehetra izao, Andriamanitry ny Israely, dia ho tahaka an’i Sodoma tokoa i Moaba, ary ny taranak’i Amona dia ho tahaka an’i Gomora, ho toerana feno ahi-dratsy sy lava-tsira ary tany lao mandrakizay; ny sisa amin’ny oloko no hamabo azy ary ny sisa amin’ny fireneko no hahalasa azy.

¹⁰Izany no ho valin’ny avonavony satria nandatsa ny olon’NY TOMPO, Andriamanitra Tompon’izao rehetra izao, sy nirehareha taminy izy.

¹¹Hahatahotra azy NY TOMPO satria hanafoana ireo andriamanitra rehetra ambonin’ny tany Izy; hiankohoka eo anatrehan’NY TOMPO ny nosin’ny Jentilisa* rehetra, samy any amin’ny fitoerany avy.

¹²Ianareo Kosita koa, ho voatrobaky ny sabatro ianareo.

¹³Hanainga ny tanany hamely ny avaratra Izy ka handringana an’i Asiria; hahalao an’i Ninive ho karankaina tahaka ny tany efitra Izy.

¹⁴Hisy andiam-biby handry ao aminy, dia ny karazam-biby rehetra; hitoetra ao an-tampon’ny andriny na ny sama na ny sokina; feo mitoloko no ho re avy ao am-baravarankely. Fandravana no ho eo an-tokonana, fa hendahiny ny rafitra sedera.

¹⁵Izany no tanàna niravoravo sady nandry fehizay, izay niteny anakampo hoe: Izaho no izy ary tsy misy hafa! Endre! Tonga lao izy; eny, fandrian’ny biby! Izay rehetra mandalo azy dia hisiotsioka mafy sy hanondro tanana azy.