Read La Bible en Malgache Hagay 2 Bible Online

Hagay 2 - La Bible en Malgache bible

Hagay 2

¹Tamin’ny andro fahiraika amby roapolo tamin’ny volana fahafito no nahatongavan’ny tenin’NY TOMPO noentin’i Hagay mpaminany hoe:

²Lazao amin’i Zerobabela, zanak’i Sealtiela, governora any Joda, sy amin’i Josoa, zanak’i Jozadaka, Mpisoronabe*, ary amin’ny sisa amin’ny vahoaka hoe:

³Iza aminareo mbola velona no nahita ity trano ity tamin’ny voninahiny taloha? Fa manao ahoana kosa ny fahitanareo azy ankehitriny? Moa tsy toy ny tsinontsinona eo imasonareo va izy ity?

⁴Nefa mahereza ankehitriny, ry Zerobabela! Hoy NY TOMPO. Mahereza, ry Josoa, zanak’i Jozadaka, Mpisoronabe! Mahereza, ianareo vahoaka rehetra! Hoy NY TOMPO. Miasà! Fa Izaho no momba anareo, hoy Andriamanitra, Tompon’izao rehetra izao,

⁵araka ny tenin’ny fanekena nataoko taminareo, fony nivoaka avy tany Ejipta ianareo, ary ny Fanahiko dia mitoetra ao aminareo; koa aza matahotra ianareo!

⁶Fa izao no lazain’Andriamanitra, Tompon’izao rehetra izao: Indray maka indray, raha afaka kelikely, dia hampihorohoroiko ny lanitra sy ny tany ary ny ranomasina sy ny tany maina;

⁷hampihorohoroiko koa ny firenena rehetra ka ho avy izay zava-tsoan’ny firenena rehetra; ary hofenoiko voninahitra ity trano ity, hoy Andriamanitra, Tompon’izao rehetra izao.

⁸Ahy ny volafotsy ary Ahy ny volamena, hoy Andriamanitra, Tompon’izao rehetra izao.

⁹Ny voninahitr’ity trano ity amin’ny ho avy dia ho lehibe noho ny tany aloha, hoy Andriamanitra, Tompon’izao rehetra izao; ary eto amin’ity toerana ity no hanomezako fiadanana, hoy Andriamanitra, Tompon’izao rehetra izao.

¹⁰Tamin’ny andro fahefatra amby roapolo tamin’ny volana fahasivy tamin’ny taona faharoa nanjakan’i Dariosy no nahatongavan’ny tenin’NY TOMPO izay noentin’i Hagay mpaminany hoe:

¹¹Izao no lazain’Andriamanitra, Tompon’izao rehetra izao: Miangavy anao Aho, andeha maka hevitra amin’ny mpisorona hoe:

¹²Raha misy mitondra hena masina eny an-tsisin-dambany ka voakasiky ny sisin-dambany ny mofo, na izay nahandroina na ny divay na ny diloilo na izay mety ho fihinana, moa ho tonga masina koa va ireo? Dia namaly ny mpisorona hoe: Tsia!

¹³Ary hoy i Hagay: Raha misy maloto amim-paty mikasika ireo, moa ho tonga maloto koa va ireo? Dia namaly ny mpisorona hoe: Ho tonga maloto ireo.

¹⁴Dia hoy i Hagay: Tahaka izany ireto olona ireto ary tahaka izany ity firenena ity eo anatrehako, hoy NY TOMPO. Tahaka izany koa ny asan’ny tanany rehetra, fa izay ateriny ao dia maloto.

¹⁵Koa miangavy anareo aho, hevero ny amin’izay hiseho hatramin’izao andro anio izao no ho mankarỳ. Fony tsy mbola nisy vato voarafitra tao amin’ny tempolin’NY TOMPO,

¹⁶tamin’izany andro izany, raha nisy nankeo amin’ny antontam-bary tokony ho roapolo famarana, dia folo ihany no tao; raha nisy nankeo amin’ny vata fanantazana ranom-boaloboka hananty indimampolon’ny famarana dia roapolo ihany no tao.

¹⁷Ny vary main’ny hafanana sy maty fotsy ary ny havandra no namelezako anareo tamin’ny asan’ny tananareo rehetra; nefa tsy niverina Tamiko ihany ianareo, hoy NY TOMPO.

¹⁸Miangavy anareo aho, hevero izay hiseho hatramin’izao andro anio izao no ho mankarỳ, hatramin’ny andro fahefatra amby roapolo amin’ny volana fahasivy; eny, hatramin’ny andro nanorenana ny tempolin’NY TOMPO, hevero izany!

¹⁹Mbola misy voan-javatra ihany va ao an-tsompitra? Na dia ny voaloboka, ny aviavy, ny ampongabendanitra ary ny oliva aza dia tsy mbola nisy namoa. Hatramin’izao andro anio izao no hitahiako anareo.

²⁰Tonga fanindroany tamin’i Hagay ny tenin’NY TOMPO, tamin’ny andro fahefatra amby roapolo hoe:

²¹Lazao amin’i Zerobabela governora any Joda hoe: Hampihorohoroiko ny lanitra sy ny tany;

²²haongako ny sezafiandrianan’ny fanjakana, hofoanako ny herin’ny fanjakan’ny firenena; haongako ny kalesy fitondra miady sy izay mitaingina eo aminy; ary samy ho lavon’ny sabatry ny namany avy ny soavaly sy ny mpitaingina azy.

²³Amin’izany andro izany hoy Andriamanitra, Tompon’izao rehetra izao dia horaisiko ianao ry Zerobabela mpanompoko, zanak’i Sealtiela, hoy NY TOMPO. Hataoko toy ny fitombo-kase ianao satria ianao no efa nofidiko, hoy Andriamanitra, Tompon’izao rehetra izao.