Read La Bible en Malgache Zakaria 13 Bible Online

Zakaria 13 - La Bible en Malgache bible

Zakaria 13

¹Amin’izany andro izany dia hisy loharano voasokatra ho an’ny taranak’i Davida sy ho an’ny mponina any Jerosalema hanafaka fahotana sy fahalotoana.

²Ary amin’izany andro izany, hoy Andriamanitra, Tompon’izao rehetra izao, dia hofoanako ny anaran-tsampy amin’ny tany ka tsy hotsarovana intsony ireny; ary hesoriko amin’ny tany ny mpaminany sy ny fanahin’ny fahalotoana.

³Ary raha mbola hisy haminany, ny ray aman-dreniny izay niteraka azy dia hiteny aminy hoe: Tsy ho velona ianao, satria miteny lainga amin’ny anaran’NY TOMPO; ary ny ray aman-dreniny izay niteraka azy dia handefona azy raha maminany izy.

⁴Amin’izany andro izany ny mpaminany dia samy hahazo henatra noho ny fahitany avy, raha maminany; ary tsy hisalotra akanjo volom-biby hamitahana intsony izy

⁵fa hilaza hoe: Tsy mpaminany aho fa mpiasa tany, satria nisy nividy ahy ho andevo fony aho mbola kely.

⁶Dia hisy hilaza aminy hoe: Koa inona itony ratra eny amin’ny tratranao itony? Dia hovaliny hoe: Naratra tao an-tranon’ny sakaizako ireny.

⁷Mifohaza, ry sabatra, hamely ny mpiandriko sy ny lehilahy izay akaiky Ahy, hoy Andriamanitra, Tompon’izao rehetra izao. Asio ny mpiandry dia hihahaka ny ondry! Ary hamerina ny tanako ho amin’ny madinika Aho.

⁸Ary amin’ny tany rehetra, hoy NY TOMPO, ny androatokony ao dia haringana ho faty, fa ny ampahatelony sisa ao no havela.

⁹Ary hoentiko miditra amin’ny afo ny ampahatelony, ary harendrika toy ny fandrendrika volafotsy izy, ary hizahako toetra toy ny fizaha toetra ny volamena izy. Hiantso ny anarako izy, ary Izaho hamaly azy; Izaho hilaza hoe: Oloko izy! Ary izy hiteny hoe: NY TOMPO no Andriamanitro!